पुल बन्यो, सडक छैन
बर्दिया — पाँच वर्षअघि राजापुरस्थित कर्णाली नदीको सत्तीघाटमा निर्माण भएको पुल सडक अभावले अलपत्र छ । सडक नहुँदा बर्दिया र कैलाली आउजाउ गर्ने सवारी साधनले पुलको उपयोग गर्न पाएका छैनन् ।
बर्दियातर्फ करिब सात सय मिटर क्षेत्रफलमा रहेको सामुदायिक वनका रुख र बुट्यानका कारण सडक निर्माण रोकिएको हो । अहिले तीन सय बढी रुख काटिए पनि सडक निर्माण भएको छैन । गत असारमै सडक निर्माण सुरु गर्ने बताए पनि अहिलेसम्म काम भएको छैन । सडक निर्माण भएपछि बर्दियाबाट कैलालीको टीकापुर जोड्ने सडक छोटो हुनेछ । अहिले चिसापानी हुँदै कैलाली जानुपर्ने बाध्यता छ ।
बर्दिया र कैलालीसम्म पाँच किमि कालोपत्रे सडक निर्माणका लागि ६ करोड रुपैयाँको ठेक्का भएको हो । कैलालीतर्फको ४ हजार ३ सय मिटर सडक कालोपत्रे भएको छ । कर्णाली नदीमा झण्डै ४५ करोडको लागतमा पुल निर्माण भएको छ । कैलालीको टीकापुर हुँदै पश्चिम जाने सबै भन्दा छोटो उक्त सडक निर्माण भएपछि आर्थिक, पर्यटन, व्यापारिक लगायत कारोबार बढ्ने स्थानीयको आशा छ ।
सम्झौता विपरीत हुलाकी सडक आयोजनाले बर्दिया र कैलालीस्थित सत्तीघाटमा निर्मित कर्णाली नदीमा पुल जोड्ने पुरानो बाटोलाई कायम नगरी अन्यत्र निर्माण गर्न थालेपछि ढिलासुस्ती भएको ठेकेदार कम्पनीको भनाइ छ । आयोजना प्रमुख युवराज पोखरेलका अनुसार रुख काटिसकेकाले असार मसान्तभित्र सडक निर्माण पूरा हुने बताए । पुल निर्माण सम्पन्न भए पनि सडक सन्जालले नजोडिंदा सर्वसाधारणलाई आउजाउमा समस्या भएको छ ।
प्रकाशित : फाल्गुन २१, २०७६ १०:३६
