पहिरोले गुल्मीमा ८ घरपरिवार विस्थापित

वीरेन्द्र केसी

अर्घाखाँची — गुल्मीको रुरुक्षेत्र गाउँपालिका–५ आँटीपाटा गाउँका ८ घरपरिवार पहिरोका कारण विस्थापित भएका छन् । माथिबाट पहिरोसहित बगेर आएको ठूलो ढुंगाले शुक्रबार बेलुका स्थानीय राजु माझीको घर बगाउँदा उनकी ३० वर्षीय श्रीमती विना, १० वर्षीय छोरा सागर, ७ वर्षीय छोरा हेमन्त र १० महिनाकी छोरी छोरी विनिताको घटनास्थलमै निधन भएको थियो । 

बस्तीमाथिको पहाड र मोटरबाटो भएकाले पानी पर्दा पहिरो खस्ने डरले ८ घरका ३७ जनाले बस्ती छाडेका वडाध्यक्ष हरिप्रसाद ज्ञवालीले बताए । शुक्रवार दिनभर परेको अविरल वर्षाका कारण पहिरो गएको थियो । वडाध्यक्ष ज्ञवालीले भने, 'बस्ती माथिको पहाड चर्किएर चिरैचिरा परेको छ, जतिबेला पनि पहिरो खस्ने डर भएकाले उनीहरुलाई स्थानीय जनजागरण आधारभूत विद्यालयका कक्षाकोठामा राखेका छौं ।' उनका अनुसार स्थानीय प्रेमबहादुर थापा, विष्णु माझी, तिलक माझी, लोपबहादुर बोटे माझी, भूपाल माझी, हिमाल माझी, चुनमता माझी र किसन माझीका परिवारलाई स्कुलमा राखिएको उनले बताए । घरमाथि ठूलो पहाड छ, धेरै ठाउँ चर्किएर चिरा परेको छ, पानी पर्दा जतिबेला पनि पहिरो जान सक्ने भएकाले घर छाडेर ज्यान जोगाउन स्कुलमा आएको प्रेमबहादुर थापाले बताए ।

उनीहरुलाई खानेबस्ने व्यवस्था गाउँपालिकाले गरेको छ । वर्षाका कारण सड्क अवरुद्ध भएकाले घटनास्थलमा गुल्मी प्रशासन, दलका नेता र जनप्रतिनिधिको टोली शनिबारमात्रै आएको छ ।

प्रकाशित : श्रावण १७, २०७७ १७:२३
प्रतिक्रिया
पठाउनुहोस्

स्याला पहिरोमा घाइते भएकी महिलाको मृत्यु

हरि गौतम

रुकुम पश्चिम — स्यालामा आएको पहिरोले घरसँगै बगाउँदा घाइते भएकी महिलाको शनिबार उपचारको क्रममा मृत्यु भएको छ । बाँफिकोट गाउँपालिका–९ स्यालाकी ६० वर्षीय झुपि कामीको बाँकेको कोहलपुरस्थित शिक्षण अस्पतालमा मृत्यु भएको हो ।

साउन १३ गते बिहान घरमाथिबाट आएको पहिराले घर बगाउँदा उनीसहित ४ जना घाइते भएका थिए भने २ जनाको मृत्यु भएको थियो । पहिरोले बगाउँदा झुपिका कान्छा छोरा २२ वर्षीय नविन कामी र छिमेकी हस्तबहादुर सुनारका १६ वर्षीय छोरा बलबहादुरको मृत्यु भएको थियो ।

पहिरोमा परि झुपिकै २२ वर्षीया बुहारी व्युझना कामी, व्युझनाका ५ वर्षीया र ३ वर्षीया छोरी घाइते थिए । व्युझना र उनका २ छोरीको अवस्था भने सामान्य छ । १३ गते बिहान ४ बजे आएको पहिरोले झुपिको घर बगाएको थियो । घरसँगै बगेका नविन र बलबहादुरको शव भेटिएको थियो भने झुपिलाई घाइते अवस्थामा स्थानीयले उद्धार गरेका थिए । व्युझना र उनकी २ छोरी पहिरो छिचोलेर भाग्न सफल भएका थिए ।

प्रकाशित : श्रावण १७, २०७७ १७:१२
पूरा पढ्नुहोस्
प्रतिक्रिया
पठाउनुहोस्
×