गुल्मी रातिदेखि लकडाउन- प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

गुल्मी रातिदेखि लकडाउन

वीरेन्द्र केसी

गुल्मी — कोरोना संक्रमणबाट जोगिन गुल्मीलाई पूर्ण रुपमा लकडाउन गरिने भएको छ । प्रमुख जिल्ला अधिकारी भरतकुमार शर्माको अध्यक्षतामा बसेको सुरक्षा समिति र सरोकारवालाको छलफलपछि सुरक्षित रहन सम्पूर्ण सार्वजनिक र निजी सवारी साधनलाई राति १२ बजेदेखि आवतजावतमा रोक लगाइने भएको छ । मोटरसाइकल पनि अर्को सूचना जारी नभएसम्मको लागि चल्ने छैनन् ।

एम्बुलेन्स, दूधका गाडी, खाद्यान्न बोक्ने मालवाहक गाडी, पानी, फलफूल औषधि र तरकारी बोक्ने गाडीलाई रोक लगाइएको छैन । जिल्ला भित्रिने मालवाहक गाडीमा एक चालक र एक सहचालक मात्रै रहनेछन् । उनीहरुको हेल्थ डेस्कमा स्वास्थ्य जाँच गर्ने र आवश्यक परेमा क्वारेन्टाइनमा राखिने शर्माले बताए ।


अत्यावश्यक दैनिक उपभोग्य वस्तुहरु इन्धन, दाल, चामल, तेल, नुन, दूध डेरी तरकारी तथा फलफूल बाहेकका अन्य सम्पूर्ण पसलहरु राति १२ बजेदेखि अर्को सूचना नभएसम्म पूर्ण रुपमा बन्द रहनेछन् । अस्पताल स्वास्थ्य संस्था, औषधि पसलहरु र पेट्रोल पम्म २४ सै घन्टा सञ्चालन रहने शर्माले बताए ।


सबै स्थानीय तहमा हेल्थ डेस्क राखिएको छ । घरबाट कोही पनि बाहिर निस्कन प्रतिबन्ध लगाइएको छ । अत्यावश्यक बाहेक अरु बाहिर ननिस्कन भनिएको छ । भारत लगायत स्वदेशका अन्य ठाउँबाट आएकालाई १४ दिन अनिवार्य घरको क्वारेन्टाइनमा राख्न जनप्रतिनिधिलाई सर्कुलर प्रशासनले गरेको छ । १२ वटै स्थानीय तहका नागरिकलाई कोरोनाबाट जोगिन सरकार र प्रशासनले जारी गरेको सर्तहरु पालना नगरे कानुन बमोजिम कारबाही गरिने शर्माले बताए ।

प्रकाशित : चैत्र १०, २०७६ १८:३१
प्रतिक्रिया
पठाउनुहोस्

रातिदेखि अर्घाखाँची 'लकडाउन'

वीरेन्द्र केसी

अर्घाखाँची — कोरोना संक्रमण सतर्कता अपनाउन अर्घाखाँची जिल्लालाई सोमबार रातिदेखि 'लकडाउन' गरिने भएको छ ।

प्रमुख जिल्ला अधिकारी विजयराज पौडेलको अध्यक्षतामा बसेको सर्वदलीय, सर्वपक्षीय बैठकले जिल्लामा प्रवेश गर्ने मालबाहक गाडीबाहेक अन्य निजी सार्वजनिक, भाडाका सवारीसाधन र मोटरसाइकल पनि रातिदेखि अर्को सूचना नभएसम्मका लागि पूर्णरुपमा आवतजावतमा प्रतिबन्ध लगाइएको छ।
मालबाहक सवारी साधनलाई भने प्रतिबन्ध लगाइएको छैन । मालबाहक गाडीमा चालक र सहचालकमात्रै बस्न पाउनेछन् । चालक र सहयोगीलाई चेकजाँच गरी आवश्यक परेमा क्‍वारेन्टाइनमा राख्ने निर्णय भएको सहायक प्रमुख जिल्ला अधिकारी विष्णुराज बेल्वासेले बताए ।

बैठकमा राष्ट्रियसभा सदस्य चन्द्रबहादुर खड्का, प्रदेशसभा सदस्य चेतनारायण आचार्य, कांग्रेस जिल्ला सभापति विष्णु मुस्कानलगायत दलका नेता, उद्योगी, व्यावसायी, यातायात, निर्माण व्यावयासी, सञ्‍चारकर्मीलगायत सरोकारवाला उपस्थिति रहेको थियो ।

औषधि र पेट्रोलपम्प २४ सौं घण्टा खुला रहनेछन् । खाद्यान्‍न, ग्यास, तेल, फलफुल पसल प्रत्येक बिहान १० देखि २ बजेसम्म मात्रै खुला हुनेछन् । दुधडेरी, सागसब्जी बिहान ६ देखि ९ र बेलुका ४ देखि ७ बजेसम्म सञ्‍चालन हुनेछन् । ठेलागाडी, आइसक्रिम, निर्माणको काम पूरै प्रतिबन्ध लगाइएको छ ।

भारत र स्वदेशका अन्य ठाउँबाट आउनेलाई गाउँमा घरपरिवारसँगै नबसी १४ दिनसम्म घरकै क्‍वारेन्टाइनमा बस्‍न अनुरोध गरिएको छ । जिल्लाका ६ वटै पालिकाका जनप्रतिनिधिले सचेतना अभियान सञ्चालन गरेका छन् । मालारानी र पाणिनी गाउँपालिकाले आफ्ना पालिकाभरी माइकिङ गरेका छन् । मालारानीले मदिरा बिक्री वितरण र सेवनमा रोक लगाएको पालिका अध्यक्ष बालकृष्ण आचार्यले बताए ।

प्रकाशित : चैत्र १०, २०७६ १२:५६
पूरा पढ्नुहोस्
प्रतिक्रिया
पठाउनुहोस्
×