पाल्पामा पहिलो पटक कोरोना संक्रमण देखियो
पाल्पा — पाल्पामा पहिलो पटक कोरोना संक्रमण देखिएको छ । माथागढी गाउँपालिकाको क्वारेन्टाइनमा बसेका १८ वर्षीय पुरुष र रैनादेवी छहराको क्वारेन्टाइनमा बसेका ३८ र ४० वर्षीय पुरुष गरी ३ जनामा कोरोना पोजिटिभ देखिएको हो ।
उनीहरु हालैमात्र भारतबाट आएका हुन् । एक साता अघि तानसेन बतासेडाँडाको होल्डिङ क्वारेन्टाइनमा बसेका उनीहरुमध्ये माथागढीका संक्रमितको बतासेमै स्वाब लिएर पठाएको हो । रैनादेवी छहराको भने गाउँमै स्वाब लिइएको थियो ।
आइतबार बेलुकी प्रदेश प्रयोगशाला भैरहवामा गरिएको परीक्षणमा ३ जनामा कोरोना पुष्टि भएको स्वास्थ्य कार्यालयका निमित्त प्रमुख विश्वनाथ न्यौपानेले बताए ।
माथागढीका युवालाई सोमबार र रैनादेवीछहरामा देखिएकालाई आइतबार राति या सोमबार बिहान आइसोलेसन कक्षमा ल्याइने प्रमुख जिल्ला अधिकारी यादव सुवेदीले बताए । उनीहरुलाई तानसेनको मिसन अस्पताल नजिकै निर्माण गरेको वृद्धाश्रम भवनको आइसोलेसन कक्षमा राखिने भएको प्रजिअ सुवेदीले बताए ।
एक जना माथागढीकै र दुई जना रैनादेवी छहराको क्वारेन्टाइनमा थिए । थप कन्ट्याक्ट ट्रेसिङ लगायतका काम सुरु भइसकेको छ । जिल्लामा पहिलो पटक कोरोना भाइरस संक्रमण देखिएको हो । स्वास्थ्य कार्यालयका अनुसार अहिलेसम्म २ सय ७४ जनाको पीसीआर विधिबाट परीक्षणका लागि भैरहवा पठाएपनि २ सय ५७ जनाको परीक्षण गर्दा तीन जना पोजिटिभ देखिएको हो भने अन्य १४ वटा रिपोर्ट आउन बाँकी छ ।
प्रकाशित : जेष्ठ १८, २०७७ २१:१४