बेपत्ता अहेव विष्णु नेपाल मृत फेला
तिलोत्तमा — गत बिहीबार रातिदेखि बेपत्ता भएका शुद्धोधन गाउँपालिका–४, फर्साटिकर का ४४ वर्षीय सिनियर अहेव बिष्णुप्रसाद नेपाल सोमबार बिहान मृत अवस्थामा फेला परेका छन् ।
नेपाल मोतिपुर प्राथमिक स्वास्थ्य केन्द्रमा सिनियर अहेवको रुपमा कार्यरत रहेका थिए । तिलोत्तमा नगरपालिका १६ बिहुलीमा स्थानीय कुलोको छेवैमा उनको शव फेला परेको इलाका प्रहरी कार्यालय बुटवलका डीएसपी प्रतीतसिंह राठौरले बताए ।
गत बिहीबार राति बुटवल–६, स्थित एक होटलबाट घर जाने क्रममा सडक नजिकैको नहरमा खसेका उनको मोटरसाइकल सोही नहरमा आधा डुबेको अवस्थामा फेला परेको राठौरले बताए ।
स्थानीयले मृत पुरुषको शव फेला पारेपछि आफूहरुलाई जानकारी दिएको र उक्त शव विष्णु नेपालकै भएको सनाखत भएको डीएसपी राठौरले बताए । नेपालका एक छोरा र श्रीमती रहेकी छिन् । घटनाको बारेमा प्रहरीले थप अनुसन्धान गरिरहेको छ ।
प्रकाशित : आश्विन ५, २०७७ ०९:५३