टिपरको ठक्करबाट मोटरसाइकल चालकको मृत्यु
भैरहवा — टिपरको ठक्करबाट भैरहवा–लुम्बिनी सडकखण्डमा मंगलबार एक मोटरसाइकल यात्रुको ज्यान गएको छ।
भैरहवाबाट पश्चिमतर्फ जाँदै गरेको लु १ ख ३३१४ नम्बरको टिपरले सोही दिशातर्फ जाँदै गरेको लु २ प १८७९ नम्बरको मोटरसाइकललाई भैरहवा–लुम्बिनी सडक खण्डमा पर्ने बनकसीयामा ठक्कर दिँदा मोटरसाइकल यात्रुको मृत्यु भएको हो ।
प्रहरीका अनुसार मृत्यु हुनेमा मायादेवी गाउँपालिका–२ भिलरहवा निवासी ६० वर्षीय रमेश लोध रहेका छन् । घटना पश्चात इलाका प्रहरी कार्यालय लुम्बिनी र जिल्ला प्रहरी कार्यालयबाट खटिएको प्रहरी टोलीले टिपर नियन्त्रणमा लिएको र टिपर चालक फरार रहेकाले उनको खोजी जारी रहेको रुपन्देहीका डीएसपी खड्कबहादुर खत्रीले बताए ।
प्रकाशित : फाल्गुन ६, २०७६ १६:५८