हिउँदे वर्षाले किसान खुसी

माधव अर्याल

पाल्पा — शुक्रबार सबेरैदेखि शनिबार बिहानसम्म परेको पानीले पहाडमा चिसो बढाएको छ । पहाडी भेगका किसान भने वर्षासँगै खुसी भएका छन् । वर्षाले किसानलाई राहत मिलेको र बालीनाली सप्रिनुका साथै हिउँदे बाली राम्रो हुने उनीहरूले बताए । सिमसिम परेको पानीले खेतबारीमा लगाएको बालीनाली, तरकारी खेतीलाई धेरै राम्रो भएको माथागढी–३, ओलेसका कृष्णबहादुर रानाले बताए ।

‘गत असोजपछि पानी नै परेको थिएन । जसले गर्दा खेतबारी सुख्खा थियो,’ उनले भने, ‘मसुरोले भुइँ छाड्न सकेको थिएन । फुलेको तोरी पनि सप्रिन पाएको थिएन । वर्षाले अन्नबाली र तरकारीलाई धेरै राहत मिलेको छ ।’ तानसेन नगरपालिका कुन्सरेका किसान टंकनाथ ढकालका अनुसार लामो समयदेखि पानी नपर्दा खेतबारी जोत्न नसकिने अवस्थामा पुगेको थियो । सुख्खा बढेकाले यस वर्ष तरकारी र हिउँदे अन्नबाली नहुने अवस्थामा थियो ।


अहिले परेको पानीले धेरै राहत दिएको उनले बताए । ‘लगाएको बालीलाई अहिलेको आकाशे पानी अमृतसमान भएको छ,’ उनले भने, ‘तरकारी, तोरी, गहुँका लागि धेरै राहत मिलेको छ ।’ अब हिउँदे बाली लगाउन खेतबारी जोत्ने काम हुने बताए । लगाइसकेको आलु, गहुँ, मसुरो, केराउजस्ता बालीका साथै बेमौसमी तरकारीलाई समेत अहिलेको पानीले राहत पुग्ने उनले सुनाए ।


कृषि प्राविधकका अनुसार अहिलेको वर्षाले कुलो नलाग्ने खेतमा लगाएको अन्नबालीलाई राम्रो हुन्छ । जिल्लाका अधिकांश खेतमा कुलो लाग्दैन । यस वर्ष पानी कम परेकाले खोलामा समेत पानी कम हुँदै गएकाले १८ घण्टासम्म परेको सिमसिम पानीले राहत पुगेको हो । गहुँ र तरकारी लामो समयसम्म पानी नपरेपछि सुक्न थालेको अवस्थामा पानी परेपछि किसान खुसी भएका हुन् ।


समयमै पानी परेपछि यस वर्ष लगाएको तरकारीका साथै फलफूल राम्रो उत्पादन हुने पूर्वखोला–६, हेक्लाङका व्यावसायिक किसान जितबहादुर रानाले बताए । गाउँका कतिपय स्थानमा यतिबेला लगाएको तरकारी पानी नपाएर सुक्ने अवस्थामा पुगेको थियो । ‘असोजदेखि आकासे पानी देख्न पाइएको थिएन,’ उनले भने, ‘खोजेकै बेलामा आकासे पानी आएको छ ।’


हिउँदयामको सुरुवातसँगै भएको वर्षाले किसानमा खुसीयाली छरेको किसान रानाले बताए । कात्तिक अन्तिम तथा मंसिर पहिलो साता छरेको गहुँ तथा अन्य दलहन बालीलाई सिंचाइ गर्नुपर्ने बेला भएको थियो । ‘गहुँबाली सिंचाइ गर्नुपर्ने भएको थियो,’ हेक्लाङकी किसान रम्भा घर्तीले भनिन्, ‘यही बेला पानी पररे निकै फाइदा भयो ।’


जिल्लाको रामपुर, माडी, झडेवा, कालीगण्डकी बेसी, कचल, अर्गली, सर्देवालगायत फाँटमा गहुँ र तरकारी बाली लगाएका छन् । पूर्वखोला, अरूणखोलालगायत स्थानमा लगाएको गहुँ, तोरीले पनि ठीक समयमा पानी पाएको निस्दी, ज्यामिरेका किसान रमण सारुले बताए ।


‘अहिलेको वर्षाले गहुँ, दलहन र तरकारी खेतीलाई धेरै फाइदा पुग्छ,’ कृषि प्राविधिक सम्झना भट्टराईले भनिन्, ‘आकासको पानीले सिंचाइमा ठूलो सहयोग पुगेको छ ।’ पाक्न लागेको तोरी, खन्ने बेला भएको आलुलाई भने यसले असर गर्छ ।

प्रकाशित : मंसिर २९, २०७६ १३:३२
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

दलित विद्यार्थीलाई शैक्षिक सामग्री

कान्तिपुर संवाददाता

प्यूठान — प्यूठान नगरपालिकाले नगरभित्रका दलित र जनजाति समुदायका बालबालिकालाई शैक्षिक सामग्री प्रदान गरेको छ । शिक्षामा सबैको पहुँच पुर्‍याउने उद्देश्यले लक्षित वर्गको बजेटले शैक्षिक सामग्री प्रदान गरिएको हो । नगरभित्रका १ सय ५० बालबालिकालाई शनिबार झोला, कापी, पोसाक प्रदान गरिएको नगर प्रमुख अर्जुनकुमार कक्षपतिले बताए ।

नगरभित्रका १० वटै वडाका जेहेन्दार विद्यार्थीलाई शैक्षिक सामग्री प्रदान गरेको नगरपालिकाले जनाएको छ । शैक्षिक सामग्री वितरणका लागि दलिततर्फको एक लाख र जनजातितर्फको ५० हजार रुपैयाँ खर्च गरिएको हो । नगरपालिकाले यस आर्थिक वर्षबाट विद्यालयले विभिन्न बहानामा विद्यार्थीबाट असुल्ने शुल्क अत्य गर्ने कार्यक्रमसमेत बनाएको कक्षपतिले सुनाए ।

‘नगरमा पूर्णरूपमा निःशुल्क शिक्षा कार्यक्रम लागू गरेका छौं,’ नगर प्रमुख कक्षपतिले भने, ‘विद्यार्थीले कुनै पनि शुल्क विद्यालयलाई तिर्न पर्दैन ।’ यसका लागि नगरपालिकाले तीन करोड रुपैयाँ बजेट विनियोजन गरेको उनले बताए ।

छोराछोरीका लागि नगरपालिकाले नयाँ झोलासहित कापी–कलम उपलब्ध गराएकामा खुसी लागेको अभिभावकले बताए । प्यूठान नगरपालिका–४ की शान्ता नेपालीले कार्यक्रम राम्रो रहेको बताइन् । ‘छोरो विशाललाई लिएर आएकी थिएँ,’ उनले भनिन्, ‘कापी–कलम र लुगाफाटो पाउँदा खुसी भएँ ।’

प्रकाशित : मंसिर २९, २०७६ १३:३१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×