गर्भवतीमा कोरोना पुष्टि भएपछि भेरी अस्पतालको प्रसूति वार्ड सिल- प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

गर्भवतीमा कोरोना पुष्टि भएपछि भेरी अस्पतालको प्रसूति वार्ड सिल

रुपा गहतराज

नेपालगन्ज — भेरी अस्पताल नेपालगन्जमा उपचारका लागि भर्ना भएकी एक गर्भवतीमा कोरोना भाइरस पुष्टि भएपछि अस्पतालको प्रसूति वार्ड सिल गरिएको छ ।

तीन दिनअघि लिइएको स्वाबको रिपोर्ट शनिबार पोजिटिभ आएपछि प्रसूति वार्ड सिल गर्नुपरेको अस्पतालका कोरोना फोकल पर्सन डा.संकेतकुमार रिसालले बताए ।

रुकुम चौरझारी निवासी ती महिला बुधबार अस्पताल भर्ना भएकी थिइन् । बिहीबार शल्यक्रिया गरेर बच्चा निकाल्ने तयारी भइरहेका बेला अचानक उनलाई ज्वरो आएपछि कोरोना भाइरस परीक्षणका लागि थ्रोट स्वाब निकालिएको थियो । जसको रिपोर्ट शनिबार मात्र आयो ।

ती महिला अस्पतालमा बसेकाले भाइरस संक्रमण अन्यलाई समेत फैलिएको आशंका गरिएकाले प्रसूति वार्ड सेनिटाइज गर्नका लागि मात्र सिल गरिएको रिसालले बताए । ‘स्वाबको रिपोर्ट ढिला आउँदा समस्या भएको हो,’ उनले भने,‘ सिल भनेर बन्द नै गरेका छैनौं ,स्थिती सामान्य भएपछि सञ्‍चालनमा ल्याइने छ ।’

उनलाई नेपालगन्ज शिक्षण अस्पताल कोहलपुर लगिएको छ । शिक्षण अस्पताल कोहलपुर कोभिड-३ लेभलको अस्पताल हो ।

प्रकाशित : श्रावण २४, २०७७ १८:१९
प्रतिक्रिया
पठाउनुहोस्

सरकारविरुद्ध साझाको 'प्रतिस्थापन कला विद्रोह' [तस्बिरहरु]

तस्बिर : सन्जोग मानन्धर

काठमाडौँ — सरकारले नागरिकप्रतिको दायित्व पूरा नगरेको भन्दै साझा पार्टीले फरक शैलीमा विरोध जनाएको छ । उपत्यका विशेष साझा अभियानले शनिबार पाटन दरबार स्क्वायरमा '३६५ दिन नै गाईजात्रा : प्रतिस्थापन कला विद्रोह' आयोजना गरेको हो ।

विपदमा राज्य नागरिकप्रतिको दायित्वबाट बिमुख हुँदै गएको र उल्टै भ्रष्टाचार झांगिएकाले त्यस विषयमा सरकारलाई झकझक्याउने प्रयास स्वरुप कार्यक्रम राखिएको साझाका सहप्रवक्ता शरदराज पाठकले बताए । उनले विपद्‍ व्यवस्थापन, भ्रष्टाचार रोकथाम, विभिन्न घटनामा पीडितलाई न्याय दिलाउने लगायतका काम गर्न सरकार लगभग असफल भएको आरोप लगाए ।

साझाका केन्द्रीय सदस्य प्रकाशचन्द्र परियारले कोरोना महामारीको बीचमा पनि प्रतिस्थापन कला विद्रोहमार्फत सरकारलाई सन्देशमूलक खबरदारी दिने खोजिएको बताए । यति, ७० करोड काण्ड, निर्मला हत्याकाण्ड, एसिड आक्रमण, गीता ढकालका हत्यारा रञ्‍जन कोइरालालाई उन्मुक्ति, नवराज बिक हत्या लगायतका विषयमा रचनात्मक किसिमले सरकारलाई खबरदारी गरिएको जनाए । उनले विरोधका क्रममा मास्क र पन्जा अनिवार्य गराउँदै भौतिक दुरी कायम गरिएको बताए ।


प्रकाशित : श्रावण २४, २०७७ १८:१७
पूरा पढ्नुहोस्
प्रतिक्रिया
पठाउनुहोस्
×