अवैध रुख काटेको आरोपमा उपभोक्ता समितिका अध्यक्षसहित ३ पक्राउ

माधव अर्याल

पाल्पा — लकडाउनको मौकामा कटान आदेशभन्दा झण्डै तेब्बर बढी काठ काटेको आरोपमा वन उपभोक्ता समितिका अध्यक्षसहित तीन जना पक्राउ परेका छन् । पक्राउ पर्ने तानसेन नगरपालिका–११ बन्दीपोखराका तिलाहार साखर सल्लेरी सामुदायिक वनका अध्यक्ष गणेशप्रसाद घिमिरे, कोषाध्यक्ष अमरबहादुर राना र काष्ठ व्यवसायी नविन घिमिरे रहेका छन् । उनीहरु जेठ १३ गते पक्राउ परेका हुन्।

उनीहरुलाई अनुसन्धानका क्रममा प्रहरी कार्यालयको हिरासतमा राखिएको डिभिजन वन कार्यालयका अनुसन्धान अधिकृत अर्जुनप्रसाद चापागाईले बताए । उनका अनुसार डिभिजन वन कार्यालयले तोकेको कटान आदेशभन्दा ३ हजार ५ सय २६ क्युफिट बढी काठ काटेको प्रारम्भिक अनुसन्धानका क्रममा पाइएको छ ।

वन कार्यालयले तिलाहार सामुदायिक वनलाई कार्ययोजना अनुसार २ हजार ७४ क्युफिट काठ काट्न आदेश दिएको रेञ्जर यमलाल पोखरेलले बताए । सामुदायिक वनले ५ हजार ६ सय क्युफिट काठ काटेर घाटगद्दीका लागि बाहिर लगेको थियो । स्थानीयका अनुसार अघिल्लो वर्ष पनि यसैगरी काठ बढी काटेपनि कुनै कारबाही भएको थिएन । सोही सामुदायिक वनका एक सदस्यका अनुसार अघिल्लो वर्ष पनि कार्यसमितिले निर्णय गरेर सोझै फर्निचरमा काठ दिएका थिए । रुख कटान गरेको स्थानभन्दा केही तल घाटगद्दी गर्ने स्थान छ ।

काटिएको स्थानभन्दा एक किलोमिटर टाढा रहेको फर्निचर र स: मिल नजिक लगेर जथाभावी राखिएको छ । अहिले त्यो काठ फर्निचरकै शोरुम, बारी, खरबारी र तानसेन तेल्घा सडक खण्डको बाटोमै लथालिङ्ग अवस्थामा राखेका छन् ।

डिभिजन वन कार्यालयका अनुसार घाटगद्दीपछि मात्र त्यसको परिमाण हेरेर लिलाम हुन्छ । पाल्पामा विभिन्न सामुदायिक वनमा कतिपय सामुदायिक वनले पदाधिकारी र कर्मचारीको मिलेमतोमा सोझै फर्निचरलाई बिक्री गर्दै आएका छन् । लकडाउनका अवधिमा जिल्लाका अधिकांश सामुदायिक वनले काठ व्यवसायीको मिलेमतोमा जथाभावी घाट गद्दी गर्ने र वन कार्यालयका कर्मचारीको मिलेमतोमा थोरैको मात्र लिलाम सूचना निकाल्ने गर्दै आएका छन् ।

डिभिजन वन कार्यालयका अनुसन्धान अधिकृत चापगाईका अनुसार २५ दिनभित्र जिल्ला सरकारी वकिल कार्यालय मार्फत अदालतमा पेश हुनेछ । अनुसन्धानका क्रममा रहेपनि उनीहरुलाई वन ऐन २०७६ अनुसार कारबाहीका लागि सिफारिस गरिने उनले बताए ।

प्रकाशित : जेष्ठ १७, २०७७ १२:२६
प्रतिक्रिया
पठाउनुहोस्

बागलुङमा भीड बढेसँगै थपिए क्वारेन्टाइन

प्रकाश बराल

बागलुङ — लकडाउनको दुई महिनासम्म खाली देखिएका बागलुङका क्वारेन्टाइन खचाखच भरिन थालेका छन् । चार सय जना अट्ने क्वारेन्टाइनले नधानेपछि सबै पालिकाले विद्यालय, सामुदायिक भवन र प्राविधिक शिक्षालयलाई पनि प्रयोगमा ल्याएका छन् ।

जेठ ५ यता भारतबाट भित्रिनेहरू बढेसँगै क्वारेन्टाइन भरिएका हुन् । शुक्रबारसम्म जिल्लाभरका १० पालिकामा गरी ५ सय १५ जना क्वारेन्टाइनमा रहेको स्वास्थ्य कार्यालयप्रमुख सुरज गुरौले बताए । ‘आएकाहरू कोही पनि घर गएका छैनन्, बरु मापदण्ड नपुगेकालाई पुर्‍याउन लगाएका छौं,’ उनले भने, ‘आएर बस्न थालेको ५ दिन कटेका सबैको स्वाब संकलनको क्रम चलिरहेको छ ।’

सबैभन्दा धेरै ढोरपाटन नगरपालिकामा १ सय ३३ र निसीखोला गाउँपालिकामा १ सय २४ जना छन् । त्यस्तै तमानखोलामा १४, ताराखोलामा १६, बडिगाडमा १ सय ७, काठेखोलामा २२ र बरेङ गाउँपालिकामा ४ जना छन् । बागलुङ नगरपालिकामा ३४, जैमिनी नगरपालिकामा १२ र गलकोट नगरपालिकामा ५० जना क्वारेन्टाइनमा बसेका छन् ।

यसअघि बागलुङ नगरपालिकाले ३ सयभन्दा बढीलाई क्वारेन्टाइन राखेकामा नेगेटिभ रिपोर्ट आएपछि घर पठाएको थियो । मापदण्ड नपुगेको टिप्पणी भएपछि पहिला बनेका क्वारेन्टाइनमा सेवासुविधा थप गरिएको छ । सातादिनमै जिल्लामा झन्डै १ सय ५० क्वारेन्टाइन थपिएका छन् । अझै भारतबाट आउने क्रम जारी रहेकाले क्वारेन्टाइन थपिएको गलकोट नगरपालिकाका प्रमुख भरत शर्मा गैरेले बताए । ‘खानेपानी, सरसफाइ, साबुन, शौचालय र खानपानको गुणस्तरमा ध्यान दिएर मात्रै क्वारेन्टाइनमा राखिएको छ,’ उनले भने, ‘यसअघि पनि भारतबाट पैदलै आएकालाई राखेर स्वास्थ्य परीक्षणपछि मात्रै घरमा पठाएका थियौं ।’ बुधबार संक्रमण पुष्टि भएकाहरुको कन्ट्याक्ट ट्रेसिङ भइसकेको गुरौले जानकारी दिए ।

सबै क्वारेन्टाइनका मानिसको स्वाब संकलनका लागि धौलागिरि अञ्चल अस्पतालका दुई टोली खटिएका छन् । उनीहरूले स्वाब संकलन गर्दै परीक्षणका लागि पोखरा पठाउने गरेका छन् ।

भारतबाट आएका मध्ये ६ जनामा कोरोना संक्रमण देखिएपछि धौलागिरि अस्पतालको आइसोलेसन कक्षमा भर्ना गरिएको छ । उनीहरूको अवस्था सामान्य रहेको मेडिकल सुपरिटेन्डेन्ट डा. शैलेन्द्र पोखरेलले बताए । ‘एक–दुई जनामा सामान्य खोकी थियो, त्यो पनि दुई दिनमा निको भइसक्यो,’ उनले भने, ‘सामान्य अवस्थामा आराम गरेर बसिरहनुभएको छ ।’

प्रकाशित : जेष्ठ १७, २०७७ १२:२३
पूरा पढ्नुहोस्
प्रतिक्रिया
पठाउनुहोस्
×