कान्तिपुर वेबसाईट
AdvertisementAdvertisement

बजार क्षेत्रको अतिक्रमण हटाउन कपिलवस्तु नगरपालिकाले तोक्यो समयसीमा

मनोज पौडेल

कपिलवस्तु — कपिलवस्तु नगरपालिकाले अतिक्रमण गरी बनाइएका बजार क्षेत्रका संरचना हटाउन साउन २ गतेसम्मको समयसीमा दिएको छ । सडक चौडा बनाउनका लागि त्यस्ता संरचना हटाउन नगरपालिकाले सूचना जारी गरेको हो । हुलाकी सडक आयोजनाअन्तर्गत पूर्वको जमुवार खोलादेखि भवानी भिक्षु चोकसम्म सडक चौडा गरिने कार्यक्रम छ । 

साउन २ गतेबाट सडक पुनर्निर्माण गर्न लागिएको भन्दै दायाँ र बायाँ १५/१५ मिटरभित्र पर्ने संरचना हटाउन आग्रह गरिएको हो । सदरमुकाम तौलिहवाको पूर्वी प्रवेशद्वार जमुवार टोलबाट प्रशासन कार्यालय चोक–नयाँटोल–गौढी चोक हुँदै भवानी भिक्षु चोकसम्म संरचना हटाउनु पर्ने छ । ‘गत असार २५ मा प्रशासन कार्यालयमा भएको सर्वदलीय र सर्वपक्षीय बैठकमा निर्णय भयो,’ कपिलवस्तु नगरपालिकाका मेयर किरण सिंहले भने, ‘त्यसैका आधारमा अतिक्रमण हटाउन लागेको हो ।’

सर्वदलीय सहमतिपछि हुलाकी सडक आयोजनाका जिल्ला प्रमुख ईश्वरबहादुर रिजालले समेत सूचना जारी गरेर अतिक्रमण हटाउन आग्रह गरेका छन् ।

गत कार्तिक २९ गते नै हुलाकी सडक आयोजना निर्माण सम्झौता भइसकेको छ । तर अतिक्रमण नहट्दा पुनर्निर्माणका काम सुरु हुन सकेको छैन । ‘सुरुमा सूचना कार्यान्वयन गर्न अनुनयविनय गरेका छौं,’ आयोजनाका जिल्ला प्रमुख रिजालले भने, ‘अटेर गरे सडक ऐन २०३१ अनुसार अतिक्रमण आफैं हटाएर भत्काउन लाग्ने ज्यालासमेत सम्बन्धित पक्षबाटै असुल गर्छौं ।’

हुलाकी सडकअन्तर्गत जमुहार टोलदेखि छोटकी तौलिहवासम्मको बजार क्षेत्रमा २ हजार ३ सय ४० मिटरसम्म २ लेनको सडक निर्माण गर्ने योजना छ । सडकको बीचमा बगैंचा, दायाँबायाँ नाली, फुटपाथसमेत बनाइने छ ।

०७२ मा सडक डिभिजनले ५८३ वटा घरटहरा भत्काउनु पर्ने प्रतिवेदन बनाएको थियो । त्यसमध्ये ८७ जनाको पुरै घर जाने उल्लेख छ । उनीहरुलाई नगरपालिकाले ५/५ धुरका दरले जग्गासमेत प्रदान गर्ने जनाएको छ ।

हुलाकी सडकअन्तर्गत ५ सडक खण्ड तथा ४ वटा पुल निर्माणका लागि कुल ३ अर्ब ४६ करोड २ लाखका सम्झौता भईसकेको छ । सबै काम ०७९ पुसभित्र सम्पन्न गर्ने समयावधि तोकिएको छ ।

अतिक्रमण गरी बनाइएका संरचना हटाउन लागिएको भनदै दैनिक जसो विरोध कार्यक्रम भइरहेको छ ।

प्रकाशित : असार ३०, २०७७ १७:३३
प्रतिक्रिया
पठाउनुहोस्

प्रधानमन्त्रीलाई कांग्रेस प्रवक्ताको सुझाव: 'अयोध्या' होइन, कोरोना र कालापानीमा ध्यान दिउँ

कान्तिपुर संवाददाता

काठमाडौँ — कांग्रेस प्रवक्ता विश्वप्रकाश शर्माले प्रधानमन्त्री केपी शर्मा ओलीलाई 'अयोध्या' तिर ध्यान नमोडी कोरोना र कालापानीमा ध्यान दिन सुझाव दिएका छन् । शर्माले ट्विट गर्दै भनेका छन्- 'प्रधानमन्त्रीको तत्कालीन दुई कर्तव्य- कोरोना र कालापानी !' उनले संसदबाट पारित नक्सामा हक कायम गर्न गम्भीर कुटनैतिक पहल थाल्न पनि सरकारलाई सुझाव दिएका छन् । 

भानुजयन्तीको अवसरमा सोमबार आयोजित कार्यक्रममा प्रधानमन्त्री ओलीले राम जन्मिएको अयोध्या नेपालमै भएको र भारतले सांस्कृतिक अतिक्रमण गरि विवाद खडा गरेको बताएका थिए । उनले 'अयोध्या भारतमा नभइ वीरगञ्जदेखि पारी ठोरीमा भएको' बताएपछि सामाजिक संजालमा यसले तीव्र प्रतिक्रिया बटुलिरहेको छ । सत्तारुढ र विपक्षी दलका नेताहरुले समेत यसमा प्रतिक्रिया दिइरहेका छन् । भारतीय मिडियाले पनि यो समाचारलाई प्रसारण गरेका छन् ।

यसतर्फ लक्ष्यित गर्दै प्रवक्ता शर्माले 'अयोध्या' तिर ध्यान नमोड्न आग्रह गरेका छन् । उनको ट्विटमा भनिएको छ- १) हृदयमा छँदैछन् `राम', चिन्ता राजु सदाहरुको गरौं ! २) `अयोध्या´तिर ध्यान नमोडौं, संसदबाट पारित नक्सामा हक कायम गर्न गम्भीर कुटनैतिक पहल थालौं !'

उनले सम्झाउने कर्तव्य आफ्नो भएको र बुझाउने जिम्मेवारी नेकपाको भएको पनि बताएका छन् ।

प्रकाशित : असार ३०, २०७७ १७:१७
पूरा पढ्नुहोस्
प्रतिक्रिया
पठाउनुहोस्
×