लकडाउनमा ‘कृषि एम्बुलेन्स’ मार्फत तरकारी बिक्री

माधव अर्याल

पाल्पा — कोरोना भाइरस (कोभिड- १९)को संक्रमण फैलिन नदिन लागु गरिएको लकडाउनका क्रममा किसानले उत्पादन गरेको तरकारी खेर नजाओस् र उपभोक्तालाई अभाव नहोस् भनेर तानसेन नगरपालिका अन्तर्गत गठित तानसेन युवा परिषद्ले आइतबारदेखि ‘कृषि एम्बुलेन्स सेवा’ सुरु गरेको छ ।

प्रदेश नम्बर ५ सरकार अन्तर्गत भूमि व्यवस्था, कृषि तथा सहकारी मन्त्रालयले गरेको निर्देशनपछि तत्कालै यो सेवा सुरु गरिएको हो ।

किसानको उत्पादनलाई बजार लैजान ‘कृषि एम्बुलेन्स सेवा’ सुरु गरेको तानसेन युवा परिषद्का अध्यक्ष गुराँस आत्रेयले बताए । उनका अनुसार आइतबार तानसेनमा दुई पिकअप जीपमा २ हजार ५ सय किलो तरकारी कृषि एम्बुलेन्सबाट ल्याएर बिक्री गरी त्यसको सुरुवात गरिएको हो । यो सेवाबाट ६ सय परिवार लाभान्वित भएका छन् । किसानको उत्पादनलाई बजारसम्म लैजानका लागि प्रदेश सरकारले सहजीकरण गरेको र त्यसबाट बजारमा बसेका बासिन्दालाई पनि राहत पुग्ने प्रदेश ५ प्रदेश सभा सदस्य नारायण आचर्यले बताए ।

तानसेन नगरपालिका–९, टिन्टीआँपस्थित मदनपोखरा संगम कृषि सहकारी संस्था र तानसेन नगरपालिकाको समन्वयमा युवा परिषद्ले बिक्री वितरण व्यवस्थापन गरेको छ । उक्त कृषि एम्बुलेन्सबाट तानसेन बजारका विभिन्न क्षेत्रमा सेवा दिने बताइएको छ ।

मदनपोखरा संगम कृषि सहकारी संस्थाका अध्यक्ष खेमराज न्यौपानेले किसानको उत्पादनलाई लागत उठ्ने गरी भएपनि बिक्रीको प्रबन्ध मिलाएको बताए । ‘लकडाउनले गर्दा ठूलो समस्या खेप्नु परेको थियो । यसले राहत दिएको छ,’ उनले भने । किसानले तरकारी उत्पादन गरे पनि बिक्री गर्न नपाएको अवस्थामा यस्तो विधि अपनाउँदा सहज भएको उनको भनाइ थियो ।

कोरोना भाइरसको संक्रमण फैलिन नदिन लकडाउन जारी गरेपछि किसानले तरकारी बिक्री गर्न र उपभोक्ताले तरकारी खरिद गर्न समस्या थियो ।

तरकारीको मूल्य सहकारीले निर्धारण गरेअनुसार नै भएको किसान चिन्तामणी भट्टराईले बताए । उनका अनुसार यसरी बिक्री गर्दा किसानलाई थोरै भए पनि राहत पुगेको छ । तानसेन, कुन्सरेका किसान नुरदेव पौडेलले तरकारी सुकाएर फाल्नुपर्ने अवस्था आएको भन्दै कृषि एम्बुलेन्स मार्फत बिक्री गर्दा किसानको लागतसम्म उठ्ने बताए ।

प्रदेश नम्बर ५ को भूमि व्यवस्था, कृषि तथा सहकारी मन्त्रालयले किसानले उत्पादन गरेका कृषि तथा पशुजन्य वस्तु ढुवानीका लगि ‘कृषि एम्बुलेन्स’ संचालन गर्ने निर्णय गरेको थियो ।

पाल्पाको तानसेन टुँडिखेलमा कृषि एम्बुलेन्स सेवामार्फत् किसानको तरकारी बिक्री गरिँदै ।

प्रकाशित : वैशाख ८, २०७७ ०८:११
प्रतिक्रिया
पठाउनुहोस्

५ हजार विपन्न र मजदुरलाई राहत वितरण

माधव अर्याल

पाल्पा — जिल्लाका ५ हजार विपन्न र ज्याला मजदुरी गर्ने परिवारलाई राहत वितरण गरिएको छ । १० स्थानीय तहले उनीहरूलाई आ–आफ्नै मापदण्ड बनाएर राहत दिएका हुन् । ज्याला मजदुरी गर्ने, घरमा अन्नको जोहो गर्न नसक्ने विपन्‍न परिवारलाई अवस्था र परिवार संख्या हेरेर राहत वितरण गरिएको स्थानीय तहले जनाएका छन् ।

तानसेन नगरपालिकामा १ हजार २ सय ७० र रामपुर नगरपालिकामा १ हजार ६६ जनालाई राहत वितरण गरिएको छ । निस्दी गाउँपालिकामा ३ सय ३२, रैनादेवी छहरामा ३ सय, रम्भामा १ सय ६०, पूर्वखालामा २ सय ४९, माथागढीमा ६ सय परिवारले राहत पाएका छन् । तिनाउले ३ सय ८५, बगनासकालीले ३ सय ८० र रिब्दीकोटले २ सय ८ परिवारलाई राहत दिएको छ ।

निदी गाउँपालिकाका प्रमुख प्रशासकीय अधिकृत भगवान अर्यालका अनुसार विभिन्न वडाका २ सय ८४ परिवारका साथै ४८ जना सडक तथा भौतिक निर्माणमा काम गर्ने अलपत्र परेका मजदुरलाई राहत वितरण गरिएको छ ।

राहतस्वरुप चामल, दाल, नुन, तेल, साबुनलगायत सामग्री दिइएको हो ।

माथागढीमा अति विपन्न श्रमिक, अपांगता भएका र ७० वर्ष माथिका संरक्षक नभएका जेष्ठ नागरिकलाई पनि लगत संकलन गरी खाद्य सामाग्री वितरण गरिएको अध्यक्ष सन्तोष थापाले बताए ।

पूर्वखोला गाउँपालिकाले लकडाउनले दैनिक कामकाज गरेर पेट पाल्ने परिवार काम नहुँदा भोकै बस्न नपरोस् भनी विपन्न परिवारलाई राहत वितरण गरिएको प्रमुख प्रशासकीय अधिकृत रुद्र पछाईले बताए । ‘कोही विपन्न परिवार नदोहोरियोस् र नछुटोस् भनेर वडागत रूपमा तथ्यांक संकलन गरिएको छ,’ उनले भने, ‘प्रत्येक वडा कार्यालयले खाद्यान्न राहत वितरणका लागि वडाको पायक पर्ने पसलका लागि कुपन दिएको छ ।’

गाउँपालिकाका सूचना अधिकारी मोहन ढकालका अनुसार परिवारमा ७ जना भन्दा बढी सदस्य छन् भने ३० केजी चामल, तीन केजी दाल, २ लिटर तेल, नुन २ पोका र साबुन ४ वटा दिइएको छ ।

तानसेन नगरपालिकाले खाद्यान्नका लागि प्रत्येक वडामा पायक पर्ने गरी पसल तोकेको प्रमुख प्रशासकीय अधिकृत डिल्लीराज बेल्वासेले बताए । केही पसलबाट तोकिएको मूल्यमा खाद्यान्न उपलब्ध गराउन नसक्ने भनेकोले नगरपालिकाले आफै किनेर वितरण गर्ने तयारी गरेको सूचना अधिकारी दुर्गा थापाले बताए ।

रामपुर नगरपालिकाले टोलटोलमा पुगेर खाद्यान्न वितरण गरको नगर प्रमुख रमणबहादुर थापाले बताए । उक्त नगरपालिकाले खाद्य सामग्रीका साथै मास्क, जीवनजल, सिटामोल र साइनेक्सजस्ता औषधि पनि वितरण गरेको छ ।

बगनासकाली गाउँपालिकाले छुटेकालाई पछि पनि राहत उपलब्ध गराइने जनाएको छ । गाउँपालिकाले दैविक विपद कोषमार्फत वडाका सबै विपन्न र मजदुरलाई खाद्यान्न वितरण गरेको प्रवक्ता लक्ष्मीप्रसाद अधिकारीले बताए ।

रैनादेवी छहरामा मुख्यमन्त्री ग्रामीण विकास कार्यक्रम अन्तर्गतको बजेटलाई परिचालन गरी राहत वितरण गरिएको अध्यक्ष रामबहादुर कार्कीले बताए ।

तिनाउ गाउँपालिकाले पालिकाभित्रका विपन्न र ज्याला–मजदुरी गर्ने परिवारलाई वडामा ५० हजारका दरले बजेट विनियोजन गरेर सोही अनुसारको राहत वितरण गरेको गाउँपालिकका अध्यक्ष ओमबहादुर घर्तीले बताए ।

प्रकाशित : चैत्र २६, २०७६ ०८:०५
पूरा पढ्नुहोस्
प्रतिक्रिया
पठाउनुहोस्
×