लकडाउन प्रभावित मजदुरलाई नगरपालिकाले दाल–चामल दिने

सन्जु पौडेल

तिलोत्तमा — तिलोत्तमा नगरपालिकाले लकडाउनबाट प्रभावित दैनिक मजदुरी गरेर जिविकोपार्जन गर्ने वर्ग समुदायलाई लक्षित गरी राहत घोषणा गरेको छ ।

बिहीबार बिहान बसेको सचिवालय बैठकले लकडाउनबाट प्रभावित भइ दैनिक छाक टार्न समस्या भएका परिवारलाई राहत दिने निर्णय गरेको नगरप्रमुख वासुदेव घिमिरेले बताए ।


‘पहिलो चरणमा साँझबिहानको छाक टार्न समस्या भएका प्रतिपरिवार दश किलो चामल र दुई किलो दाल उपलब्ध गराउने निर्णय भएको छ,’ उनले भने, ‘टोल विकास संस्थाको सिफारिसमा राहत उपलब्ध गराउने छौं ।’


नगरपालिकाले दैनिक ज्यालामजदुरीमा काममा लगाउने व्यक्ति, ठेकेदार, संस्था, कम्पनीलाई आफ्ना कामदारप्रतिको जवाफदेहीता निर्वाह गर्नसमेत ध्यानकर्षण गराएको छ । नगरपालिकाले राहत वितरणलाई व्यवस्थित बनाउन उपप्रमुख जागेश्वरी चौधरीको संयोजकत्वमा समिति गठन गरेको छ । यसअघि बुधबार नगरप्रमुखले नगरबासीलाई सम्बोधन गर्दै लकडाउनका कारण कोही भोकै बस्नु नपर्ने भन्दै त्यसको जिम्मा स्थानीय सरकारले लिने बताएका थिए ।

प्रकाशित : चैत्र १३, २०७६ ११:३८
प्रतिक्रिया
पठाउनुहोस्

आप्रवासी कामदारलाई खाद्यान्‍न उपलब्ध गराउन दोहा बैंकले दियो २० लाख रियाल

होम कार्की

काठमाडौँ — कतारस्थित दोहा बैंकले सनैया क्षेत्रमा निगरानीमा राखिएका नेपालीसहित झन्डै ५० हजार आप्रवासी कामदारलाई खाद्यान्न र औषधिजन्य सामग्री उपलब्ध गराउनका लागि २० लाख रियाल (करिब ६ करोड रुपैयाँ) कतार च्यारिटीलाई प्रदान गरेको छ । कतार च्यारिटीमार्फत कामदारलाई खाद्यान्न  उपलब्ध गराइनेछ ।

उच्चस्तरीय संकट व्यवस्थापन समितिले कामदारलाई खाद्यान्न अभाव हुन नदिने निर्णय गरेपछि दोहा बैंकले यो सहयोग उपलब्ध गराएको हो । सनैयाको सडक नम्बर १ देखि ३२ सम्म भित्र रहेका कामदारको आवतजावत पूर्ण रुपमा रोक लगाइएको छ । त्यसभित्र स–साना कम्पनीहरुका क्याम्पसमेत रहेका छन् । ती कम्पनीले कामदारलाई आवश्यक खाद्यान्न उपलब्ध गराउन सकेका छैनन् ।

‘सबै कम्पनीहरुले कामदारलाई खाना उपलब्ध गराएको छैन । कतिपय कामदार आफैले खाद्यान्न जुटाउनुपर्छ’, सनैयामा रहेका झापाका उमेश चौहानले इकान्तिपुरलाई भने,‘साना पसलहरुमा सबै सामान पाइँदैन । हरियो सागसब्जीहरुको अभाव देखिन थालेको छ ।’

कतारले गत मार्च १७ बाट कामदारलाई आवतजावत गर्न रोक लगाएको हो । कोरोना भाइरसको संक्रमण फैलिन नदिनको लागि कतार सरकारले त्यस क्षेत्रलाई जोखिम क्षेत्रको रुपमा पहिचान गरेको हो । नेपाली दूतावासले पनि खाद्यान्नको अभाव भएमा कतारी संयन्त्र वा दूतावासमा खबर गर्नका लागि आग्रह गर्दै आएको छ ।

प्रकाशित : चैत्र १३, २०७६ ११:१६
पूरा पढ्नुहोस्
प्रतिक्रिया
पठाउनुहोस्
×