प्रदेश ५ का क्‍वारेन्टाइनहरुमा चाप घट्दै - प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

प्रदेश ५ का क्‍वारेन्टाइनहरुमा चाप घट्दै 

अमृता अनमोल

बुटवल — भारतबाट आउने नेपाली नागरिकहरुको संख्या कम हुँदै गएपछि प्रदेश ५ का क्‍वारेन्टाइनहरुमा चाप घट्दै गएको छ । सोमबार दिउँसोसम्म यहाँका क्‍वारेन्टाइनमा २१ हजार ७ सय २६ जना रहेको  प्रदेशको सामाजिक विकास मन्त्रालयको तथ्यांक छ ।

२ साताअघि ४२ हजार व्यक्तिहरु यहाँका क्‍वारेन्टाइनहरुमा थिए । प्रदेशको सामाजिक विकास मन्त्रालयका सामाजिक महाशाखा प्रमुख उमाशंकर चौधरीले भने, ‘अहिले विस्तारै मानिसहरुको संख्या घट्दै र क्वारेन्टाइनहरु खुकुला हुँदै गएका छन् ।’

प्रदेशका १२ जिल्लामा गरी एक हजार ७ सय ९७ क्वारेन्टाइन छन् । तिनमा ६१ हजार सात सय १७ जनाको बेड क्षमता छ । जिल्लागत रुपमा सबैभन्दा धेरै कपिलवस्तुमा १० हजार तीन सय १० र दाङमा १० हजार २ सय ५५ बेड क्षमताका क्वारेन्टाइन छन् । हाल प्रदेशका दुईतिहाई क्वारेन्टाइन खाली छन् ।

प्रदेशमा सबैभन्दा धेरै दाङमा चार हजार दुई सय ८० जना छन् । यसपछि गुल्मीमा तीन हजार तीन सय ३९ जना क्वारेन्टाइनमा छन् । प्युठानमा दुई हजार पाँच सय दुई, पाल्पामा दुई हजार तीन सय दुई,बर्दियामा दुई हजार ६५ र अर्घाखाँचीमा दुई हजार दुई जना क्वारेन्टाइनमा छन् । यस्तै बांकेमा एक हजार ६ सय ११, रुपन्देहीमा एक हजार एक सय १९, कपिलवस्तु आठ सय ४९, नवलपरासी पश्चिम सात सय ३५, रोल्पा ५ सय ८२ र रुकुम पूर्व एक सय ४० जना छन् ।

क्वारेन्टाइनमा बस्ने व्यक्ति घट्दै गएपछि पछिल्लो समय भौतिक सुविधा भएका क्वारेन्टाइनलाई नै आइसोलेसन सेन्टर बनाउन थालिएको छ । प्रदेशमा ९८ वटा आइसोलेसन सेन्टर छन् । प्रदेशमा सोमबार दिउँसोसम्म दुई हजार चार सय ८३ जनामा संक्रमण देखिएको छ ।

प्रकाशित : असार ८, २०७७ १६:०५
प्रतिक्रिया
पठाउनुहोस्

संक्रमण मुक्त भएपछि दुबोको माला लगाएर विदाई

राजकुमार कार्की

सिन्धुली — सिन्धुली अस्पतालबाट तीनजना पुरुष कोरोना भाइरसको संक्रमणबाट मुक्त भएपछि सोमबार घर फर्किएका छन् । २२ दिनसम्म आइसोलेसन कक्षमा रहेका उनीहरुको पीसीआर परीक्षण नतिजा निगेटिभ आएपछि सिन्धुली अस्पतालले बिदाइ गरेको अस्पताल व्यवस्थापक विमल श्रेष्ठले बताए ।

आइसोलेसन कक्षमा रहेको १४ दिनसम्म कुनै लक्षण नदेखिएपछि अस्पतालले स्वाब परिक्षण नगरी घर पठाउन खोज्दा स्थानीयको विरोधपछि उनीहरु रोकिएका थिए ।

वाग्मती प्रदेश किटजन्य प्रयोगशालामा गरिएको पीसीआर परिक्षणमा नतिजा निगेटिभ आएपछि उनीहरुलाई सिन्धुली अस्पतालले विदाई गरेको हो । तीनै जनालाई अस्पतालमा कार्यरत नर्स, अनमी, अन्य महिला कर्मचारीले तयार गरेको दुबोको माला लगाएर विदाई गरिएको थियो ।

संक्रमित हुँदाको व्यवहार र अस्पताल कर्मचारीहरुले गरेको हेरचाहले लक्षण नै नदेखिई कोरोना भाइरस मुक्त हुन सफल भएको उनीहरुले प्रतिक्रिया दिएका छन् । तीनैजनालाइ घरसम्म पुग्नका लागि जिल्ला विपद् व्यवस्थापन समितिले यातायातको व्यवस्था समेत गरिदिएको छ ।

प्रजिअ एवं विपद् व्यवस्थापन समितिका अध्यक्ष योगेन्द्र पाण्डेले कोरोना मुक्त भएर घर फर्किएका तीनैजनालाई समाजमा सचेतना फैलाउन र आफ्ना अनुभव सुनाउन सुझाएका छन् । कोरोना भाइरस संक्रमण फैलन नदिन र संक्रमितको मनोबल बढाउन कोरोना संक्रमण मुक्त हुनेहरुको अनुभव सहायक सिद्ध हुने उनको भनाइ थियो ।

तीनजनालाई घर पठाएपछि सिन्धुलीमा कोरोना भाइरस संक्रमित निको हुनेको संख्या चार भएको छ भने कमलामाइ नगरपालिका–१० कै एकजना पुरुष संक्रमित मात्र अस्पतालको आइसोलेसनमा उपचाररत रहेका छन् । उनमा पनि कोरोना भाइरसको कुनै लक्षण नदेखिएकाले चाँडै घर फर्किने अस्पताल व्यवस्थापक श्रेष्ठले विश्वास व्यक्त गरे । यस अघि सिन्धुलीको भिमानकी संक्रमित महिला कोरोना संक्रमण मुक्त भएर घर फर्किसकेकी छिन् ।



प्रकाशित : असार ८, २०७७ १६:०२
पूरा पढ्नुहोस्
प्रतिक्रिया
पठाउनुहोस्
×