दाङमा २९ सेनासहित ३३ जनामा कोरोना संक्रमण
दाङ — दाङमा २९ नेपाली सेनासहित ३३ जनामा कोरोना संक्रमण पुष्टि भएको छ । भेरी अस्पताल नेपालगन्जमा मंगलबार गरिएको पीसीआर परीक्षणमा तुलसीपुरस्थित नेपाली सेनाको १९ नम्बर बाहिनीमा कार्यरत २९ जवानमा कोरोना देखिएको हो ।
यसअघि संक्रमण देखिएका एक जवानको सम्पर्कमा आएका व्यक्तिको कन्ट्याक ट्रेसिङका क्रममा ३१ जनाको पीसीआर परीक्षण गर्दा २९ जनामा संक्रमण पुष्टि भएको तुलसीपुर उपमहानगरपालिकाका जनस्वास्थ्य निरीक्षक बिमल केसीले बताए ।
प्युठानमा कार्यरत एक जवान तालिमका लागि नेपालगन्ज जाँदै गर्दा तुलसीपुरस्थित बाहिनीमा बसेका थिए । उनलाई लक्षण देखिएपछि परीक्षण गर्दा कोरोना संक्रमण पुष्टि भएको थियो । त्यसपछि उनको सम्पर्कमा आएका ३१ जनाको स्वाब परीक्षण गरिएको थियो । संक्रमित सबैलाई व्यारेकभित्रै आइसोलेसनमा राखिएको जनस्वास्थ्य निरिक्षक केसीले बताएका छन् ।
यस्तैगरी शान्तिनगर र बबई गाउँपालिकामा चार जनामा कोरोना संक्रमण पुष्टि भएको छ । भेरी अस्पताल नेपालगन्जमा गरिएको परीक्षणमा बबई गाउँपालिका ४ का २६ र ३३ वर्षीय पुरुष र वडा नम्बर ७ का ३० वर्षीया एक महिलामा कोरोना संक्रमण पुष्टि भएको हो ।
राप्ती स्वास्थ्य विज्ञान प्रतिष्ठान घोराहीमा गरिएको परीक्षणमा शान्तिनगर गाउँपालिकाका एक नौ वर्षीय बालकमा संक्रमण पुष्टि भएको प्रतिष्ठानका शाखा अधिकृत रोशन आचार्यले बताए ।
प्रकाशित : श्रावण २७, २०७७ १९:१०