२८.१२°C काठमाडौं
सीमाबाट लुकिछिपी प्रवेश गर्दा नियन्त्रणमा परेका थिए पश्चिम नवलपरासीका संक्रमित
परासी — पश्चिम नवलपरासीमा बुधबार कोरोना संक्रमण पुष्टि भएका ३६ वर्षिय पुरुष भारतबाट लुकिछिपी नेपाल छिरेको खुलेको छ । प्रतापपुर गाउँपालिका वडा नम्बर ५ बेदौलीमा भारतबाट तीन दिनअघि आएका उनलाई सुरक्षाकर्मीले बन्द गरिएको सीमाबाट लुकिछिपी छिर्दा पक्राउ गरेका थिए ।
उनलाई थप उपचारका लागिपरासी स्थित पृथ्वीचन्द्र अस्पतालमा ल्याउने तयारी भइरहेको जिल्ला स्वास्थ्य कार्यालयका प्रमुख गौरब ढकालले बताए । प्रतापपुर गाउंपालिकाका अध्यक्ष राजकुमार शर्माले भारतबाट आएका युवामा संक्रमण देखीएकाले गाउंपालिकालाई सिल गरेर परीक्षणको दायरा बढाउन सम्बन्धित निकायलाई आग्रह गर्ने बताए ।
भारतले लकडाउन खुकुलो बनाएपछि नेपालीहरु धमाधम घर फर्किइरहेका छन् । भारतमा अलपत्र परेका मजदुरका लागि रेल र बस सेवा संचालन भएपछि नेपालीहरु नेपाल–भारत सीमासम्म निर्वाधरुपमा आइरहेका छन् । तर, नेपालले सिमानाकाबाट प्रवेश गर्न नदिएपछि उनीहरु दशगजामा सुरक्षाकर्मीको आँखां छलेर प्रवेश गर्न थालेका छन् ।
संक्रमण पुष्टि भएसँगै जिल्ला सुरक्षा समितिको बैठक बसेर थप कडाई गर्ने निर्णय भएको प्रमुख जिल्ला अधिकारी बासुदेव दाहालले बताए । पश्चिम नवलरासीमा १ सय ७३ जनाको स्वाब संकलन गरेर परीक्षणका लागि काठमाडौं पठाइएको थियो ।
प्रकाशित : वैशाख ३१, २०७७ २०:५५
