रोल्पामा दुई दर्जन परिवारलाई व्यापारीले बाँडे खाद्यान्न
रोल्पा — दैनिक ज्याला मजदुरी गरेर पालिदै आएका लिबाङका करिब दुई दर्जनलाई स्थानीय व्यापारीहरुले खाद्यान्न बाँडेका छन् । लिबाङका १८ जना व्यापारी मिलेर चामल, दाल, नुन र तेल वितरण गरेका हुन् ।
विपन्न परिवारलाई करिब ३३ हजार रूपैयाँ बराबरको खाद्यान्न वितरण गरिएको मिठाइ व्यवसायी मेघु साहले बताए । 'यतिबेला खान गाह्रो परेपछि मर्कामा परेका परिवार पहिचान गरेर सत्प्रयास समूहको समन्वयमा खाद्यान्न बाँडेका हौं,' उनले भने ।
भारी बोकेर गुजारा गर्दै आएका हस्तराम महरा, रौतहटबाट आएर भुजाको व्यापार गर्ने सक्कल मुनिया, ठेलामा फलफूल बेच्ने दृष्टीविहीन रामसिंह विक, अपांगता भएकी रुइची विक र उनका दुई जना दाजु, बाआमा दुवैको क्यान्सरका कारण मृत्यु भएका मनिता घर्तीमगर र पतिको क्यान्सरबाट मृत्यु भएकी रेउघाकी जुनकुमारी बुढामगर लगायत खाद्यान्न सहयोग पाउँदा खुसी भए ।
उनीहरुलाई परिवार २५ किलो चामल, २ किलो दाल र १/१ किलो नुन र तेल दिइएको लिबाङ बजारका फेन्सी व्यवसायी चोपनिधि सुवेदीले बताए । 'काम गर्न पाएका दिनमात्रै खानेकुरा जुटाउन सक्ने परिवारलाई लकडाउनले साँच्चै गाह्रो परेको देखेर देखेर व्यवसायीहरू मिलेर खाद्यान्न बाँडिएको हो,' उनले भने । खाद्यान्न वितरणको नेतृत्व उद्योग वाणिज्य संघका केन्द्रीय सदस्य किशोर आचार्यले गरेका हुन् ।
यसैबीच लकडाउनका कारण खाद्यान्न जुटाउन नसक्नेलाई सहयोग गर्न रोल्पा नगरपालिकाले पनि सहयोग गर्न तथ्यांक संकलन थालेको ४ नम्बरका वडाध्यक्ष नवराज आचार्यले बताए ।