रुपन्देहीका संक्रमित युवकको सम्पर्कमा आएका १४ जनामा कोरोना देखिएन

कोरोना पोजिटिभ देखिएका रूपन्देहीको कोटहिमाई गाउँपालिका–१ पूर्णिहवाका युवकको ससुराली परिवार र उनले खाना खाएका ठाउँका व्यक्तिमा कोरोना संक्रमण नदेखिएको प्रदेश जनस्वास्थ्य प्रयोगशाला रुपन्देहीका निमित्त प्रमुख राजेन्द्र गिरीले बताए । ‘कोरोना पुष्टि भएका व्यक्तिको सम्पर्कमा आएका व्यक्तिको क्वारेन्टाइनमा राखेर स्वाब परीक्षण गर्दा रिपोर्ट नेगेटिभ आएको छ,’ उनले भने, ‘उनीहरुको स्वाब संकलन गरी मंगलवार राष्ट्रिय जनस्वास्थ्य प्रयोगशाला काठमाडौं पठाइएको थियो ।’ यसअघि उनका दाजु र परिवारका सदस्यसहित दश जनामा गरिएको कोरोना परीक्षणको रिपोर्ट पनि नेगेटिभ आएको थियो ।

भारतको नयाँ दिल्लीबाट आएका ती युवा लकडाउनकै अवधिमा दिल्लीबाट ट्रक र पैदल यात्रा गर्दै गाउँ प्रवेश गरेका थिए । ती युवकलाई बुटवलको धागो कारखानामा बनाइएको कोरोना विशेष अस्थायी अस्पतालको आइसोलेसनमा राखि उपचार गरिएको छ ।