२९.१२°C काठमाडौं
तिनाउ खोला किनारमा बालकको शव फेला
तिलोत्तमा — रुपन्देहीको बुटवलमा ८ वर्षीय बालकको शव फेला परेको छ । बुटवल ११ प्रगतिनगर बस्ने वर्ष ८ का राजेश परियार तिलोत्तमा ४ को तिनाउ खोला किनारमा शुक्रबार बिहान झण्डै ८ बजे गाडिएको अवस्थामा भेटिएका हुन् । बालकको मृत्यु शंकास्पद बनेको छ ।
बाबु र सौतेनी आमासँग बस्दै आएका उनी बिरामी परेका थिए । बिहान बालकका बाबु राजु परियारले रिक्सामा राखेर लगेको र अस्पताल नपुर्याइ खोला किनारमा जिउँदै गाडिदिएको गाउँलेले आरोप लगाएका छन् । प्रहरी घटनास्थल पुग्दा बाबुले जिउँदै गाडेको भनी उनलाई कुटपिट गर्न थालेपछि आफूहरुले नियन्त्रणमा लिएको ईलाका प्रहरी कार्यालय बुटवलका प्रहरी नायव उपरीक्षक प्रतीतसिंह राठौरले बताए ।
'स्थानीयले लगाएको आरोप ठीक या बेठीक भन्नेबारे पोस्टमार्टम रिपोर्ट आएपछि मात्र जानकारी हुन्छ,' उनले भने । मृत बालकका बाबुले भने अस्पताल लगेको र मृत्यु भएपछि ल्याएर गाडेको बताएका छन् । शव पोस्टमार्टमका लागि लुम्बिनी प्रादेशिक अस्पतालमा राखिएको छ ।
प्रकाशित : असार ५, २०७७ १६:०५
