५ हजार विपन्न र मजदुरलाई राहत वितरण

माधव अर्याल

पाल्पा — जिल्लाका ५ हजार विपन्न र ज्याला मजदुरी गर्ने परिवारलाई राहत वितरण गरिएको छ । १० स्थानीय तहले उनीहरूलाई आ–आफ्नै मापदण्ड बनाएर राहत दिएका हुन् । ज्याला मजदुरी गर्ने, घरमा अन्नको जोहो गर्न नसक्ने विपन्‍न परिवारलाई अवस्था र परिवार संख्या हेरेर राहत वितरण गरिएको स्थानीय तहले जनाएका छन् ।

तानसेन नगरपालिकामा १ हजार २ सय ७० र रामपुर नगरपालिकामा १ हजार ६६ जनालाई राहत वितरण गरिएको छ । निस्दी गाउँपालिकामा ३ सय ३२, रैनादेवी छहरामा ३ सय, रम्भामा १ सय ६०, पूर्वखालामा २ सय ४९, माथागढीमा ६ सय परिवारले राहत पाएका छन् । तिनाउले ३ सय ८५, बगनासकालीले ३ सय ८० र रिब्दीकोटले २ सय ८ परिवारलाई राहत दिएको छ ।

निदी गाउँपालिकाका प्रमुख प्रशासकीय अधिकृत भगवान अर्यालका अनुसार विभिन्न वडाका २ सय ८४ परिवारका साथै ४८ जना सडक तथा भौतिक निर्माणमा काम गर्ने अलपत्र परेका मजदुरलाई राहत वितरण गरिएको छ ।

राहतस्वरुप चामल, दाल, नुन, तेल, साबुनलगायत सामग्री दिइएको हो ।

माथागढीमा अति विपन्न श्रमिक, अपांगता भएका र ७० वर्ष माथिका संरक्षक नभएका जेष्ठ नागरिकलाई पनि लगत संकलन गरी खाद्य सामाग्री वितरण गरिएको अध्यक्ष सन्तोष थापाले बताए ।

पूर्वखोला गाउँपालिकाले लकडाउनले दैनिक कामकाज गरेर पेट पाल्ने परिवार काम नहुँदा भोकै बस्न नपरोस् भनी विपन्न परिवारलाई राहत वितरण गरिएको प्रमुख प्रशासकीय अधिकृत रुद्र पछाईले बताए । ‘कोही विपन्न परिवार नदोहोरियोस् र नछुटोस् भनेर वडागत रूपमा तथ्यांक संकलन गरिएको छ,’ उनले भने, ‘प्रत्येक वडा कार्यालयले खाद्यान्न राहत वितरणका लागि वडाको पायक पर्ने पसलका लागि कुपन दिएको छ ।’

गाउँपालिकाका सूचना अधिकारी मोहन ढकालका अनुसार परिवारमा ७ जना भन्दा बढी सदस्य छन् भने ३० केजी चामल, तीन केजी दाल, २ लिटर तेल, नुन २ पोका र साबुन ४ वटा दिइएको छ ।

तानसेन नगरपालिकाले खाद्यान्नका लागि प्रत्येक वडामा पायक पर्ने गरी पसल तोकेको प्रमुख प्रशासकीय अधिकृत डिल्लीराज बेल्वासेले बताए । केही पसलबाट तोकिएको मूल्यमा खाद्यान्न उपलब्ध गराउन नसक्ने भनेकोले नगरपालिकाले आफै किनेर वितरण गर्ने तयारी गरेको सूचना अधिकारी दुर्गा थापाले बताए ।

रामपुर नगरपालिकाले टोलटोलमा पुगेर खाद्यान्न वितरण गरको नगर प्रमुख रमणबहादुर थापाले बताए । उक्त नगरपालिकाले खाद्य सामग्रीका साथै मास्क, जीवनजल, सिटामोल र साइनेक्सजस्ता औषधि पनि वितरण गरेको छ ।

बगनासकाली गाउँपालिकाले छुटेकालाई पछि पनि राहत उपलब्ध गराइने जनाएको छ । गाउँपालिकाले दैविक विपद कोषमार्फत वडाका सबै विपन्न र मजदुरलाई खाद्यान्न वितरण गरेको प्रवक्ता लक्ष्मीप्रसाद अधिकारीले बताए ।

रैनादेवी छहरामा मुख्यमन्त्री ग्रामीण विकास कार्यक्रम अन्तर्गतको बजेटलाई परिचालन गरी राहत वितरण गरिएको अध्यक्ष रामबहादुर कार्कीले बताए ।

तिनाउ गाउँपालिकाले पालिकाभित्रका विपन्न र ज्याला–मजदुरी गर्ने परिवारलाई वडामा ५० हजारका दरले बजेट विनियोजन गरेर सोही अनुसारको राहत वितरण गरेको गाउँपालिकका अध्यक्ष ओमबहादुर घर्तीले बताए ।

प्रकाशित : चैत्र २६, २०७६ ०८:०५
ADVERTISEMENT
प्रतिक्रिया
पठाउनुहोस्

हेटौंडाका खाद्य, दाना र दुग्ध उद्योग आंशिक रूपमा खुल्ला

प्रताप विष्ट

हेटौंडा — लकडाउनको अवस्थामा पनि सरकारले अत्यावश्यक उद्योगको उत्पादन पूर्ण क्षमताका साथ सुचारु गराउने भने पनि यहाँका उद्योग संचालन हुन सकेका छैनन् ।

हेटौंडा औधोगिक क्षेत्र भित्र रहेका १ सय ११ वटा उद्योगमध्ये २० वटा उद्योग आशिंक रूपमा संचालन भइरहेका छन । ठूला उद्योगको रूपमा रहेका भ्याली पेलेट फिड इन्डस्ट्रिज, सिद्धार्थ पेलेट फिड इन्डस्ट्रिज, खाद्य उद्योग र हेटौंडा दुग्ध वितरण आयोजना आंशिक संचालनमा आएका छन् ।


भ्याली पेलेट फिड इन्डस्ट्रिजको १ सय १० जना कामदारमध्ये ३५ जना मात्रै आएर उद्योग संचालन गरिरहेका छन् भने सिद्धार्थ पेलेट इन्डस्ट्रिजका ६५ जनामा ३२ जनाले काम गरिरहेका छन्। यसैगरी हेटौंडा दुग्ध वितरण आयोजनाका १ सय २० जनामध्ये ६० जनाले काम गरिरहेका छन् भने खाद्य उद्योगमा २६ जनालेमात्र काम गरिरहेका छन् । उद्योगहरु एक सिफ्टमात्र चलिरहेका छन् । ‘सिंगो कामदारको हिसाबले ६- ७ प्रतिशतमात्र मजदुर उपस्थित भएर उद्योग संचालन भइरहेका छन,’ उद्योग संघ मकवानपुरका अध्यक्ष लेखराज पोखरेलले भने, ‘औधोगिक क्षेत्र र बाहिरका ठूला उद्योग संचालन हुन सकेका छैनन् ।’

औधोगिक क्षेत्र भित्रका उद्योगमा ५ हजार मजदुर कार्यरत छन् । सरकारले उद्योगमा कार्यरत मजदुरहरूलाई उद्योग भित्र नै आवासको व्यवस्था गर्नुपर्ने शर्त राखेकाले उद्योग संचालन गर्न कठिनाई भएको उद्योग व्यवस्थापनले जनाएको छ । युनिलिभर लिमिटेडका व्यवस्थापकले उद्योग संचालन गर्ने रुची देखाएका थिए । उद्योगमा रहेका मजदुरलाई उद्योग भित्र आवास र खानपिनको व्यवस्था गर्नुपर्ने भएपछि उद्योग संचालनमा ल्याएका छैनन् ।

औधोगिक क्षेत्रभित्र रहेका दुग्ध, साबुन, कुकिज, दाना र प्लास्टिक प्याकेजिङ उद्योगहरू आंशिक रूपमा सञ्चालनमा रहेको कार्यालय प्रमुख राजेन्द्र कँडेलले बताए । उनका अनुसार औद्योगिक क्षेत्रभित्रका उद्योगले दैनिक मुनाफा गर्ने करिब ३० करोड रुपैयाँ क्षति व्यहोरिरहेका छन् । सरकारलाई बुझाउने राजश्वलाई हेर्दा औसतमा एउटा उद्योगले मासिक ३ करोड ३० लाख रुपैयाँ बराबरको कारोबार गर्ने उनको भनाइ छ ।

उनका अनुसार हाल सञ्चालनमा रहेका अधिकांश उद्योग पनि बिहान मात्र चलिरहेका छन् । ‘रातिको सिफ्टमा मजदुर आउजाउमा समस्या भएकाले बिहान र दिउँसोमा मात्र उद्योग सञ्चालन गर्न उद्योगी बाध्य भएका हुन्,' उनले भने ।

कोरोना भाइरस संक्रमणका कारण कच्चा पदार्थ आयात र बजारीकरणमा प्रभाव परेको भन्दै उद्योग संघ हेटौंडाका अध्यक्ष पोखरेलले सरकारले बैंकको ब्याज छुट तथा किस्ता तिर्ने मिति थप गर्नुपर्ने माग गरेका छन् । औद्योगिक क्षेत्रभित्र दैनिक ज्यालादारी गरेर जीविकोपार्जन गर्ने मजदुर पनि भोकमरीको अवस्था सिर्जना भएसँगै घर फर्किएको श्रमिकहरूले बताएका छन् । दैनिक ज्यालादारी गरेर गुजारा गर्दै आएका पर्सा, बारा, रौतहटलगायत तराईका अधिकांश मजदुर पैदलै घर फकिसकेका छन् ।

प्रकाशित : चैत्र २६, २०७६ ०७:५९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×