आत्मनिर्भर बन्न सीप

सन्जु पौडेल

(तिलोत्तमा) — बाल्यकालको रहरले नृत्यांगना बनेकी दिया थापा अहिले पनि नृत्य कार्यक्रममै व्यस्त छन् । ३५ वर्षको उमेरमा पनि मञ्चको रोजाई र कार्यक्रमप्रतिको लगावले उनलाई छोडेको छैन । थुप्रै दर्शक र प्रशंषक कमाएकी छन् । ‘कार्यक्रममा नाच्न निम्तो आउँछ, कलाको सम्मानले दिने पारिश्रमिकमा खुसी नै छु,’ उनले भनिन् । बाल्यकालमा उनको नाम दया थियो । अहिले उनी आफूलाई दियाबाट परिचित गराउँछिन् । 

ZenTravel

बाल्यकाल देवदहको केउलीमा बिताएकी उनी विगत ७ वर्षदेखि नवलपरासीको महेशपुरमा छिन् । नवलपरासीबाट बुटवल आएर फेसन डिजाइनिङको तालिम लिइरहेकी छन् । यसबाट सिकेर आफूजस्तै साथीलाई सिकाउने र नृत्य गर्दा चाहिने पहिरन उत्पादन र बिक्रीका लागि उद्यमी बन्ने उनको सोच छ । ‘सधैं अरूको भर पर्नुभन्दा आफ्नै सीपले व्यावसायिक बन्छु,’ उनले भनिन्, ‘उद्यमीकै नाममा परिचित हुने चाहनालाई पूरा गर्न यो सहयोगी बन्नेछ ।’

Meroghar


बुटवलका प्रशान्त थापा उमेरले २० पुगे । १० कक्षासम्मको अध्ययनपछि उनले पढाइ छोडे । नृत्यमा रुचि भएका उनले बुटवलस्थित जुनतारा रेस्टुराँ एन्ड बारमा नृत्य गर्थे । ‘एक वर्षअघि धेरै पैसा दिने भन्दै लोभ देखाए, भारतमा नाच्न गएँ,’ उनले भने, ‘तीन महिनामै फर्किएँ ।’ त्यहाँका विवाहमा नाच्नेले दुर्व्यवहार गरेपछि फर्किएको उनले बताए । विद्यालयमा पढ्दा साथीले केटा भएर पनि केटीजस्तो गर्छ भनेर जिस्क्याउने गरेको उनी सम्झन्छन् । आफूलाई आफ्नैबारे प्रष्ट थाहा नहुँदा धेरैको मजाक र घृणाको पात्र बनेको उनले सुनाए । नयाँ कपडा लगाउन सौखिन उनलाई तालिमले उत्साह थपेको छ ।

‘बुटिक सञ्चालन गर्नेगरी दक्ष बन्न सकेमा आम्दानी र पहिचान दुवै हुनेछ,’ उनले भने, ‘मेहनत गरेर सीप सिक्नेछु र उद्यमी बन्नेछु ।’ मोडलिङ र कोरियोग्राफीमा अघि बढेका रेशम न्यौपाने ‘रेश्मा’ नामबाट परिचित छन् । २०१५ मा मिस डायमन्ड नेपालको ताज जितेपछि उनले आफ्नो पहिचान खुलाएको बताइन् ।

‘महिला र पुरुषभन्दा फरक भए पनि दक्षताका हिसाबले हामीले पनि गर्नसक्ने क्षमता राख्छौं,’ उनले भनिन् । बुटवल उपमहानगरपालिकासँगको सहकार्यमा संयुक्त राष्ट्रसंघीय विकास परियोजना (यूएनडीपी)ले बुटवलमा तीनमहिने फेसन डिजाइनिङ तालिम दिइरहेको छ । बुटवल टेक्निकल इन्स्टिच्युटले त्यसमा सहजीकरण गरेको छ । तालिममा नवलपरासी, कपिलवस्तु र रूपन्देहीका यौनिक तथा लैंगिक अल्पसंख्यकलाई सहभागी गराइएको संस्थाको प्रदेश ५ का फिल्ड प्रमुख सुदीप अर्यालले बताए ।

प्रकाशित : माघ ४, २०७६ ०९:४२
ADVERTISEMENT
प्रतिक्रिया
पठाउनुहोस्

जग्गा बसपार्कलाई दिएको १६ वर्षसम्म ‘तिरो’

बसपार्क बनाउने खण्ड र आफूले पाउने जग्गाको कित्ताकाट नहुँदा उपभोक्ताले नियमित कर तिर्दै आएका छन्
प्रकाश बराल

(बागलुङ) — सोह्र वर्षअघि बसपार्क बनाउन जग्गा दिएका यहाँका मोहीले अझै मालपोत शुल्क तिरिरहेका छन । कित्ताकाट नभएपछि नियमित शुल्क तिर्नुपरेको उनीहरूले गुनासो छ । बसपार्क बनाउने खण्ड र उपभोक्ताले पाउने जग्गाको अहिलेसम्म कित्ताकाट भएको छैन । 

यहाँका ५१ जना उपभोक्ताले दिएको झण्डै सय रोपनी जमिन छ । त्यो मध्ये ५९ रोपनी जमिनमा बसपार्क र अन्य संरचना बनाउने लक्ष्य छ । सदरमुकामस्थित बागलुङ नगरपालिका–४ को उपल्लाचौरको जमिन अब्बलको कर तिर्ने गरेको स्थानीयले बताए ।

२०५९ सालमा जग्गा दिएपछि जमिनमा किसानले खेतीपाती लगाउन पाएका छैनन् । ‘कुन खण्डमा काम हुने हो, कुन खण्ड घडेरीको रुपमा पाउने हो त्यो पनि थाहा भएन,’ स्थानीय खड्गबहादुर जिसीले भने, ‘वर्षौंदेखि खेत बाँझो छ, न उत्पादन गर्न पाइन्छ, न अन्य संरचना गर्न पाइन्छ, बरु कर भने तिरेकै छौं ।’ बसपार्क बनेपछि जग्गादातालाई एकएक वटा घडेरी मिलाइदिने भन्दै बागलुङ नगरपालिकाले जिम्मा लिएको थियो ।

तत्कालै बसपार्क बन्ने भयो भनेर स्थानीयले खेती गर्दागर्दैको जग्गा नगरपालिकालाई दिएका थिए । अघिल्लो वर्ष ठेक्का लगाए पनि चालु वर्षमा बसपार्कको काम सक्ने योजना सफल भएन । अहिले बसपार्कको ३५ प्रतिशत मात्र काम सम्पन्न भएको अनुमान छ । समय भने सकिएर म्याद थप भएको छ । थपिएको म्याद अनुसार चालु आर्थिक वर्षभित्र काम सकिनुपर्छ । कित्ताकाट नभएकै कारण आफ्नो भागमा कुन घडेरी पर्छ भन्ने समेत मोहीले थाहा पाएका छैनन् । घडेरी थाहा पाउन नसक्दा बेच्न पनि नपाएको स्थानीय कोपिला केसीले बताइन् । ‘बालबालिका पढ्नका लागि चाहिने खर्च ऋणमा चलेको छ,’ उनले भनिन्, ‘वर्षौंसम्म अन्योलमा पारेर के गर्न खोजिएको हो ?’ बसपार्क प्राविधिक कारणले नबनेको भन्दै म्याद थपेपछि स्थानीय झनै सशंकित भएका छन् ।

नगरविकास कोषको ऋण सहयोगमा निर्माण गर्न लागिएको बसपार्क आशिष फेवा संयुक्त निर्माण कम्पनीले गत वर्षदेखि निर्माण गरिरहेको छ । तोकिएको समयमा काम नसकेपछि गत कात्तिकमा म्याद थप भएको हो । ७ करोड ६६ लाख ९९ हजार रुपैयाँमा बसपार्क निर्माणको काम भइरहेको छ । बसको पार्किङ, टर्मिनल भवन, शौचालय, खानेपानी र दोहोरो ट्रयाक १७ रोपनीमा बन्नेछ । बाँकी जमिनमा जग्गादाताको लागि कम्तीमा साढे २ आनादेखि ५ आनासम्मका १२७ घडेरी बनाइने योजना छ ।

नगरपालिकाले जग्गा व्यवस्थापन समितिसँग सम्झौता गरेकोले जनताले कर तिर्नु नपरेको वडाध्यक्ष ध्रुबबहादुर केसीले दाबी गरे । ‘जनताले समयमा जग्गा फिर्ता नपाएको भने हो, कर त समितिले तिरेको छ,’ केसीले भने, ‘स्थानीयले कुरा नबुझेर होला ।’ समिति निर्माण व्यवस्थापन हेर्नमात्र भएकोले कित्ताकाट नभएको जमिनको कर आफैले तिरेको स्थानीयको दाबी छ ।

प्रकाशित : माघ ४, २०७६ ०९:३९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×