टिपरबाट खस्दा सहचालकको मृत्यु- प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

टिपरबाट खस्दा सहचालकको मृत्यु

हरि गौतम

रुकुमपूर्व — टिपरबाट खस्दा एक जनाको मृत्यु भएको छ । सिस्ने गाउँपालिका–३, मा इँटा बोकेको टिपरबाट खस्दा रोल्पाको रुन्टीगढी गाउँपालिका–६ का अन्दाजी १८ वर्षीय चन्द्रबहादुर विकको घटनास्थलमै मृत्यु भएको हो । 

सिस्ने गाउँपालिका–४, मा बन्दै गरेको स्वास्थ्य भवनका लागि दाङबाट इँटा ल्याइरहेको रा १ ख १४३५ नम्बरको टिपरबाट शनिबार दिउँसो विक खसेका थिए । सहचालक विक टिपरलाई अघि बढ्न सजिलो बनाइदिनका लागि बिजुलीका तार र रुखका हाँगा मिलाउन छतमा उक्लेका थिए । त्यही क्रममा रुखका हाँगाले उनलाई खसाएको प्रत्यक्षदर्शीले बताएका छन् । उनी भुइँमा खसेपछि टिपरको पांग्राले किचेको थियो ।

टिपर चालक घोराही उपमहानगरपालिका दाङका ४९ वर्षीय ओमप्रकाश घर्ती मगरलाई प्रहरीले नियन्त्रणमा लिएको छ । घटनाको विषयमा थप अनुसन्धान भइरहेको जिल्ला प्रहरी कार्यालयका सूचना अधिकारी प्रहरी निरीक्षक दिनेश गुरुङले जानकारी दिए ।

प्रकाशित : जेष्ठ ३१, २०७७ १८:४६
प्रतिक्रिया
पठाउनुहोस्

झापाका १ सय ४ जना कोरोना निको भएर फर्किए

पर्वत पोर्तेल

काँकडभिट्टा — झापा १ सय ४ जना कोरोना भाइरस संक्रमित निको भएर घर फर्किएका छन् । जिल्ला स्वास्थ्य कार्यालयका अनुसार कचनकवल गाउँपालिकाका मात्रै ९४ जना घर फर्किसकेका छन् । कोरोना जितेर फर्किने अधिकांश कचनकवल, दमक, वाह्रदशी, झापा र विर्तामोड लगायत पालिकाका छन् । 

स्वास्थ्य कार्यालयका फोकल पर्सन जीवन चम्लागाईले कोरोना जितेर फर्किने सबै समाजमा घुलमिल हुन थालिसकेका छन् ।

झापाका १५ पालिकामध्ये १४ मा कोरोना संक्रमण भइसकेको छ । शनिबार ५ थपिएसँगै झापामा संक्रमितको संख्या १ सय ७४ पुगेको छ । थपिएका ५ जनामध्ये दक्षिणी गाउँपालिका गौरीगञ्जका ३, बाह्रदशीका १ र शिवसताक्षीका १ जना छन् । शिवसताक्षीमा पहिलो संक्रमण हो ।

झापामा सबभन्दा बढी कचनकवलमा १ सय २६, दमक १, बाह्रदशीमा ७, गौरीगन्ज १५ जना, गौरादहमा ४, कमल १, अर्जुनधारा २, भद्रपुर ४, झापा १, मेचीनगर २, बुद्धशान्ति ५, कनकाई ३, हल्दिवारी २ र शिवसताक्षीमा १ जना संक्रमित छन् ।

प्रकाशित : जेष्ठ ३१, २०७७ १८:३५
पूरा पढ्नुहोस्
प्रतिक्रिया
पठाउनुहोस्
×