रोल्पाको होलेरीमा निषेधित क्षेत्र घोषणा

स्थानीय प्रशासनले होलेरी र आसापासका क्षेत्रमा आइतबारदेखि अनिश्चितकालका लागि ‘लकडाउन’ जारी गरेको हो । होलेरीको सुरक्षामा खटिएका प्रहरीमा समेत कोरोना देखिएको छ ।

प्रमुख जिल्ला अधिकारी नरेन्द्रकुमार रानाका अनुसार कोरोना संक्रमण समुदायमा पुगे/नपुगेको अध्ययन थालिएको छ । ‘बैंकका कर्मचारी र होटेलमा समेत कोरोना संक्रमण भएको पाइएपछि समुदायमा पुगेको आशंका बढेको हो’, प्रजिअ रानाले भने । होलेरीमै शनिबार र आइतबार गरी ८ जनामा कोरोना संक्रमण देखिएको छ ।

स्थानीय प्रशासन र जिल्ला कोभिड संकट व्यवस्थापन केन्द्रको निर्णयअनुसार होलेरी केन्द्रविन्दू हुनेगरी दक्षिणतर्फ दाङको सीमास्थित ग्वारखोला, पूर्वमा नयाँगाउँ ढुंगाखानी, पश्चिममा खस्रेबजार र उत्तरमा सखी सैबाङसम्म निषेधित क्षेत्र तोकिएको हो ।

यस्तै, जिल्ला स्वास्थ्य कार्यालयका सहायक प्रमुखमा कोरोना संक्रमण देखिएपछि उक्त कार्यालयलाई सिल गरिएको छ । केही साताअघि दाङस्थित घर पुगेर फर्केका ती कर्मचारीमा कोरोना संक्रमण देखिएपछि कार्यालय सिल गरिएको प्रमुख जिल्ला अधिकारी रानाले बताए ।

आइतबारसम्म रोल्पाका ९३ जनामा कोरोना संक्रमण भइसकेको जिल्ला स्वास्थ्य कार्यालयले बताएको छ ।