२४.१२°C काठमाडौं
घोराहीमा खाद्यान्न पसल पनि बन्द, घरघरमै पुर्याउने व्यवस्था
दाङ — घोराही बजारमा सोमबार बेलुकादेखि खाद्यान्न पसलहरु पनि बन्द हुने भएका छन् । यसअघि बिहान ६ देखि ९ बजेसम्म दैनिक उपभोग्य वस्तुका पसलहरु खोल्ने गरिएको थियो ।
घोराही उपमहानगरपालिका विपद् व्यवस्थापन समितिको आइतबारको बैठकले सोमबार बेलुकादेखि चैत २५ गतेसम्म सबै पसल पूर्णरुपमा बन्द गर्ने निर्णय गरेको हो ।
सबै पसल बन्द हुने भएपछि बिहानैदेखि बजारमा मानिसहरुको भिडभाड लागेको छ । दैनिक उपभोग्य वस्तुहरु किन्न मानिसहरु बजारमा निस्किए । हरेक पसल र तरकारी बजारमा मानिसहरुबीच दूरी कायम गर्ने सेतो घेराहरु बनाइएको छ । मानिसहरु तोकिएको घेरामा लाइनमा बसेर सामान किनिरहेका छन् ।
अब दैनिक उपभोग्य वस्तु चाहिएमा घरमै पुर्याउने व्यवस्था गरिएको घोराही उपमहानगरपालिका प्रमुख नरुलाल चौधरीले बताए । दाङ जिल्ला उद्योग वाणिज्य संघको समन्वयमा घरघरमै सामान पुर्याउने व्यवस्था मिलाइएको उनले बताए ।
सामान चाहिए उद्योग वाणिज्य संघको फोन नं. ०८२५६००६३ मा सम्पर्क गर्न भनिएको छ । पसल खुल्दा मानिसहरुको भिडभाड हुने क्रम बढेपछि सबै बन्द गर्ने निर्णय गरेको चौधरीले बताए ।
प्रकाशित : चैत्र १७, २०७६ १०:१९
