भारतबाट आएका ७ जना क्‍वारेन्टाइनमा

वीरेन्द्र केसी

(अर्घाखाँची) — भारतबाट अर्घाखाँची आउँदै गरेका ७ जनालाई जिल्ला प्रशासनले क्‍वारेन्टाइनमा राखेको छ । 



सीमा नाका कृष्णनगरबाट कपिलवस्तु प्रशासनले पथ्थरकोटसम्म ल्याइदियो। त्यसपछि अर्घाखाँची प्रशासनले बिहीबार एम्बुलेन्सबाट सन्धिखर्क ल्याएर युवा वर्ष रविचित्र मावि हटारीको क्‍वारेन्टाइनमा राखिएको छ। उनीहरुलाई १४ दिनसम्म क्‍वारेन्टाइनमा राखेर निगरानी गरिने सहायक प्रमुख जिल्ला अधिकारी विष्णुराज बेल्वासेले बताए।


उनीहरु रोजगारीका लागि भारत गएका थिए। मंगलबार भारतको लुधियानाबाट आएका हुन्। गड्डाचौकी नाका भएर आएका अर्घाखाँचीका २९ वर्षीय एकजना हालसम्म सम्पर्कमा नआएकाले खोजी भइरहेको उनले बताए।

यसैबीच, भारतबाट आएका २५ जनालाई गुल्मीको तम्घासस्थित महेन्द्र माविको क्‍वारेन्टाइनमा राखिएहरुको स्वास्थ्य सामान्य भएपछि स्थानीय तहको जिम्मेवारीमा गाउँ पठाइएको जिल्ला प्रशासन कार्यालयका प्रशासकीय अधिकृत लक्ष्मण पाण्डेले बताए। प्रकाशित : चैत्र १३, २०७६ १५:५१

प्रतिक्रिया
पठाउनुहोस्

कोरोना संक्रमितलाई खुवाउन कोष

दुर्गालाल केसी

दाङ — बेलझुण्डीस्थित नेपाल संस्कृत विश्वविद्यालयको केन्द्रीय आयुर्वेद विद्यापीठमा स्थापित कोरोना विशेष अस्पतालमा भर्ना हुने बिरामीलाई खाना खुवाउन कोष खडा गरिएको छ ।

स्थानीय तहहरुको बिहीबार बसेको समन्वयात्मक बैठकले कोष बनाउने निर्णय गरेको हो । कोषमा घोराही र तुलसीपुर उपमहानगरपालिकाले १/१ लाख तथा अन्य आठ पालिकाले ५०/५० हजार रुपयाँ सहयोग गर्ने भएका छन् । बैठकले स्थानीयस्तरमा कोरोना लक्षणका बिरामी भेटिए बेलझुण्डी अस्पताल पठाउने निर्णय गरेको छ ।

यसैगरी कोरोना विशेष अस्पताल सञ्चालनका लागि प्रदेश ५ का आन्तरिक मामिला तथा कानुनमन्त्री कुलप्रसाद केसीको संयोजकत्वमा व्यवस्थापन समिति गठन गरिएको छ । समितिमा प्रदेश सांसद् अमरबहादुर डाँगी, डिल्लीबहादुर चौधरी, इन्द्रजीत थारु, जिल्ला समन्वय समिति प्रमुख जितेन्द्रमान नेपाली, नेकपा नेता जीवन गौतमका साथै जिल्लास्थित प्रमुख दलका प्रतिनिधि सदस्य छन् ।

बेलझुण्डीमा बुधबार एक सय शय्याको कोरोना अस्पताल स्थापना गरिएको छ । हाल ३० शय्या सञ्चालन भएको र अरु बिस्तारै स्वास्थ्यकर्मीको व्यवस्था गरेर सञ्चालन गरिने प्रमुख जिल्ला अधिकारी गोविन्दप्रसाद रिजालले बताए ।

समितिको बिहीबार बसेको बैठकले सबै स्थानीय तहमा वडाध्यक्षको अध्यक्षतामा सर्वदलीय समिति गठन गर्ने निर्णय गरेको छ । वडाको सर्वदलीय समितिले लकडाउनको समयमा जीविका चलाउन कठिन भएका श्रमिकहरुको लागत लिएर जीविकोपार्जनका लागि पहलकदमी गर्ने निर्णय भएको छ ।

यसैगरी जिल्लामा क्रियाशील राजनीतिक दलहरुको संयुक्त बैठकले हरेक पालिकाका जनप्रतिनिधि र राजनीतिक दल सम्मिलित संयन्त्र निर्माण गरी विदेशबाट आएकाहरुको अभिलेख राखी क्‍वारेन्टाइनमा बसे/नबसेको निश्चित गर्ने निर्णय गरेको छ । उनीहरुलाई कोरोना संक्रमणका लक्षण देखिए तत्काल तोकिएको अस्पतालमा पठाउन सहयोग गर्ने निर्णय बैठकले गरेको छ ।

नेकपा जिल्ला सचिव तुलसीराम पुन मगर, कांग्रेस सभापति किर्तिबहादुर खड्का र राष्ट्रिय जनमोर्चाका अध्यक्ष गणेश आचार्य सहभागी बैठकले कोरोनाबारे गाउँगाउँमा जनचेतना अभिवृद्धि गर्ने, कोरोना नियन्त्रणमा खटिएका स्वास्थ्यकर्मी र सुरक्षाकर्मीलाई सहयोग गर्ने तथा लकडाउन कार्यान्वयनमा सहयोग गर्ने निर्णय गरेको छ ।

यसैगरी लमहीस्थित फ्लोरेन्स अस्पतालले कोरोनाबाट बच्न र बचाउन सबै चिकित्सक र स्वास्थ्यकर्मीलाई अस्पतालमै खानबस्ने व्यवस्था गरी स्वास्थ्य सेवा दिन थालेको छ । स्वास्थ्य सेवामा निरन्तर खट्ने स्वास्थ्यकर्मीलाई कोरोना संक्रमणको उच्च जोखिम भएको र घरमा जाँदा परिवार पनि जोखिममा पर्ने भएकाले अस्पतालमै बस्ने व्यवस्था मिलाएको अस्पतालका प्रबन्ध निर्देशक डा. पुष्प भुसालले बताए ।

प्रकाशित : चैत्र १३, २०७६ १५:४५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
×