प्रदेश ५ मा ७ हजार ८ सय स्वाब थुप्रिए- प्रदेश ५ - कान्तिपुर समाचार

प्रदेश ५ मा ७ हजार ८ सय स्वाब थुप्रिए

अमृता अनमोल

बुटवल — संक्रमण बढ्दै गएपनि प्रदेश ५ मा कोरोना संक्रमण आशंकाका व्यक्तिको स्वास्थ्य जाँचको अनुपात बढाउन सकिएको छैन । जसले गर्दा पीसीआर जाँचका लागि लिइएका स्वाब प्रयोगशालामा थुप्रिएका छन् ।

शनिबार मध्यान्हसम्म प्रदेशमा ७ हजार ७ सय ७७ स्वाब परीक्षणको पर्खाइमा छन् । तिनको नतिजा आउन कम्तीमा १० दिन लाग्ने छ । सामाजिक विकास मन्त्रालयका स्वास्थ्य महाशाखा प्रमुख डा. उमाशंकर चौधरीले प्रयोगशालाको क्षमता बढाउन नसक्दा स्वाब परीक्षणमा ढिलाइ भएको बताए । भौतिक र प्राविधिक तयारी चलीरहेकाले अब रुपन्देहीको भैरहवा र दाङमा छिटै दोब्बर क्षमताको बन्ने उनले जानकारी दिए ।

प्रदेशको सामाजिक विकास मन्त्रालयका अनुसार प्रदेशभित्रका प्रयोगशालाले नधानेपछि पहिल्लोसमय स्वाब परीक्षण गर्न काठमाडौंसँगै गण्डकी प्रदेशको पोखरा र वागती प्रदेशको हेटौंडासमेत पठाउने गरिएको छ ।

तथ्यांक अनुसार दाङको राप्ती विज्ञान प्रतिष्ठानमा ३ हजार ९ सय ५३ वटा स्वाब थुप्रिएका छन् । प्रदेश प्रयोगशाला रुपन्देहीको भैरहवामा एक हजार २ सय १३ र भेरी अस्पताल बाँकेमा एक हजार ६३ स्वाबले पालो कुरेका छन् । यस्तै, प्रदेश बाहिर काठमाडौंको राष्ट्रिय जनस्वास्थ्य प्रयोगशालामा एक हजार ३ सय ६५ र पोखरा एवं हेटौंडामा ३ सय ८३ स्वाब परीक्षणको पर्खाइमा छन् ।

कोरोना संक्रमण थाहा पाउने सबैभन्दा भरपर्दो विधि पीसीआर हो । प्रदेशमा अहिलेसम्म २७ हजार ७३ को पीसीआर जाँच भएको सामाजिक विकास मन्त्रालयको तथ्यांक छ ।

प्रकाशित : जेष्ठ ३१, २०७७ १६:४५
प्रतिक्रिया
पठाउनुहोस्

आईसीयूमा उपचाररत कोरोना संक्रमित निको भएर घर फर्किए

अमृता अनमोल

बुटवल — कोरोना संक्रमणका कारण आईसीयूको भेन्टिलेटरमा राखेर उपचार भइरहेका कपिलवस्तुका एक व्यक्ति शुक्रबार डिस्चार्ज भएका छन् । लुम्बिनी प्रादेशिक अस्पताल बुटवलको कोरोना विशेष अस्पतालमा उपचार भइरहेका कपिलवस्तुको कपिलवस्तु नगरपालिका–१२ का २२ वर्षे युवा डिस्चार्ज भएका हुन् ।

जटिल अवस्थामा उपचाररत बिरामीमध्ये निको भएका उनी देशकै पहिलो बिरामी रहेको अस्पतालका मेडिकल सुपरिटेन्डेन्ट राजेन्द्र खनालले बताए । उनलाई जेठ १४ मा अचेत अवस्थामा अस्पताल ल्याइएको थियो । उनी मधुमेहका समेत बिरामी थिए । अस्पतालमा ल्याएपछि गरिएको २ पटकको पीसीआर परीक्षणमा कोरोना नेगेटिभ आएको र मधुमेहसमेत स्थिर भएकाले डिस्चार्ज गरिएको अस्पतालका खनालले बताए ।

खनालका अनुसार अस्पतालमा ल्याएपछि उनलाई २ दिन भेन्टिलेटरमा राखिएको थियो । स्वास्थ्यमा केही सुधार आएपछि मात्र आईसीयूमा राखिएको थियो । जटिल अवस्था रहेकाले उनको उपचारमा विशेषज्ञसहित ५ जना स्वास्थ्यकर्मी खटेका थिए ।

उनी जेठ पहिलो साता भारतको मुम्बईबाट आएका थिए । त्यसलगत्तै कपिलवस्तु नगरपालिकाले सञ्चालन गरेको क्वारेन्टाइनमा बसेका थिए । त्यहाँ ज्वरो आउने र श्वासप्रश्वासमा समस्या भएपछि जेठ ८ मा जिल्ला अस्पताल तौलिहवा लगिएको थियो । त्यसैदिन उनको पीसीआरका लागि स्वाब लिइएको थियो ।

१२ गते कोरोना संक्रमण पुष्टि भएपछि अस्पतालले सिकिस्त उनलाई अन्यत्र जान भन्दै बुटवल रिफर गरेको थियो । उनी उपचारको साटो पुन: क्वारेन्टाइमा फर्काइएका थिए । स्वास्थ्य जटिल बन्दै गएपछि जेठ १४ मा उनलाई कोरोना विशेष अस्पतालमा ल्याइएको थियो ।

प्रकाशित : जेष्ठ ३०, २०७७ १५:११
पूरा पढ्नुहोस्
प्रतिक्रिया
पठाउनुहोस्
×