लकडाउनमा ५५ रूख ढालिए
दाङ — लकडाउनको मौका छोपी दंगीशरण गाउँपालिकाको सिमठाना सामुदायिक वन क्षेत्रमा विभिन्न प्रजातिका ५५ वटा रूख काटिएको पाइएको छ । डिभिजन वन कार्यालय घोराहीले १ हजार क्युफिट सिसौका काठसहित बुधबार दुई जनालाई पक्राउसमेत गरेको छ ।
सहायक वन अधिकृत खिमबहादुर केसी नेतृत्वको गस्ती टोलीले अवैध रूपमा रूख काटिएको भेटाएपछि काठसहित शंकास्पद दुई जनालाई पक्राउ गरेको हो ।
उनीहरूबारे थप अनुसन्धान भइरहेको डिभिजन वन अधिकृत दीपक ज्ञवालीले बताए । वन फँडानी र अवैध निकासी रोक्न गस्ती बढाइएको उनले जानकारी दिए ।