प्रदेश ५ को नीति तथा कार्यक्रममा 'कोभिड–१९ विशेष'

घनश्याम गौतम

रूपन्देही — प्रदेश ५ का प्रदेश प्रमुख धर्मनाथ यादवले शनिबार प्रदेश ५ को आगामी आर्थिक वर्षको नीति तथा कार्यक्रम प्रदेश सभामा प्रस्तुत गरेका छन् । उनले प्रस्तुत गरेको सरकारको नीति कार्यक्रम ‘कोभिड–१९ विशेष’ छ ।


कोरोनाबाट उथलपुथल भएको अर्थतन्त्रको पुनरुत्थान गर्ने नीति सरकारले अवलम्बन गरेको छ । त्यसका लागि धेरै बजेट र नीति कृषि क्षेत्रका लागि तयार गर्ने सरकारको तयारी छ । कोरोनाका कारण रोजगारी गुमाएका र विदेशबाट फर्किएका युवाका लागि कृषि लक्षित कार्यक्रम ल्याउने सरकारको नीति छ ।

एक स्थानीय तह एक बिउ बैंक स्थापना हुनेछ । कृषि पर्यटन, ग्रामिण पर्यटन, पर्यापर्यटन पनि सरकारको प्राथमिकतामा छन् । आन्तरिक आयमा टेवा पुर्‍याउने उद्योग, विकास आयोजना पनि निरन्तर हुनेछन् । सिद्धार्थ राजमार्ग अर्न्ततको सिद्धबाबा सडक खण्डको बैकल्पिक मार्गका रुपमा प्रदेश सरकारले निर्माण गरिरहेको चरङ्गे झुम्सा सडकमा आगामी वर्ष यातायात चल्ने गरी स्तरोन्नती गर्ने सरकारले उल्लेख गरेको छ ।

नीति कार्यक्रम प्रस्तुत गर्दै यादवले प्रदेश ५ को नामकरण र राजधानी भने कोभिड–१९ नियन्त्रणपछि मात्र टुंगो लाग्ने बताए । सरकारले चालू वर्षमै नाम र राजधानी टुंगो लगाउने तयार गरेपनि कोरोना महामारीले प्रभावित भएको छ । राजधानीको टुंगो लागेपछि त्यससँग सम्बन्धित गुरुयोजना र संरचना निर्माणका काम सुरु हुने उनले बताए ।

नाम र राजधानीको टुंगो नलागेपनि सरकारले प्रदेशको मौलिकता झल्कने गरी प्रदेश सभाको भवन निर्माण गर्ने नीति कार्यक्रममा उल्लेख छ । त्यस्तै चालु वर्ष खर्च हुन नसकेको बजेटलाई कोरोना कृषि विशेष कार्यक्रम संचालन गरेर खर्च व्यवस्थापन गर्ने सरकारको तयारी छ ।

सरकारले आगामी वर्षमा नयाँ र ठूला आयोजना थप नगर्ने भएको छ । तर, पुराना योजनालाई बजेट निरन्तरता दिने जनाएको छ । चालू वर्षदेखि नै निरन्तर रहेका स्थानीय तह जोड्ने सबै पहुँच मार्गलाई बहुवर्षे योजनामा रुपान्तरण गरेको छ । प्रदेश भरका सबै नागरिकलाई तीन वर्ष भित्र बिजुलीको सहज पुहँचमा पुर्‍याएर उज्यालो प्रदेश बनाउने नीति कार्यक्रममा उल्लेख छ ।

बिजुलीका काठका पोल हटाउने कार्यलाई अभियानका रुपमा संचालन गरिने छ । सरकारले चालु आवमा ५५ पुल निर्माण गरी आगामी वर्ष थप ४० यातायातका पक्की पुल निर्माण गर्ने लक्ष्य लिएको छ ।

त्यस्तै सरकारले प्रदेशका ६ स्थानलाई शिर्ष बिन्दु घोषणा गर्दै पर्यटकीय स्थलको रुपमा विकास गर्ने भएको छ । रोल्पाको होलेरी, प्यूठानको स्वर्गद्धारी, अर्घाखाँचीको नरपानी, गुल्मीको रेसुंगा र पाल्पाको श्रीनगरलाई हिलस्टेशनका रुपमा विकास गरिने नीति कार्यक्रममा उल्लेख छ । सरकारले प्रस्तुत गरेको नीति कार्यक्रम माथि आइतबार बस्ने प्रदेश सभाको बैठकमा छलफल सुरु हुने सरकारका प्रवक्ता एवं भौतिक पूर्वाधार विकास मन्त्री बैजनाथ चौधरीले बताए ।

प्रकाशित : जेष्ठ १०, २०७७ १८:२४
प्रतिक्रिया
पठाउनुहोस्

बैठकमै गाउँपालिका अध्यक्षले वडाध्यक्ष कुटे

एजेन्डापिच्छे छलफल भइरहेका बेला सुनिलस्मृति गाउँपालिका अध्यक्षले एक्कासि वडाध्यक्षमाथि आक्रमण गरेका हुन् ।
काशीराम डाँगी

रोल्पा — पूर्वी रोल्पास्थित सुनिलस्मृति गाउँपालिकाको कार्यपालिका बैठकमै अध्यक्ष गुणेन्द्र घर्तीमगरले एक वडाध्यक्षमाथि आक्रमण गरेका छन् । शनिबार आयोजित गाउँपालिकाको १४औं कार्यपालिका बैठकमा निर्णय गर्ने क्रममा अध्यक्ष घर्तीमगरले ४ नं वडाध्यक्ष गञ्जबहादुर महरा क्षत्रीमाथि कुटपिट गरेका हुन् ।

लकडाउनको अवधिमा बैंकहरु खुलाउने दिन तोक्न निर्णय गर्ने विषयमा प्रवेश गर्ने क्रममा बैठकको अध्यक्षता गरिरहेका घर्तीमगरले आक्रोशित हुँदै वडाध्यक्ष क्षत्रीमाथि एक्कासि आक्रमण गरेका हुन् । वडापालिका स्तरीय निर्णयका आधारमा बैंकहरु सातामा दुई दिन खुलाउने निर्णय यसअघि नै भइसकेको थियो ।

बैठकमा सहभागी प्रत्यक्षदर्शी वडा नं १ का अध्यक्ष केशव कंवरले अध्यक्ष घर्तीमगरलाई रोक्न सकेकाले थप दुर्घटना नभएको बताए । ‘करिब ३ मिटर पर रहेका अध्यक्षले एक्कासि वडाध्यक्ष क्षत्रीमाथि आक्रमण गरे,' उनले भने, ‘जनप्रतिनिधि र कर्मचारी मिलेर रोक्दा पनि वडाअध्यक्ष क्षत्रीमाथि हातले हिर्काउनुभयो ।’ बैठकमा एजेन्डापिच्छे छलफल भइरहेकाले आक्रोशित भई आक्रमण गर्नुपर्ने कुनै वातावरण नभएको उनको भनाइ छ ।

सुलिचौर बजारका कुनकुन बैंक खोल्न सहमति दिने र सघाउने भन्नेबारे छलफल सुरु हुनासाथ आक्रमण भएको थियो । ‘एक्कासि ममाथि आक्रमण गरेपछि मात्रै थाहा भयो’, कुटपिटमा परेका वडाअध्यक्ष क्षत्रीले भने, ‘अध्यक्षले हातले टाउको र जिउमा हिर्काएपछि सबैले देखे ।’

घटनालगत्तै उपाध्यक्ष बागमती थापा क्षत्रिनी र प्रमुख प्रशासकीय अधिकृत केशवराज पार्देलगायतले अध्यक्ष घर्तीमगरलाई नियन्त्रणमा लिएका थिए । हल्लाखल्ला भएपछि नजिकै रहेको इलाका प्रहरी कार्यालयबाट बैठक स्थलमा प्रहरी पुगेको थियो । पीडित वडाअध्यक्ष क्षत्रीले इलाका प्रहरी कार्यालयमा उजुरी दिएका छन् । ‘उहाँले न्याय माग्दै ठाडो उजुरी दिनुभएको छ,’ इलाका प्रहरी कार्यालयका प्रमुख प्रनि सुरेन्द्र धमलाले भने, ‘छलफल गरेर कुरा मिलाउने प्रयास गरिएको छ भन्ने सुनेको छु । यहाँ कोही अएको छैन ।’

नेकपा गाउँपालिका स्तरीय कमिटीका अध्यक्ष मणिराम बुढाथोकीले घटनाबारे सामान्य जानकारी पाएको बताए । ‘घटना भएको सुनेको छु’, उनले भने, ‘यसबारे थप बुझ्ने क्रममा छु । घटना दुःखद् छ ।’

स्रोतका अनुसार यसअघिदेखि नै दुवैबीच सुमधुर सम्बन्ध थिएन । अध्यक्ष घर्तीमगर तत्कालीन नेकपा माओवादीका तर्फबाट निर्वाचित भएका थिए भने वडाअध्यक्ष क्षत्री कांग्रेसबाट निर्वाचित हुन् । घर्तीमगर माओवादी लडाकुका पूर्वकमान्डरसमेत हुन् ।

प्रकाशित : जेष्ठ १०, २०७७ १८:०६
पूरा पढ्नुहोस्
प्रतिक्रिया
पठाउनुहोस्
×