कान्तिपुर वेबसाईट
AdvertisementAdvertisement

भ्रमण वर्ष २०२० : पर्यटकीय गन्तव्यको प्रचार

कान्तिपुर संवाददाता

रुपन्देही — प्रदेश सरकारले भ्रमण वर्ष अवधिभर यस क्षेत्रका नयाँ पर्यटकीय गन्तव्यको प्रचारप्रसार गर्ने जनाएको छ । स्थापित पर्यटकीय क्षेत्रमा पाहुनालाई सहुलियत प्रदान र नयाँ गन्तव्य पहिचान गरेर प्रचारप्रसार गरिने प्रदेश पर्यटन मन्त्रालयले जनाएको छ । धेरै पर्यटक भित्रयाउने लक्ष्यलाई सघाउने उद्देश्यले काम गरिरहेको मन्त्रालयले जनाएको छ । 

प्रदेशस्थित उद्योग, पर्यटन, वन तथा वातावरण मन्त्रालयले भ्रमण वर्ष २०२० को तयारी स्वरुप लुम्बिनी भ्रमण वर्ष मनाइरहेको जानकारी दिएको छ । लुम्बिनी प्रदेशको मुख्य पर्यटकीय केन्द्र र विश्वकै चासोको स्थान भएकाले भ्रमण वर्ष मनाइएको मन्त्रालयका अधिकृत गणेश घिमिरे बताए । यस अवधीमा लुम्बिनीको मुलुकका विभिन्न जिल्लामा पुगेर प्रचार गरिएको उनले बताए । ‘पर्यटकीय स्थलको उजागर गर्नु भ्रमण वर्षको उद्देश्य हो,’उनले भने, ‘त्यसैले घुम्न जाऔं बर्दिया नारा राखेर भ्रमण वर्षको उद्घाटनस्थलका रुपमा बर्दिया रोजिएको छ ।’ पर्या–पर्यटन बिकास समिति ठाकुरद्धाराले बर्दिया भ्रमण वर्ष मनाइरहेको छ । स्थानीय व्यवसायी मुलुकका प्रमुख गन्तव्यमा पुगेका थिए । ‘बर्दिया जिल्ला पर्या–पर्यटन गन्तब्य हो,’ उनले भने, ‘त्यहाँ रहेका थारु समुदायका होमस्टे र संस्कृति पर्यटकले मन पराउँछन् ।’


घिमिरेका अनुसार बर्दियामा पाटे बाघ सजिलै देख्न सकिन्छ । हात्ती र जीप सफारीमा आकर्षण रहेको छ । बर्दिया जाने पर्यटकले प्रकृती र संस्कृतिलाई नियाल्न पाउने भएकाले भ्रमण वर्षको त्यहीबाट सुरुवात गर्न लागिएको उनले बताए । यसअघि लुम्बिनी भ्रमण वर्ष मनाउने क्रममा ठूला कार्यक्रम बुद्ध जन्मस्थलमा आयोजना गरिएका थिए ।


नेपाल भ्रमण वर्षकालागि केन्द्रबाट स्पेशल प्याकेज बनाउन सिफारिस गरिएको उनले जनाए । स्वर्गद्धारी प्रदेशको अर्को महत्वपूर्ण पर्यटकीय गन्तव्य हो । त्यहाँ भारतीय धर्मावलम्बीको आस्था जोडिएको छ । त्यहाँ श्रद्धालुले महाभिषेक गर्नेगरी प्याकेज तयार गरिएको उनले बताए । १६ मन्त्र उच्चारण गरी जल शेचन गरेपछि महाअभिषेक हुने भएकाले त्यही अनुसार तयारी पुरा भएको छ । भारतका बिहार र उत्तर प्रदेश लक्षित गरी १ लाख पर्यटक ल्याउने कार्यक्रम तय भएको छ ।


पूर्वी रुकुमको कमलदहमा आकर्षण बढेको छ । अहिले मध्यपहाडी लोकमार्गको स्तरोन्नती भइरहेको छ । उक्त मार्गबाट पोखरा आउने पर्यटक बुर्तीबाङ हुंदै कमलदह र सिस्ने हिमालसम्म पुगुन् भन्ने प्रदेश सरकारको लक्ष्य छ । ‘त्यसका लागि प्याकेज बनाउन केन्द्रमा सिफारिस गरिएको छ । त्यसले पोखरामा आउने पर्यटकलाई सहज अआवागमन हुने र हिमाल र प्रकृतिको मनोरम दृश्य अवलोकन गर्दै रमाउन पाउने छन्,’ उनले भने, ‘यसअन्तर्गत ढोरपाटन शिकार आरक्ष रहेको छ ।’


यस बाहेक प्रत्येक जिल्लामा २१ सदस्यीय जिल्ला पर्यटन प्रवर्द्धन समिती गठन गरिएको छ । प्रत्येक स्थानीय तहमा ११ सदस्यीय प्रचारप्रसार समिती बनाउनका लागि पत्राचार गरिसकिएको उनले बताए । केही दिनमा स्थानीय तह र जिल्लामा संरचना गठन हुनेछन । प्रदेश स्तरीय पर्यटन समिति रहेको छ । छिट्टै ११ सदस्यीय सचिवालय समिती बनाएर काम गर्ने तयारी छ । यसका लागि केन्द्रबाट २५ लाख रुपैयाँ प्राप्त भएको भएको छ । मन्त्रालयअन्तर्गतको २ करोड रुपैयाँ जिल्लागत कार्यक्रम, प्याकेज निर्माणमा खर्च गर्नका लागि विनियोजन भइसकेको छ ।


भ्रमण वर्षका प्रदेश संयोजक माधवप्रसाद नेपालले गन्तव्यको प्रचारका लागि १२ वटै जिल्लाका ब्रोसर, भिडियो डकुमेन्ट्री, होर्डिङ बोर्ड, प्रदेश पर्यटकीय प्रोफाइललगायतका काम यही वर्ष गरिने बताए । ‘विभिन्न कार्यक्रम हुनेछन् । पर्यटन क्षेत्रमा काम गर्ने हरेक व्यवसायीले आफ्नै दायित्व ठानेर काम गर्नुपर्नेछ,’ उनले भने, ‘आउने पर्यटकको बसाई लम्ब्याउन विभिन्न छुट तथा सरसफाईमा विशेष ध्यान दिनुपर्ने देखिन्छ । विभिन्न जिल्ला पुगी व्यवसायीलगायत सरोकारवालासँग छलफल भइरहेको छ ।’ यसैबीच पर्यटक आउने समयमा कस्तो खालको आतिथ्यता प्रदान गर्न सकिन्छ भन्ने विषयमा एउटा प्रशिक्षण गर्ने तयारीमा रहेको उनले बताए । ‘पर्यटनसित आबद्ध सबै संघसंस्थाले मिलेर साथ दिए सफल भइन्छ,’ उनले भने ।

प्रकाशित : मंसिर २२, २०७६ १०:२५
प्रतिक्रिया
पठाउनुहोस्

बढी भाडा लिँदै एसी बस

अमृता अनमोल

(बुटवल) — बुटवलकी आशा गुरुङले शनिबार काठमाडौं जान पश्चिम नेपाल लु१ख ४४६९ नम्बर बसको टिकट एक हजार रुपैयाँमा किनिन् । टिकट झन्डै दोब्बर महँगो भएपछि उनले सोधपुछ गर्दा एसीसहित सेमी सिल्पर सुविधा भएको जवाफ पाइन् । 

बुटवलदेखि काठमाडौं २ सय ५९ किलोमिटर छ । त्यसमा सरकारले ५ सय १९ रुपैयाँ भाडादर तोकेको छ । यातायात सञ्चालन नियमावलीमा सवारी साधनको सेवाको गुणस्तर अनुसार न्युनतम भाडामा २० प्रतिशत मूल्य थपेर डिलक्स र डिलक्समा २० प्रतिशत थपेर एसी बस संचालन गर्न पाउने व्यवस्था छ । जसअनुसार डिलक्स बसले ५ सय १९ रुपैयाँको २० प्रतिशत धेरै अर्थात ६ सय २२ रुपैयाँ ८० पैसा लिन पाउँछन् । एसी बसमा डिलक्सको २० प्रतिशत धेरै अर्थात् ७ सय ४७ रुपैयाँ ३६ पैसा भन्दा धेरै लिन पाइदैन । तर, यात्रुले एसी बसका नाममा झण्डै दोब्बर भाडा तिर्न बाध्य छन् । पश्चिम नेपाल र सिद्धार्थ यातायात प्रालिले यति ट्राभल्स, मन्जुश्री यातायात, रकेट यातायात, ग्लोबल एसी, सलिना मेटो, मिरा बुलेटलगायतका नाममा मिलेमतोमा एसी बसको भाडादर कायम गरेका छन् ।

सरकारले सार्वजनीक सवारी साधनमा हुने मिलेमतो हटाउन सिन्डीकेट खारेज गरेपनि व्यवसायीले अहिलेपनि मिलेमतोमै भाडा र सवारी साधन तय गर्ने गर्छन् । पछिल्लो समय यातायात व्यवसायीले एसी बसका नाममा मनपरी भाडा असुल्न थालेका हुन् । अर्को विकल्प नहुँदा साविक भाडाको दोब्बर बढी रकम असुल्दा पनि यात्रु यात्रा गर्न वाध्य छन् । सरकार र यातायात ब्यवसायीबीच सेवाको गुणस्तर अनुसार छोटो तथा लामो दुरीको सवारी साधनमा भाडादर निर्धारण गरिएको हुन्छ । जसमा ईन्धनको अंश ३५ प्रतिशत र अन्य सूचकको अंश ६५ प्रतिशत हुन्छ । यातायात ब्यवस्था कार्यालय सवारी रूपन्देहीका शाखा अधिकृत मुक्ति पाण्डेले बुटवलदेखि काठमाडौको यात्रामा सरकार र सवारी ब्यवसायीबीच सम्झौता अनुसार साधारण सवारीमा ५ सय २०, डिलक्समा ६ सय २५ र स्तरीय (एसी) बसमा ७ सय ५० रुपैयाँ भाडा तोकिएको बताए । तर, भाडादर लागू भए /नभएबारे सरकारी अनुगमन छैन । यसले व्यावसायीको मनपरी बढेको हो । ‘कसैले उजुरी गरे अनुगमन गर्छौं,’ उनले भने, ‘गत असारमा व्यावसायीसँग छलफल गरेरै तोकिएभन्दा धेरै भाडा नलिन पनि प्रतिवद्ध बनाएका थियौं ।’

यातायात व्यवस्था सम्बन्धी ऐनमा तोकेभन्दा बढी मुल्य लिने यातायात व्यवसायीलाई एक हजारदेखि ५ हजार रुपैयाँसम्म जरिवाना हुने प्रावधान छ । तर, सरकारी भाडा दर हेरेर उजुरी गर्ने यात्रु छैनन् । अनुगमन गर्ने सरकारी निकाय छैन । यसले गर्दा दैनिक हजारौ यात्रु ठगिने गरेका छन् । पछिल्लो समय एसी बसमा सलिना एसी, सलिना मेट्रो, मीरा बुलेट, अर्जुनरथ सुपेरियर बस भित्राएका छन् । एसी बस आरामदायी छन् । फ्रि वाइफाई सुबिधा छ । सुरक्षाका लागि सिसी क्यामेरासमेत जडान गरिएको हुन्छ । पश्चिम नेपाल यातायातका अध्यक्ष दधि खरेलले राज्यले तोकेभन्दा धेरै सुबिधा दिएर यात्रुको सन्तुष्टी अनुसार भाडा लिएको दाबी गरे । तसर्थ यात्रुको गुनासो पनि नआएको उनले बताए । ‘राज्यले नै व्यावसायीलाई धराशायी बनाएको छ । हामी पीडित छौं,’ उनले भने, ‘लागत खर्च हेर्ने हो भने अहिले गाडी नचलाएपनि हुने अवस्था छ । ८० लाख रुपैयाँ भन्दा कममा बस आउँदैनन् । भाडाको रकमले बैंकको किस्ता पनि तिर्न पुग्दैन ।’

सिद्धार्थ यातायातका संचालक सुनिलराज विष्टले यात्रुलाई बढी सुविधा दिएर थप भाडा लिनु गलत नहुने बताए । ‘सार्वजनिक यातायात सुविधा सम्पन्न भएनन् भनेर सुविधा सम्पन्न बस ल्याएका हौं,’ उनले भने, ‘हामी पनि मुनाफामा चल्ने हो । सुबिधा धेरै तर, भाडा कम हुँदैन ।’ एसी बसले बीचबाट चढेपनि मुल गन्तव्यदेखिकै भाडा लिन्छन् । जस्तै भैरहवाबाट छुट्ने एसीबसले बुटवल वा कपिलवस्तुबाट छुट्ने बसले नवलपरासीबाट यात्रु चढाएपनि भाडा त्यतिनै तिर्नुपर्छ । पश्चिम नेपाल बस व्यावसायीले अनलाइनबाट टिकट काटिने भएकाले सुरुदेखिकै भाडा लाग्ने जनाएको छ । रूपन्देहीका यातायातले पछिल्लो समय सिल्पर बस भित्राएका छन् । जसका अनलाइन टिकट छैन ।

प्रदेश ५ ट्राफिक प्रहरी कार्यालय बुटवलका प्रमुख मधु लुइँटेलले व्यवसायीले डिलक्सका पनि विभिन्न रुप र एसीका विभिन्न रुप भनेर धेरै भाडा लिएको भएपनि कारबाही प्रक्रिया नथालेको बताए । ‘यात्रुबाट गुनासो आए यातायात व्यवस्था कार्यालयको रोहबरमा व्यवसायीलाई कारबाही र यात्रुलाई क्षतिपूर्ती दिने हो,’ उनले भने, ‘तर सिधै गुनासो आएको छैन ।’ उपभोक्ता हित संरक्षण मञ्चका अध्यक्ष नोर्बु लामाले यातायातमा सुधार आवश्यक रहेको बताए । ‘सरकारले वैज्ञानीक भाडादर कायम गरोस्,’ उनले भने, ‘तर तोकिएभन्दा बढी भाडा लिएर यात्रु ठग्ने काम बन्द होस् ।’

प्रकाशित : मंसिर २२, २०७६ १०:२३
पूरा पढ्नुहोस्
प्रतिक्रिया
पठाउनुहोस्
×