छोटुको उपचारका लागि सहयोग जुट्दै- प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

छोटुको उपचारका लागि सहयोग जुट्दै

माधव ढुंगाना

भैरहवा — छोराको उपचारका लागि अस्पतालको खर्च धान्न नसकेर समस्यामा परेको आर्थिक विपन्न एक परिवारलाई मारवाडी युवा मञ्च भैरहवाले आर्थिक सहयोग गरेको छ ।

तीन महिनादेखि भैरहवास्थित युनिभर्सल शिक्षण अस्पतालमा उपचार गराइरहेका नवलपरासीको रामग्राम नगरपालिका १७, देवगाउ फूलभरियाका १६ वर्षीय छोटु साहानीको उपचारका लागि मञ्चले आर्थिक सहयोग जुटाएर रकम उपलब्ध गराएको हो ।

संस्थाले संकलन गरेर जुटाएको ५१ हजार १ सय रुपैयाँ बुधबार अस्पतालमा पुगेर छोटुको आमा रमावती साहनीलाई मारवाडी युवा मञ्च भैरहवाका अध्यक्ष मनोज कुमार अग्रवालले हस्तान्तरण गरेका थिए ।

छोटु साहनीको उपचार र उनको पारिवारिक आर्थिक अवस्थाका वारेमा एक साता अघि इकान्तिपुरले समाचार प्रकाशन गरेको थियो ।

अस्पतालबाट छोटुको डिस्चार्ज नहुँदासम्म बिरामी कुरुवा गर्ने २ जनालाई बुधबारदेखि नि:शुल्क खानपिनको व्यवस्था समेत मञ्चले मिलाएको अध्यक्ष अग्रवालले बताए । मञ्चको समन्वयमा अस्पताल बाहिरको एक होटलबाट बिहान बेलुका दुई जनालाई खानापिनको व्यवस्था मिलाइएको हो ।

छोटुको उपचार र उनको परिवारको आर्थिक सहयोगका लागि भैरहवामा अन्य विभिन्न सहयोगी र संघसंस्था जुट्न थालेका छन् । भैरहवामा ‘छोटु सहानी बचाउ अभियान’ नै सञ्चालन गरिएको छ ।

सम्बन्धित समाचारः

तीन महिनादेखि अस्पतालमा छट्पटाउँदै

प्रकाशित : भाद्र १०, २०७७ १५:०३
प्रतिक्रिया
पठाउनुहोस्

भेन्टिलेटर खरिद गर्न दिइएको डेढ करोड फ्रिज

ठाकुरसिंह थारु, रुपा गहतराज

नेपालगन्ज — भेरी अस्पताललाई कोभिड विशेष अस्पताल बनाउन स्थानीय प्रशासनले चन्दा माग गरिरहेका बेला भेन्टिलेटर खरिद गर्न दिइएको डेढ करोड रकम फ्रिज भएको छ ।

बाँके निर्वाचन क्षेत्र नम्बर २ का सांसद तथा पूर्व सहरी विकास मन्त्री इस्तियाक राईले स्थानीय पूर्वाधार साझेदारी विकास कार्यक्रम अन्तर्गत ठेक्का हुन नसकेका दुई योजनाको रकम भेन्टिलेटर खरिद गर्न डेढ करोड रकम दिएका थिए । तर नेपालगन्ज उपमहानगरपालिकाको वेवास्ताका कारण भेन्टिलेटर खरिद गर्न नसकिएको हो ।

स्थानीय पूर्वाधार साझेदारी विकास कार्यक्रम निर्देशक समितिको गत १४ गतेको बैठकबाट संशोधन गरी कोष तथा लेखा नियन्त्रण कार्यालय र नेपालगन्ज उपमहानगरपालिकालाई असार १५ गते निर्णय पठाइएको थियो । तर उपमहानगरपालिकाले रकम निकासाका लागि पत्रसमेत पठाएन ।

‘दुई लाइनको पत्र पठाएर कोभिड कोषको खातामा रकम निकासा गरेको बजेट फ्रिज हुने थिएन । तर नगरपालिकालाई पत्र लेख्नसमेत फुर्सद भएन,’ पूर्वै मन्त्री राईले भने,‘कोभिडको महामारीका बेला भेन्टिलेटरको रकम फ्रिज हुनु निकै दुःखद हो । मेयरले सार्वजनिक रुपमै माफी माग्नु पर्छ ।’ भेरी अस्पतालमा एउटा मात्रै भेन्टिलेटर छ ।

संघीय मामिला तथा सामान्य प्रशासन मन्त्रालयद्वारा असार ७ गते पठाइएको पत्रमा स्थानीय तहले आफ्नो क्षेत्रमा खर्च नभई बचत भएको रकम एकिन गरेर निर्देशक समितिको संयोजक र जिल्ला समन्वय समितिलाई जानकारी गराउन निर्देशन दिएको थियो ।

निर्देशक समितिको संयोजक सम्बन्धित निर्वाचित संघीय सांसद रहने व्यवस्था छ । तर उपमहानगरपालिकाले भेन्टिलेटर किन्न छुट्याइएको बजेट बारे निर्देशक समितिको संयोजक राईसमेतलाई जानकारी नदिएर फ्रिज गराएको हो ।

नेपालगन्ज उपमहानगरपालिकाका प्रमुख डा. धवलशमसेर राणाले पूर्वमन्त्री राईले नगरपालिकालाई नभइ भेरी अस्पताललाई भेन्टिलेटर किन्‍न बजेट छुट्याएको दाबी गरे । ‘१० दिनमा डेढ करोडको समान किन्न सकिन्छ ? कम्तीमा समान किन्‍न चार महिना लाग्छ । त्यसैले हाम्रो कारणले बजेट फ्रिज भएको होइन,’ उनले भने,‘नचाहिने कुरा गरेर हुन्छ ।’ तर कोष तथा लेखा नियन्त्रक कार्यालयले भने कोभिड कोषमा रकम निकासा गरेको भए फ्रिज नहुने जनाएको छ ।

प्रकाशित : भाद्र १०, २०७७ १४:५७
पूरा पढ्नुहोस्
प्रतिक्रिया
पठाउनुहोस्
×