पहिरोले सिद्धार्थ राजमार्ग भासियो- प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

पहिरोले सिद्धार्थ राजमार्ग भासियो

माधव अर्याल

पाल्पा — सिद्धार्थ राजमार्गको पक्की सडक भासिने गरी तिनाउ–३, दोभान नजिकै पहिरो खस्दा यातायात अवरुद्ध भएको छ । दोभान बजारदेखि ५ सय मिटर अगाडि नागमन्दिर नजिकै झण्डै ३ मिटर पक्की सडकको जग नै भासिने गरी पहिरो खसेको दोभान प्रहरी चौकी प्रमुख सोमबहादुर सारुले बताए ।

उनका अनुसार रातभरको वर्षाले सिद्धार्थ राजमार्गको पाल्पा–बुटवल सडकखण्डको ठाउँठाउँमा पहिरो खस्दा यातायात अवरुद्ध भएको छ । माथिल्लो सिद्धबाबा नजिकको खोल्सामा पनि माथिल्लो भागबाट ठूला ढुंगा खसेको छ । चिडियाखोलातर्फ र दोभानतर्फबाट सडक खुलाउने प्रयास भइरहेको उनले बताए ।

तिनाउ गाउँपालिका–३, झुम्सा पानीमिल, दोभानको नाग मन्दिर र माथिल्लो सिद्धबाबा नजिक पहिरो खसेको र पन्छाउने प्रयास भइरहेको जिल्ला प्रहरी कार्यालयका प्रहरी नायब उपरीक्षक मदन गिरीले बताए । पहिरो पन्छाउने क्रम जारी रहे पनि वर्षा नरोकिएकाले समस्या भएको छ ।

सडकमा पहिरो खसेपछि पाल्पाबाट बुटवल साथै बुटवलबाट पाल्पा स्याङ्जा, गुल्मी, कास्की, बागलुङ, पर्वत र म्याग्दीतर्फ हिँडेबम सवारी साधनहरु बाटोमै रोकिएका छन् । सडक डिभिजनको समन्वयमा पहिरो खुलाउन प्रयास गरिएको प्रहरीले जनाएको छ । वर्षासँगै खसेको पहिरोले ग्रामीण सडकहरू पनि अवरूद्ध भएका छन् ।


प्रकाशित : श्रावण १२, २०७७ ०९:२२
प्रतिक्रिया
पठाउनुहोस्

खोलाले बगाउँदा पाल्पामा एक जनाको मृत्यु 

कान्तिपुर संवाददाता

पाल्पा — माथागढी गाउँपालिका–२, चिदीपानीमा खोलाले बगाएर ५३ वर्षीय हर्कबहादुर सारुको आइतबार मृत्यु भएको छ । बधवाँरीमा तिनाउ खोला तर्ने क्रममा ५३ वर्षीय सारुको मृत्यु भएको प्रहरी निरीक्षक सुरज श्रेष्ठले बताए ।

वर्षासँगै खोला बढेको र खोला तर्ने क्रममा बगाएर दुई सय ५० मिटर तल लगेको प्रहरीले जनाएको छ । जिल्लामा यस वर्ष खोलाले बगाएर ४ जना र पहिरोमा पुरिएर ४ जना गरी ८ जनाको मृत्यु भइसकेको छ ।

प्रकाशित : श्रावण १२, २०७७ ०९:१४
पूरा पढ्नुहोस्
प्रतिक्रिया
पठाउनुहोस्
×