पहिरोले बेनी–जोमसोम सडक अवरुद्ध
म्याग्दी — स्तरवृद्धि भइरहेको बेनी-जोमसोम सडकमा झरेको पहिरोले यातायात अवरुद्ध भएको छ । शुक्रबार बिहानैदेखि परेको झरीपछि सदरमुकाम बेनीदेखी २३ किमी उत्तर अन्नपूर्ण गाउँपालिका-३ दानाको गुइँठेमा झरेको पहिरोले यातायात पूर्ण अवरुद्ध भएको हो ।
सडकदेखि माथिको करिव ५० मिटर लामो भीर झरेर सडक पुरेको हो । सडक अवरुद्ध भएपछि म्याग्दी–मुस्ताङ सोझो सडक यातायात टुटेको छ ।
‘स्तर उन्नत भइरहेको बेनी-जोमसोम सडकको गुइँठेमा पहिरो झरेकोले याायात अवरुद्ध छ । २ वटा डोजरले पहिरो पन्छ्याउने काम भइरहेको छ, शनिबार साँझसम्म पहिरो हटाएर यातायात खोल्न सकिन्छ कि भन्ने अनुमान छ,’ सडक विभागका सडक हेर्ने सुपरभाइजर इन्द्रसिं शेरचनले बताए ।
प्रकाशित : मंसिर २८, २०७६ १०:३०प्रतिक्रिया