भारतीय क्‍वारेन्टाइनमा नेपालीको मृत्यु

माधव ढुंगाना

भैरहवा — भारतमा रोजगारी गरी घर फर्कने क्रममा भारतीय क्‍वारेन्टाइनमा रहेका एकजना नेपालीको शनिबार मृत्यु भएको छ ।

लकडाउनका कारण स्वदेश आउन नपाएका ती नेपालीको सुनौली नाका नजिकको नौतनवास्थित राजिव गान्धी पीजी कलेजको क्वारेन्टाइनमा शनिबार बिहान मृत्यु भएको थियो ।

उनलाई स्वदेश आउने क्रममा सुनौली नाकाको सिमानाबाट केही दिन अघि फर्काएर भारतको नौतनवास्थित राजिव गान्धी पीजी कलेजको क्वारेन्टाइनमा राखिएको थियो । मृत्यु हुनेमा स्याङजाको हरिनाथ नगरपालिका-२ चिसापानीका ३५ वर्षीय देवबहादुर थापा रहेको जिल्ला प्रशासन कार्यालय रुपन्देहीले जनाएको छ ।

रुपन्देहीका प्रमुख जिल्ला अधिकारी महादेव पन्थले मृतक थापा भारतको दिल्ली नजिकैको अलिगढ भन्‍ने स्थानमा रोजगारी गर्ने गरेको र उनी मृगौलाको बिरामी भएपनि पछिल्लो पटक हर्नियाको पनि बिरामी रहेको कुरा जानकारीमा आएको बताए ।

‘उनलाइ सन्चो नभएपछि हिजो भारतको महाराजगंज जिल्लाको सदरमुकामस्थित अस्पतालमा उपचारार्थ लगिएको थियो,’ पन्थले भने, ‘औषधिसहित साँझ क्वारेन्टाइनमा फर्केका थापाको आज बिहान मृत्यु भएको जानकारी आयो ।’ प्रजिअ पन्थका अनुसार मृतकको भारतको महाराजगंजस्थित अस्पतालमै पोष्टमार्टम भइरहेको छ ।

प्रकाशित : जेष्ठ १०, २०७७ १९:१४
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

संक्रमितको परिवारका सदस्यको स्वाब संकलन

लीला श्रेष्ठ

भक्तपुर — शुक्रबार कोराना भाइरस संक्रमण पुष्टि भएकी ४२ वर्षीया महिलाको परिवारसहित १९ जनाको ‘नेजल स्वाब’को नमुना संकलन गरिएको छ । 

भक्तपुर नगरपालिकाद्‍वारा सञ्‍चालित जनस्वास्थ्य केन्द्र च्याम्हासिंहले शनिबार संक्रमित महिलाको परिवारका ३ सदस्यसहित प्रत्यक्ष सम्पर्कमा रहेका १९ जनाको ‘नेजल स्वाब’को नमुना संकलन गरेको हो । नमुना राष्ट्रिय जनस्वास्थ्य प्रयोगशाला टेकु पठाइएको छ ।

संक्रमितको प्रत्यक्ष सम्पर्कमा रहेका केही बाँकी व्यक्तिहरुको पनि आइतबार ‘नेजल स्वाब’परीक्षणको लागि पठाइने भक्तपुर नगरपालिका–९ का वडाध्यक्ष रविन्द्र ज्याख्वले बताए ।

शुक्रबार साँझ कोरोना संक्रमण भएकी महिला भक्तपुर–९ की वडा महिला सदस्य हुन् । नगरपालिकाले नगरकार्यपालिका सदस्यहरुको कोरोना परीक्षण गराउने क्रममा जेठ ६ गते ती महिलाको पनि परीक्षण गरेको थियो । नगरपालिकाले जनप्रतिनिधिको परीक्षण गरी सकेर नगरमा कार्यरत कर्मचारीको कोरोना परीक्षण गराइरहेको वडाध्यक्ष ज्याख्वले बताए । ती वडा महिला सदस्य नगरपालिका र वडा कार्यालयमा सक्रिय थिइन् ।

वडा कार्यालयका अनुसार गत चैत ३० गते ती महिला राहत वितरण कार्यक्रममा सहभागी थिइन् भने वैशाखको पहिलो साता वडाका विभिन्न स्थानमा धानको बीउ वितरणमा सक्रिय थिइन् । कोरोना संक्रमित फेला परेपछि भक्तपुर–९ च्याम्हासिंह तुमुचो दुगुरे क्षेत्रमा प्रहरीले सिल गरेको छ ।

संक्रमितलाई शुक्रबार राति नै पाटन अस्पताल पठाइएको महानगरीय प्रहरी परिसर भक्तपुर प्रमुख एसपी सबिन प्रधानले बताए । मुटु रोगको नियमित औषधि सेवन गरिरहेकी उनको करिब १२ वर्ष पहिले ‘ओपन हार्ड सर्जरी’गरेको जनाइएको छ । उनको अवस्था सामान्य छ ।

प्रकाशित : जेष्ठ १०, २०७७ १९:०९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
×