रोल्पामा भारतबाट आएका साढे ६ सय क्‍वारेन्टाइनमा

स्थानीय तहले घर फर्कन अनुमति दिएपछि रोल्पामा भारतबाट आउने बढेका छन् । बिहीबारसम्म साढे ६ सय जना गाउँ फर्केका छन् ।
काशीराम डाँगी

रोल्पा — स्थानीय तहले घर फर्कन अनुमति दिएपछि रोल्पामा भारतबाट आउने बढेका छन् । बिहीबारसम्म रोल्पामा साढे ६ सय मानिस गाउँ फर्केका छन् । 

स्थानीय प्रशासनले भारतबाट आएकालाई क्वारेन्टाइनमा बसाल्न व्यवस्था मिलाइएको जनाएको छ । स्थानीय तहसँगको समन्वयमा सबै तहमा बनाइएका क्वारेन्टाइनमा भारतबाट आएकालाई अनिवार्य कम्तीमा दुई सातासम्म बसाल्न निर्देशन दिइएको जिल्ला कोभिड संकट व्यवस्थापन समितिका संयोजकसमेत रहेका प्रमुख जिल्ला अधिकारी लक्ष्मण ढकालले बताए । उनले तीन दिनयता भारतबाट आएका ६ सय ४७ जनालाई क्वारेन्टाइनमा बसालिएको बताए ।

समितिका अनुसार भारतबाट हालसम्म सबैभन्दा बढी सुनिलस्मृति गाउँपालिकामा २ सय २५ जना आइपुगेका छन् । यस्तै त्रिवेणीमा १ सय ५३ र गंगादेवमा १ सय ४३ जना भारतबाट घर फर्केका छन् । रोल्पा नगरपालिकामा ५० जना र रुन्टीगढीमा ४२ जना आइपुगेका छन् । बिहीबारसम्म परिवर्तनमा १२, लुंग्रीमा ८, थबाङमा ७, सुनछहरीमा ५ र माडीमा २ जना भारतबाट भित्रिएका छन् ।

भारतबाट आएका ६ सय ४७ र काठमाडौंलगायत अन्य स्थानबाट आएका १ हजार ६ सय ८ जनालाई क्वारेन्टाइनमा राखिएको जिल्ला प्रशासन कार्यालयका सूचना अधिकारी एवं सहायक प्रमुख जिल्ला अधिकारी नवराज शर्माले बताए ।

रोल्पाका विभिन्न विद्यालय भवनमा बनाइएका क्वारेन्टाइनमा हाल २ हजार ९७ वटा बेड तय गरिएको छ । लकडाउनपछि हालसम्म ३३ हजारभन्दा बढीको स्वास्थ्य जाँच गरिएकोमा ८ हजार १ सय ५५ जनालाई क्वारेन्टाइनमा राखेर घर पठाइएको छ । हालसम्म बिरामी भएका २० जनालाई आइसोलेसनमा राखेर घर पठाइएको छ । यस्तै ३ सय ८० जनाको आरडीटी गरिएको छ । सबैको नतिजा नेगेटिभ छ । रोल्पा अस्पताल, प्राथमिक स्वास्थ्य केन्द्र सुलिचौर र होलेरीमा गरी २० वटा आइसोलेसन कक्षा निर्माण गरिएको छ । भारतबाट आउनेको संख्या बढेपछि लिबाङस्थित जलजला बहुमुखी क्याम्पसमा ५० बेडको आइसोलेसन निर्माण गर्ने तयारी छ ।

प्रमुख जिल्ला अधिकारी ढकालले रोल्पाबाट भारतमा कमाइ गर्न पुगेका करिब ३० हजार छन् । स्थानीय तहले संकलन गरेका तथ्यांकअनुसार सबै तहबाट मजदुरी गर्न भारत गएकामध्ये कम्तीमा १५ हजार फर्कन सक्ने अनुमानले योजना अघि सारिएको छ । त्रिवेणी गाउँपालिकाका अध्यक्ष शान्तकुमार वलीले भारतमा भएका ७ हजारले घर फर्कनेबारे सम्पर्क गरेको बताए । यसैगरी माडी गाउँपालिकाका अध्यक्ष नन्दबहादुर पुनले राजधानी लगायतका इँटा उद्योगबाट फर्केका करिब १ हजारलाई घर फर्काइएको बताए । भारतबाट आएकालाई सुरक्षित पार्न र रोजगारी दिन ध्यान केन्द्रित भएको उनको भनाइ छ ।

प्रकाशित : जेष्ठ १५, २०७७ २१:४९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

अपुग हुँदै सुदूरपश्चिमका क्वारेन्टाइन, बझाङ र बाजुराका बेड भरिए

भारतबाट आई सुदूरपश्चिमका नाकामा भित्रने नेपालीको ओइरो रोकिएको छैन । पछिल्लो डेढ सातामा गौरीफन्टा नाकाबाट मात्रै २८ हजार भित्रिएका छन् ।
मोहन बुढाऐर

धनगढी — सुदूरपश्चिम प्रदेशमा भारतबाट आउनेको संख्या बढ्दै गएपछि स्थानीय तहका क्वारेन्टाइन भरिँदै गएका छन् । बिहीबार बझाङ र बाजुरामा क्वारेन्टाइनको बेड संख्या अपुग भइसकेको छ ।  

सुदूरपश्चिम स्वास्थ्य निर्देशनालयले स्थानीय तहका लगभग ८ सय ४३ वटा क्वारेन्टाइनमा रहेका २९ हजार ५ सय ६४ बेड अपुग हुने अवस्थामा पुगेको जनाएको छ । बिहीबारसम्म क्वारेन्टाइनमा बस्नेको संख्या २१ हजार ५ सय ६१ जना पुगिसकेको छ ।

निर्देशनालयका अनुसार बझाङका ९० वटा क्वारेन्टाइनमा रहेका सबै १ हजार ३ सय ७७ बेड भरिएका छन् । बाजुरामा पनि त्यस्तै छ । बाजुराका ७४ वटा क्वारेन्टाइनमा रहेका ८ सय ५१ बेडमा १ सय ८६ महिला र ६ सय ६१ पुरुषलाई राखिएको छ ।

अछाम, बैतडी, डडेल्धुरा, दार्चुला, डोटी जिल्लाका क्वारेन्टाइन पनि भरिँदै गएका छन् । भारतबाट दैनिक हजारौंको संख्यामा नेपाली भित्रिन थालेपछि क्वारेन्टाइनको व्यवस्थापन गर्न स्थानीय तहलाई हम्मे परिरहेको छ ।

दार्चुलामा ४२ वटा क्वारेन्टाइनमा रहेका ९ सय २० बेडमा बस्नेको ५ सय ७० जना पुगिसकेको छ । डोटीमा ८५ स्थानमा रहेका २ हजार ८ सय बेडमा डेढ बेडमात्र खाली छ । यहाँ बिहीबारसम्म २ हजार ६ सय ७० जनालाई क्वारेन्टाइनमा राखिएको छ ।

अछाममा ९८ वटा क्वारेन्टाइमा २ हजार १ सय ४६ बेड छ । अब खाली ८ सय १२ मात्रै छन् । अछाममा अहिले १ हजार ३ सय ३४ जना क्वारेन्टाइनमा छन् । बैतडीमा १ सय ४ क्वारेन्टाइनमा ३ हजार ८४ जना रहेका छन् । कुल बेड संख्या ४ हजार ४१ मध्ये खाली ९ सय ५७ मात्रै छ । त्यस्तै डडेल्धुराका ९३ वटा क्वारेन्टाइनमा ४ हजार १ सय ९७ बेड भएकोमा २ हजार १ सय ७५ जना बसिसकेका छन् ।

सबैभन्दा धेरै बेडको व्यवस्था गरिएको कैलालीमा पनि ५ हजार २ सय ८५ पुगिसकेका छन् । यहाँ १ सय ७२ स्थानमा ७ हजार ८ सय ७५ जना क्षमताको क्वारेन्टाइन व्यवस्था गरिएको थियो । कञ्चनपुरमा भने ६ सय ९ जना क्वारेन्टाइनमा छन् ।

भारतका विभिन्न सहरबाट आई सुदूरपश्चिमका नाकामा भित्रने नेपालीको ओइरो रोकिएको छैन । पछिल्लो एक सातामा कैलालीको गौरीफन्टा नाकाबाट मात्रै २८ हजार नेपाली भित्रिएका छन् ।

स्वास्थ्य निर्देशनालयका निर्देशक गुणराज अवस्थीले किट अभावको कारण सीमा नाकामा गरिने आरडीटी जाँचलाई निरन्तरता दिन नसकेको बताए । उनीहरुको स्वास्थ्य जाँच स्थानीय तहको क्वारेन्टाइनमै गरिने उनले जानकारी दिए । क्वारेन्टाइन अपुग हुँदै गएको अवस्थामा परीक्षणको दायरासमेत नबढ्दा भारतबाट भित्रिएकाबाट कोरोना समुदायमा फैलिन सक्ने चिन्ता बढेको छ ।


प्रकाशित : जेष्ठ १५, २०७७ २१:४२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×