दुई वर्षमा प्रदेश ५ को सभाले पारित गर्‍यो ४८ विधेयक- प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

दुई वर्षमा प्रदेश ५ को सभाले पारित गर्‍यो ४८ विधेयक

घनश्याम गौतम

रूपन्देही — प्रदेश ५ को सभाले दुई वर्षमा ४८ वटा विधेयक पारित गरेको छ । पारित विधेयक प्रमाणित पनि भएका छन् । प्रदेशसभा स्थापना भएको दुई वर्ष पुगेको अवसरमा मंगलबार आयोजित कार्यक्रममा प्रदेश ५ मा चार अधिवेशन सकिएका र ति अधिवेशनले ४८ विधेयक पारित गरेको जानकारी दिइएको हो । 

प्रदेशसभा सचिवालयका सचिव दुर्लभकुमार पुनले प्रदेशसभा शुरु भएपछिको ७ सय ३० दिन मध्ये ४ अधिवेशनका १ सय ८ दिनमा १ सय १५ वटा बैठक भएका जानकारी दिए । अहिलेसम्म १ सय ३२ घण्टा २६ मिनेट बैठक बसेको जानकारी उनले दिए ।


विधेयक छलफलका लागि प्रदेशसभाले ६ विषयगत समिति बनाएको छ । स्थापना दिवसको कार्यक्रम प्रदेश प्रमुख धर्मनाथ यादवले गमलाको बिरुवामा पानी राखेर सुरुवात गरे । प्रदेश ५ मा २०७४ माघ ७ गते प्रदेशसभा सदस्यले सपथ लिएका थिए । माघ २१ गते पहिलो बैठक बसेको थियो । पहिलो बैठक बसेको दिनलाई सचिवालयले गतवर्ष देखि प्रदेश स्थापना दिवस मनाउन सुरु गरेको थियो ।


प्रदेश सरकारले भने मुख्यमन्त्रीले सपथग्रहण गरेको दिनलाई प्रदेश स्थापना दिवस घोषणा गरेर फागुन ३ लाई स्थापना दिवस मनाउने गरेको छ ।


स्थापना दिवसकै अवसर पारेर प्रदेशसभा सचिवालयका पूर्वसचिव सुरेन्द्रप्रसाद अर्याल, मानबहादुर वीके र प्रेमप्रसाद भट्टराईलाई सम्मान गरियो । त्यस्तै सचिवालयका तर्फबाट शाखा अधिकृत पुनाराम पौडेल, नासु बिवस बोहोरा, हलुका सवारी चालक रमानसिंह पुन र लक्ष्मी गौतम, मर्यादापालकबाट लुटजंग खड्कालाई पुरस्कृत गरिएको थियो ।

प्रकाशित : माघ २१, २०७६ १८:०९
प्रतिक्रिया
पठाउनुहोस्

राष्ट्रपति उम्मेदवार चयनमा प्रविधिले धोका दिएपछि...

एजेन्सी

आयोवा — अमेरिकी डेमोक्र्याटिक पार्टीको आयोवा राज्यमा भएको राष्ट्रपति चयनको प्रारम्भिक चुनावी नतिजा सार्वजनिक कार्यक्रम प्राविधिक समस्याका कारण स्थगन भएको छ । मोबाइल एपको रिपोर्टिङ प्रणालीमा देखिएको समस्याले पार्टीका नेता एवं समर्थकहरू निराश भएका छन् ।

आयोवा डेमोक्र्याटिक पार्टीले मंगलबार अपराह्न मात्र प्रारम्भिक नतिजा सार्वजनिक गर्ने जनाएको छ । पार्टीले मतपत्र मार्फत भएको मतदान र विद्युतीय मतदानलाई जाँच गरेर मात्र नतिजा सार्वजनिक गर्ने स्पष्ट गरेको छ ।

पार्टीका अध्यक्ष ट्रोए प्राइसले कम्प्युटर प्रणाली ह्याक वा कुनै अवरोधका कारण नभई रिपोर्टिङमा मात्र समस्या देखिएको बताए । नयाँ मोबाइल एपमा समस्या रहेको पार्टीका समर्थकहरूले पहिल्यै औंल्याएका थिए । पार्टीले नतिजामा गडबडी नहोस् भन्नका लागि एक एक गरी मतपत्र गणना गर्न निर्देश दिएको छ ।

डेस मोइन्स काउन्टीका डेमोक्र्याटिक पार्टीका अध्यक्ष टम कर्टनीले पनि मोबाइल एपमा समस्या देखिएको भन्दै मतदाताले गुनासो गरेको बताए । समस्याका बारेमा जानकारी गराए पनि पार्टीको केन्द्रीय कार्यालयले चित्तबुझ्दो जवाफ नदिइएको समाचारहरूमा जनाइएको छ ।

अमेरिकी राष्ट्रपतिको उम्मेदवार हुन बर्नी स्यान्डर्स, जो बाइडेन, पिट बुटिगीगसमेतका वरिष्ट नेता आयोवाको प्रारम्भिक नतिजालाई व्यग्रताका साथ पर्खिरहेका छन् ।

यसैबीच, अमेरिकी राष्ट्रपति डोनाल्ड ट्रम्पका सहयोगीहरूले डेमोक्र्याटिक पार्टीभित्र फेरि प्रारम्भिक चुनावमा धाँधली हुन लागेको भन्दै व्यंग गरेका छन् ।

प्रकाशित : माघ २१, २०७६ १८:०५
पूरा पढ्नुहोस्
प्रतिक्रिया
पठाउनुहोस्
×