टिपरले ठक्कर दिँदा नेपालगन्जमा एक साइकलयात्रीको मृत्यु

रुपा गहतराज

नेपालगन्ज — टिपरले ठक्कर दिँदा नेपालगन्जका एक वृद्धको ज्यान गएको छ । दुर्घटनामा गम्भीर घाइते भएका नेपालगन्ज उपमहानगरपालिका–११ भट्टीटोलका ६० वर्षीय साइकलयात्री बुद्धबहादुर लखेरको उपचारका क्रममा ज्यान गएको हो ।

आइतबार बेलुका धम्बोझीबाट खजुरातर्फ जाँदै गरेको भे१ख ३००३ नम्बरको टिपरले नेपालगन्ज उपमहानगरपालिका १– नन्दनी मिल नजिकै साइकलमा हिँडिरहेका लखेरलाई ठक्कर दिएको थियो ।

दुर्घटनालगत्तै लखेरलाई उपचारका लागि नेपालगन्ज शिक्षण अस्पताल लगिए पनि चिकित्सकले उनलाई मृत घोषित गरेका थिए । साइकल यात्रीलाई ठक्कर दिने टिपर र टिपर चालकलाई नियन्त्रणमा लिएर आवश्यक कारबाही प्रक्रिया अगाडि बढाइएको जिल्ला प्रहरी कार्यालय बाँकेका डीएसपी सुवास खडकाले बताए ।

प्रकाशित : असार २९, २०७७ ०६:१८
प्रतिक्रिया
पठाउनुहोस्

म्याग्दीको पहिरोमा बेपत्ता थप एकको शव फेला

रासस

काठमाडौँ — म्याग्दीको धवलागिरि गाउँपालिका–६ मराङमा तीन दिनअघिको पहिरोमा हराइरहेका थप एक जनाको शव भेटिएको छ ।

मराङको कुम्रीका खिमबहादुर जुग्जालीको शव भेटिएसँगै म्याग्दीको धवलागिरि, मालिका र रघुगङ्गा गाउँपालिकामा शुक्रबारको पहिरोमा परिएर मृत्यु हुनेको संख्या २८ जना पुगेको प्रहरी नायब उपरीक्षक किरनजंग कुँवरले जानकारी दिए ।

प्रहरीका अनुसार बेपत्ता भएका तीन जना जीवितै सम्पर्कमा आएका छन । चार जना अझै बेपत्ता छन् । मराङका १९, मालिका–७ बिमका आठ र रघुगङ्गा–६ ठाडाखानीका एक जनाको शव भेटिएको छ ।

पहिरोले पुरिएका मालिका–७ बिमकी एलिसा केसी, धवलागिरि–६ कल्लेनीकी जनिमा केसी, सबिन पुन र दुखुखोलामा बेपत्ता भएकी मालिका–६ की गीता रोका भेटिएका छैनन् ।

प्रहरीका अनुसार पहिराको जोखिममा रहेका धवलागिरि गाउँपालिकाका ५९०, मालिकाका १९६, रघुगङ्गाका ८५ र बेनी नगरपालिकाका २५ जनालाई सुरक्षित ठाउँमा सारिएको छ ।

पहिरोमा घाइते भएका १२ जनाको हेलिकप्टरबाट उद्धार गरिएकामा सात जनाको बेनी अस्पताल, एक जनाको काठमाडौँ र चार जनाको मणिपाल शिक्षण अस्पताल पोखरामा उपचार भइरहेको छ ।

प्रकाशित : असार २८, २०७७ २२:२२
पूरा पढ्नुहोस्
प्रतिक्रिया
पठाउनुहोस्
×