गर्भपतन गराउँदा आमा र शिशुको मृत्यु, डाक्टर र ‘प्रेमी’ पक्राउ - प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

गर्भपतन गराउँदा आमा र शिशुको मृत्यु, डाक्टर र ‘प्रेमी’ पक्राउ 

हरि गौतम

रुकुम पूर्व — गर्भपतन गराउँदा आमा र शिशुको मृत्यु भएपछि गर्भपतनमा संलग्न डाक्टरसहित अर्का एकजना पक्राउ परेका छन् । सिस्ने गाउँपालिका–६ को रुक्मिणी अस्पतालमा कार्यरत झापा भद्रपुर नगरपालिका घर भएका डक्टर रुपेशकुमार सिंह र ती महिलाका प्रेमी भनिएका सिस्ने गाउँपालिका–४ दादिङका गणेश घर्ती पक्राउ परेका छन् । 

साउन २० गते राति सवा ८ बजे २६ वर्षीया पुष्पा घर्तीको गर्भपतन गराउँदा उनको र पेटमा रहेको २२ हप्ताको बच्चाको मृत्यु भएको थियो । डाक्टरले गर्भपतन गराउँदा अत्यधिक रक्तश्राव भएर महिलाको मृत्यु भएको प्रहरीले जनाएको छ । पुष्पासँगै उनको पेटमा रहेको बच्चासमेतको मृत्यु भएपछि उनीहरुलाई पक्राउ गरिएको जिल्ला प्रहरी प्रमुख प्रहरी नायब उपरीक्षक गजुसिद्धि बज्राचार्यले जानकारी दिए ।

गर्भपतन गराउने डाक्टरसहित पुष्पाका प्रेमी भनेर गर्भपतन गराउन लिएर गएका गणेशसमेत पक्राउ परेको डिएसपी बज्राचार्यले बताए । उनीहरुविरुद्ध ज्यान मार्ने उद्योगमा मुद्दा दायर भएको छ । रुकुमकोट जिल्ला अदालतबाट म्याद थप गरेर अनुसन्धान अघि बढाइएको प्रहरीले जनाएको छ ।

रुकुम पश्चिमको मुसीकोट नगरपालिका–८ माइती भएकी पुष्पाको बिहे भने रुकुम पश्चिमकै सानीभेरी गाउँपालिकामा भएको बताइएको छ । उनी दुई छोरीका साथ रुकुमकोटमा बस्दै आएकी थिइन् । यसअघि पनि उक्त अस्पतालले लापरबाही गरेको खबर सार्वजनिक भएको थियो । उक्त अस्पतालले बिना जाँच र हाइ डोजको औषधि दिने गरेको गुनासो जिल्लाभर छ ।

प्रकाशित : श्रावण २२, २०७७ १८:३१
प्रतिक्रिया
पठाउनुहोस्

संकल्प प्रस्ताव बहुमतले अस्वीकृत

प्रतीक्षा काफ्ले

गण्डकी — एक घर, एक पीसीआर नभए, एकलाख ५० हजार जनाको पीसीआर गर्नुपर्ने मागसहित गण्डकी प्रदेशसभामा प्रमुख प्रतिपक्ष कांग्रेसले पेश गरेको संकल्प प्रस्ताव बहुमतले अस्वीकृत भएको छ ।

कांग्रेस सांसद कुमार खड्का, कांग्रेस संसदीय दलका उपनेता मेखलाल श्रेष्ठ र सांसद सरिता गुरुङले असार २३ मा प्रस्ताव दर्ता गरेका थिए ।

संकल्प प्रस्तावमाथि छलफल नभएको भन्दै कांग्रेसले साउन १२ को प्रदेशसभा बैठक अवरुद्ध गरेको थियो । त्यसपछि बिहीबार बैठक सञ्चालन भएको हो । साउन ५ को बैठकमा कार्यसूचीमा संकल्प प्रस्ताव समावेश भएको भएपनि छलफल हुन भने सकेको थिएन । संकल्प प्रस्ताव अघि नबढाएसम्म संसदमा कुनै पनि विधेयक अघि नबढाउने कांग्रेसले अडान लिएको थियो ।

सांसद श्रेष्ठले पीसीआर परीक्षण जनताको लागि माग गरिएको बताउँदै भने, ‘हामीले चाहेको पनि यही हो । अस्वीकृत हुन्छ भन्ने थाहा थियो । नेकपाको बहुमतको सरकार छ कांग्रेस प्रतिपक्षमा छ । प्रतिपक्षको माग कसरी पुरा हुन्छ र ? यसतर्फ सरकार उत्तरदायी देखिएन ।’ जनताको नैसर्गिक अधिकारप्रति पनि सरकार अनुतरदायी देखिएको उनले बताए ।

विश्व स्वास्थ्य संगठन र नेपाल सरकारले तय गरेको मापदण्ड अनुसारको क्वारेन्टाइनको व्यवस्था तत्काल मिलाउन, स्वास्थ्य जनशक्ति भेन्टिलेटर लगायतका आवश्यक स्वास्थ्य उपकरणयुक्त आईसीयू र आइसोलेसन कक्षको व्यवस्था निर्माण गर्न, कोरोनाको कारण मृत्यु हुनेको शव व्यवस्थापन गर्न गण्डकीका ११ वटै जिल्लामा स्थान तत्काल व्यवस्था गर्ने माग राख्दै संकल्प प्रस्ताव पेश गरेको खड्काले बताए ।

प्रकाशित : श्रावण २२, २०७७ १८:११
पूरा पढ्नुहोस्
प्रतिक्रिया
पठाउनुहोस्
×