धरौटी बुझाएर छुटे लगत्तै चन्द समूहका दुई नेता पुनः पक्राउ
दाङ — धरौटी बुझाएर छुटे लगत्तै नेत्रविक्रम चन्द समूहका दुई नेताहरुलाई प्रहरीले पुनः पक्राउ गरेको छ । चन्द समूहको भातृ संगठन दलित मुक्ति मोर्चाका जिल्ला अध्यक्ष सुरज परियार र नेता विष्णुबहादुर रावतलाई दाङ देउखुरी जिल्ला अदालतमा आज धरौटी बुझाएर निस्कने क्रममा प्रहरीले पुनः पक्राउ गरेर हिरासतमा राखेको हो ।
उनीहरुलाई पुनः अर्को मुद्दामा कारबाही गर्ने उदेश्यले पक्राउ गरिएको हो । गत असोज ३० गते पार्टीका मध्य कमाण्ड ईन्चार्ज बिरजन्जसहित २१ जना चन्द समूहका नेताहरुलाई राजपुरको मगराइनाबाट प्रहरीले पक्राउ गरेको थियो ।अदालतले उनीहरूलाई जनही १५ हजार धरौटीमा छोड्न आदेश दिएको थियो । तर फेरि पक्राउ पर्ने देखिएपछि उनीहरु सबै कारागार जाने निधो गरेका थिए । त्यसकाे केही दिन पहिले ४ जना नेताहरु धरौटी तिरेर निस्कने क्रममा प्रहरीले लछारपछार गर्दै पुनः नियन्त्रणमा लिएर कपिलबस्तु पुर्याएको थियो ।