बुटवल कोरोना अस्पतालमा स्वास्थ्यकर्मीसहित ४ जना संक्रमित निको भए

सन्जु पौडेल

तिलोत्तमा, रुपन्देही — रुपन्देहीको बुटवलस्थित कोरोना विशेष अस्पतालबाट बुधबार थप ४ जना संक्रमित निको भएर घर फर्किएका छन् । निको हुनेहरुमा ३ जना कपिलवस्तुका र १ जना अर्घाखाँची घर भई कोरोना विशेष अस्पताल बुटवलमा कार्यरत स्वास्थ्यकर्मी रहेका छन् ।

वैशाख २९ गते अस्पताल भर्ना भएका संक्रमितको लगातार दुई पटकको रिपोर्ट नेगेटिभ आएपछि डिस्चार्ज गरिएको बुटवल धागो कारखानास्थित कोरोना विशेष अस्पतालका फोकल पसर्न तथा वरिष्ठ कन्सलटेन्ट डा. सुदर्शन थापाले बताए ।

'१८ देखि २४ वर्षसम्मका पुरुष घर फर्किनुभयो,' उनले भने, 'उहाँहरुसहित गरी अहिलेसम्म १९ जनालाई निको बनाई घर पठायौं ।' बिरामीलाई निको भएर पठाउँदा खुसी लागेको र आत्मबल बलियो राख्ने र अपनाउनुपर्ने नियममा ख्याल गरे कोरोनालाई जितिने थापाले जनाए ।

यसअघि वैशाख ३० गते रुपन्देहीका १ , जेठ १० गते कपिलवस्तुका १० र जेठ १८ गते कपिलवस्तुका ३ र रुपन्देहीका १ गरी १५ जना घर फर्केका थिए । अस्पतालमा अहिले ३० जना जनरल वार्ड र ३ जना आईसीयूमा उपचाररत रहेको थापाले बताए ।

प्रकाशित : जेष्ठ २१, २०७७ १३:०१
प्रतिक्रिया
पठाउनुहोस्

अस्पतालमा बेड नपाएपछि संक्रमित बर्थिङ सेन्टरमा

मोहन बुढाऐर

धनगढी — बेड अपुग भएपछि सेती प्रादेशिक अस्पतालले मंगलबार राति उपचारका लागि आएका पाँच जना कोरोना सक्रमितलाई फिर्ता पठाएको छ । गौरीगंगा नगरपालिकाका उनीहरूलाई गाउँकै बर्थिङ सेन्टरमा राखिएको छ ।

सेतीमा कोभिड–१९ का बिरामीका लागि तयार पारिएका २४ वटै बेड भरिभराउ भएपछि नयाँ आउनेलाई ठाउँ छैन । गौरीगंगाका मेयर भीमबहादुर देउवाले अस्पतालले फिर्ता पठाएपछि सक्रमितलाई वडा नम्बर ४ को बर्थिङ सेन्टरमा राखिएको बताए । महाकाली अस्पतालमा ६ वटा बेड खाली रहेको खबर आएकाले अब त्यता पठाउने तयारी गरिएको उनले जानकारी दिए । स्थानीय तहले बिरामी पठाए पनि अस्पताल प्रशासनले व्यवस्थापन गर्न नसक्दा समस्या परेको देउवाको भनाइ छ ।

सेती अस्पतालका मेडिकल सुपरिटेन्डेन्ट डा. हेमराज पाण्डेयले कोभिड बिरामीका लागि तयार पारिएका बेड भरिएकाले फिर्ता पठाउनुपरेको बताए । ‘अहिले सेती अस्पतालको आइसोलेसनमा २५ जना संक्रमित छन्,’ उनले भने, ‘आमा–छोरा संक्रमितलाई एउटै आइसोलेसनमा राखेका छौं ।’

प्रदेश सरकारले निर्माण गरेको ५० बेडको कोरोना अस्पताल अझै आवश्यक उपकरणसहित विभिन्न काम बाँकी रहेकाले सञ्चालनमा ल्याउन सकिएको छैन । ‘८ दिनअघि सेती अस्पताललाई कोरोना अस्पतालको भवन हस्तान्तरण गरिएको छ,’ मेसु पाण्डेयले भने, ‘तर त्यहाँ उपकरण जडान, जेनेरेटर, ग्रिल, नर्सिङ सुरक्षा कक्ष, खानेपानी, सीसीटीभीलगायत काम पूरा भएका छैनन् ।’ शुक्रबारसम्ममा कोरोना अस्पतालमा बिरामी राख्न सक्ने गरी काम थालिएको उनले जानकारी दिए ।

कैलालीकै टीकापुर अस्पतालमा आइसोलेन वार्ड तयार पारेर पछिल्ला ४ संक्रमितलाई भर्ना गरिएको छ । गौरीगंगाबाट बिरामी लगेपछि महाकाली अस्पतालका १० वार्ड पनि भरिनेछन् । तर हरेक दिन २०/२५ जनाका दरले संक्रमित थपिँदै गएकाले अस्पतालले धान्ने देखिँदैन ।

सुदूरपश्चिम स्वास्थ्य निर्देशनालयका अनुसार सेती, महाकाली, टीकापुर, ९ वटै जिल्ला अस्पताल र १५ स्वास्थ्य केन्द्रमा गरी १ सय ८० वटा आइसोलेसन वार्ड छन् । सेती अस्पतालमा ६ आईसीयू र १० भेन्टिलेटर छन् भने महाकालीमा चार आईसीयू र दुईवटा भेन्टिलेटर छन् ।

यसैबीच निर्देशनालयले अस्पतालमा बिरामीका लागि ठाउँ नपुग्ने भन्दै स्थानीय तहलाई कम्तीमा ५० शय्याको आइसोलेसन कक्ष तयार पार्न निर्देशन दिएको छ । तर गौरीगंगा नगरपालिकाका मेयर देउवा तुरुन्तै अस्पताल बनाउन नसकिने बताउँछन् ।

प्रकाशित : जेष्ठ २१, २०७७ १२:५६
पूरा पढ्नुहोस्
प्रतिक्रिया
पठाउनुहोस्
×