तिनाउको बाढीले बुटवलमा एक घर बगायो, १३ घर डुबानमा- प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

तिनाउको बाढीले बुटवलमा एक घर बगायो, १३ घर डुबानमा

मानवीय क्षति नभएपनि बस्ती जोखिममा रहेकाले सर्तकता अपनाउन आग्रह
सन्जु पौडेल, अमृता अनमोल

तिलोत्तमा — तिनाउ नदीमा आएको बाढीले बिहीबार दिउँसो बुटवल उपमहानगरपालिका–१७ रानीगन्जमा रहेकाे एउटा घर बगाएको छ । बाढीले खोला किनारमा रहेको प्रेमकुमारी खाम्चाको ब्लक जडान भएको टिनले छाएको ४ कोठे घर, सोही स्थानका सुन्दर गन्धर्वको घरको शौचालय र बाथरुम बगाएको इलाका प्रहरी कार्यालय बुटवलका डीएसपी प्रतितसिंह राठौरले बताए ।

त्यस्तै, स्थानीय पुरुषोत्तम पुरी, तिलक गैरे र गणेश गैरेको घर जोखिममा रहेकाले घरबाट सामान निकालिसकिएको उनले जनाए । घर बगाएपछि खाम्चा तिलोत्तमास्थित छोराको घरमा गएकी छन् भने जोखिममा रहेकाहरु आफन्तकोमा गएको राठौरले बताए ।

पानीको बहाब बढ्दै गए थप ४/ ५ घर जोखिममा पर्ने भन्दै उनले इलाकाबाट खटिएको टोलीले सामान निकाल्न र मानिसलाई अन्यत्र सार्न सहयोग गरिरहेको बताए ।

यस्तै तिनाउ नदी बाँडिएर बनेको दानव नदीले लुम्बिनी सांस्कृतिक नगरपालिकाका ७ र सम्मरीमाई गाउँपालिकाका ६ घर डुबानमा परेका छन् । बाढीले तिनाउ नदी किनारका २ दर्जन बढी घर जोखिममा परेका छन् ।

कटान सुरु भएका रानीगन्जका ३ घर खाली गराइएको छ । यस्तै दानव नदीमा आएको बाढीले रुपन्देहीको लुम्बिनी सांस्कृतिक नगरपालिका २ भर्तापुरका ७ घर र सम्मरीमाई गाउँपालिकाका ६ घर डुबेका छन् । उनीहरुलाई अन्यत्र स्थानान्तरण गरिएको रुपन्देही प्रहरी कार्यालयका नायब उपरीक्षक खड्गबहादुर खत्रीले बताए ।

बहाबले बुटवल–११ बुद्धनगर, माझगाउँ, मझुवा एवं वडा नम्बर १७ का मगरघाट, रानीगन्जलगायतमा समेत कटान गरेको छ । कटान बढेपछि रानीगन्जका ४ घर खाली गराइएको छ । बुद्धनगर, मझुवा र मैनाबगर जोड्ने सडकको केही भाग र नदी कटान रोक्न मझुवामा बनाइएको तारजाली र ड्याम बगाएको बुटवल–११ का वडाअध्यक्ष रामचन्द्र खनालले बताए ।

प्रकाशित : आश्विन ८, २०७७ १७:०३
प्रतिक्रिया
पठाउनुहोस्

काठमाडौं उपत्यकामा कोरोना संक्रमितको संख्या १९ हजार नाघ्यो

कान्तिपुर संवाददाता

काठमाडौँ — काठमाडौं उपत्यकामा कोरोना संक्रमितको संख्या १९ हजार नाघेको छ । बिहीबार थप ७ सय ५५ जनामा कोरोना संक्रमण देखिएसँगै उपत्यकामा कोरोना संक्रमितको संख्या १९ हजार ३ सय ३१ पुगेको हो । 

सबैभन्दा बढी संक्रमित काठमाडौं जिल्लामा देखिएका छन् । बिहीबारसम्म यहाँ संक्रमितको संख्या १५ हजार ७ सय ६२ पुगेको छ । यस्तै, भक्तपुरमा १७ सय ४२ र ललितपुरमा १८ सय २७ जनामा कोरोना संक्रमण देखिएको छ ।

यसैबीच काठमाडौंमा उपत्यकामा कोरोनाबाट मृत्यु हुनेहरुको संख्या एक सय २२ पुगेको छ । बिहीबार मात्रै उपत्यकामा थप ६ जना कोरोनाबाट मृत्यु भएका छन् । हालसम्म काठमाडौंमा कोरोनाबाट सबैभन्दा धेरैको मृत्यु भएको छ । काठमाडौंमा कोरोनाबाट मृत्यु हुनेको संख्या ८६ पुगेको छ ।

ललितपुरमा १७ र भक्तपुरमा १९ जनाको कोरोनाबाट ज्यान गएको छ ।

स्वास्थ्य तथा जनसंख्या मन्त्रालयका प्रवक्ता डा.जागेश्वर गौतमले ५० प्रतिशत सक्रिय संक्रमितहरु काठमाडौंमा रहेको बताएका छन् ।

प्रकाशित : आश्विन ८, २०७७ १६:४८
पूरा पढ्नुहोस्
प्रतिक्रिया
पठाउनुहोस्
×