अतिक्रमण हटाउन गएको बर्दिया निकुञ्जको टोली र स्थानीयबीच झडप

बर्दिया राष्ट्रिय निकुञ्जले सरकारी जग्गा अतिक्रमण गरेर बनाइएको भन्दै ५४ वटा घर हटाउने तयारी गरेको छ । स्थानीयले भने आफूहरू वर्षौंदेखि त्यहीँ बस्दै आएकाले नहट्ने अडान लिएका छन् ।

स्थानीय र निकुञ्जको टोलीबीच अहिले पनि झडप जारी रहेको वडाध्यक्ष राधा चौधरीले बताइन् । ‘निकुञ्जले हरेक दिन स्थानीयलाई पक्रेर लैजाने र सादा कागजमा सही गराउने गर्थ्यो,’ उनले भनिन्, ‘आज पनि दुई जनालाई पक्रेर लैजान खोजेपछि झडप भएको हो ।’

निकुञ्जका वार्डेन अणनाथ बरालले भने अतिक्रमित बस्ती भएकाले हटाउन कर्मचारी खटाइएको बताए । ‘बस्ती खालि गरेरै छाड्छौं,’ उनले भने ।