बर्दघाटको क्वारेन्टाइनमा बसेका एक जनाको मृत्यु

नवीन पौडेल

परासी — पश्चिम नवलपरासीको बर्दघाटमा क्वारेन्टाइनमा रहेका एक व्यक्तिको उपचारको क्रममा मृत्यु भएको छ । बर्दघाट नगरपालिका–२ का ४५ वर्षीय पुरुषको बुटवलस्थित लुम्बिनी प्रादेशिक अस्पतालमा उपचारको क्रममा मृत्यु भएको हो ।

शनिबार बेलुका स्वास्थ्यमा समस्या आएर अस्पतालमा भर्ना भएको र उपचारका क्रममा आइतबार बिहान मृत्यु भएको लुम्बिनी प्रादेशिक अस्पताल बुटवलका फोकल पर्सन डा. सुदर्शन थापाले बताए ।

दिव्यज्योति क्याम्पस चिसापानीमा रहेको क्वारेन्टाइनमा रहेका ती व्यक्ति दुई दिन अगाडि मात्रै भारतको मुम्बईबाट आएका थिए । शनिबार राति स्वास्थ्यमा समस्या आएपछि उपचारको लागि बुटवल लगिएको बर्दघाट नगरपालिकाका मेयर धिरज शर्मा बस्यालले बताए ।

मृतक पुरुषलाई ब्लड प्रेसरको समस्या रहेको बताइएको छ । मृतकको स्वाब संकलन गरेर कोरोना भाइरस संक्रमण भएको हो होइन परीक्षण गरिँदै छ ।

प्रकाशित : असार १४, २०७७ ११:४६
प्रतिक्रिया
पठाउनुहोस्

चट्याङ लागेर उदयपुरमा युवकको मृत्यु

डिल्लीराम खतिवडा

उदयपुर — चौदण्डीगढी नगरपालिका– ५ खोरिया बस्तीका एक युवकको चट्याङले लागेर मृत्यु भएको छ । शनिबार चट्याङ लाग्दा बेहोस भइ उपचार गराइरहेका स्थानीय  १८ वर्षीय दिपेश मगरको बिहान  मृत्यु भएको हो । 


शनिबार दिउँसो खेतमा काम गरिरहेको अवस्थामा नजिकै परेको चट्याङको आवाजले मगर बेहोस भएको जिल्ला प्रहरी कार्यालय उदयपुरका सूचना अधिकारी प्रहरी नायब उपरिक्षक गोविन्द पुरीले बताए । बेहोस मगरलाई उपचारको लागि धरानको वीपी कोइराला स्वास्थ्य विज्ञान प्रतिष्ठान लगिएकोमा उपचारको क्रममा मृत्यु भएको प्रहरी नायब उपरिक्षक पुरीले बताए ।

चट्याङले लागेरै ४ दिन अघिपनि त्रियुगा नगरपालिका– १३ असारीका ४५ वर्षीय कानन चौधरीको मृत्यु भएको थियो भने दुई महिला घाइते भएका थिए । घाइते उपचारपछि घर फर्किएको प्रहरी नायब उपरिक्षक पुरीले बताए ।

प्रकाशित : असार १४, २०७७ ११:३८
पूरा पढ्नुहोस्
प्रतिक्रिया
पठाउनुहोस्
×