हेलिकप्टरमै जिल्ला भ्रमण

‘स्वर्ण जयन्ती उद्घाटन गर्न ९ लाख रुपैयाँ खर्चेर हेलिकप्टर चार्टर, तैपनि मुख्यमन्त्रीले भनेजति समय दिएनन्’
हरि गौतम

(रुकुम पूर्व) — सडक सञ्जालले नजोडेका यहाँका दुई स्थानीय तहमा आयोजना गरिएका ४ कार्यक्रममा सहभागी हुन प्रदेश ५ का मुख्यमन्त्री शंकर पोखरेलले भाडाको हेलिकप्टर प्रयोग गरेका छन् ।

सेनाको हेलिकप्टरमार्फत बुधबार काठमाडौंबाट रुकुम पूर्व पुगेका उनी पुथाउत्तरगंगा गाउँपालिकाका दुई र सिस्ने गाउँपालिकाका दुई कार्यक्रममा सहभागी भएका हुन् । पुथाउत्तरगंगा १ मैकोट, वडा १० को तकसेरा र अस्थायी सदरमुकाम रुकुमकोटका कार्यक्रम उनले एकै दिनमा भ्याएका हुन् । पुथा हिमालय मावि मैकोटको स्वर्ण जयन्ती, तकसेराको सभाहल उद्घाटन, जिल्लास्थित कार्यालय प्रमुखसँगको भेटघाट र पत्रकार सम्मेलन मुख्यमन्त्री पोखरेलले गरे । गाडीबाट एक दिनको यात्रा र अर्को एक दिन पैदल यात्रा गर्नुपर्ने भएपछि मुख्यमन्त्री पोखरेलले हेलिकप्टर प्रयोग गरेका हुन् ।

हेलिकप्टरमार्फत सुरुमा तकसेरा ओर्लेका उनी सोही हेलिकप्टरमार्फत मैकोट र रुकुमकोट पुगेका थिए । मुख्यमन्त्री बनेपछि रुकुम पूर्वको यो उनको पहिलो भ्रमण हो । तीनदिने जिल्ला भ्रमणको कार्यक्रमसहित यहाँ आएका उनले एक दिनमा २ स्थानीय तहका कार्यक्रममा सहभागी भए । बिहीबार र शुक्रबार सिस्ने र भूमे गाउँपालिकामा हुने कार्यक्रममा गाडीमार्फत सहभागी हुनेछन् । तीन स्थानीय तह रहेको जिल्लाका केही ठाउँमा अझै सडकको पहुँच पुगेको छैन । सडक नपुगेका ठाउँका कार्यक्रममा मुख्यमन्त्रीलाई सहभागी गराउन स्थानीयले हेलिकप्टर रिजर्भ गरेका हुन् ।

मुख्यमन्त्री पोखरेलको मुख्य कार्यक्रम पुथा हिमालय माविको स्वर्ण जयन्ती उद्घाटन रहेको भए पनि उनले खासै समय नदिएको विद्यालयका प्रधानाध्यापक हस्तिमान पुन मगरले बताए । विद्यालयका तर्फबाट हेलिकप्टर चार्टर गरेबापतको रकम वडा १ ले बेहोर्ने सहमति भएको उनले सुनाए । ‘विद्यालयको कार्यक्रमलाई खासै समय दिनुभएन, विद्यालयका समस्या तथा हाम्रा गुनासा राख्ने योजनामा हामी थियौं,’ उनले भने । विद्यालयलाई धेरै समय दिएपछि हेलिकप्टर चार्टरको धेरै रकम विद्यालयले बेहोर्ने निर्णय भए पनि समय कम दिएकाले अब कति बजेट विद्यालयले बेहोर्ने भन्नेबारे छलफल हुने उनले बताए । वडा १ कार्यालयले ढोरपाटन सिकार आरक्षमा आएका सिकारीबाट संकलन गरेको ५ लाख ३० हजार रुपैयाँ मुख्यमन्त्रीको हेलिकप्टर चार्टरमा खर्च गर्ने गरी तयारी गरेको उनको दाबी छ ।

जिल्लाका अरु स्थानीय तहले १ लाख ५० हजारका दरले हेलिकप्टर चार्टरको भाडा तिरेको उनको भनाइ छ । मैकोटसम्म सडक नपुगेकाले विद्यालय आफैंले हेलिकप्टर रिजर्भ गरेर मुख्यमन्त्रीलाई त्यहाँ पुर्‍याएको हो । बुधबारका दुईवटै सार्वजनिक कार्यक्रमलाई सम्बोधन गर्दै मुख्यमन्त्री पोखरेलले जिल्लामा सम्भावनै सम्भावना रहेको औंल्याएका छन् । स्रोत परिचालन गरी विकासमा प्रयोग गर्न उनको सुझाव थियो । नयाँ सडक, मर्मत गर्नुपर्ने तथा स्तरोन्नतिका लागि एउटा सडकमा १० लाखदेखि १० करोड रुपैयाँसम्मको बजेट विनियोजन गरिएको उनले बताए ।


बिहीबार जिल्ला अस्पताल उद्घाटन र राजनीतिक कार्यक्रममा रुकुमकोटमै रहने उनी शुक्रबार भूमे गाउँपालिकामा जिल्लाभरिका जनफ्रतिनिधिको अन्तर्त्रिया कार्यक्रममा सहभागी हुने मुख्यमन्त्रीको सचिवालयले जनाएको छ ।

‘पार्टीभित्र र बाहिरबाट हमला’
मुख्यमन्त्री पोखरेलले पार्टीमाथि पार्टीभित्र र बाहिरबाट हमला भइरहेको बताएका छन् । रुकुम पूर्वको अस्थायी सदरमुकाम रुकुमकोटमा बुधबार आयोजना गरिएको पत्रकार सम्मेलनमा उनले पार्टी कमजोर बनाउन घेराबन्दी भइरहेको आरोप लगाएका हुन् ।

‘नेपालका दुई ठूला कम्युनिस्ट पार्टी अलग हुँदा त्यसबाट फाइदा लिने दाउमा रहेकाहरू पार्टी एक हुनेवित्तिकै हमलामा उत्रिएका छन्,’ उनले भने, ‘त्यसबाट पार्टी निर्माणमा खासै असर परेको छैन र पर्दैन पनि ।’

प्रकाशित : मंसिर ५, २०७६ १३:१०
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

अस्पतालको सटर विवाद

व्यवसायी भन्छन्, ‘५ वर्ष बस्न देऊ’
कान्तिपुर संवाददाता

रुपन्देही — करार सम्झौताअनुसार ५ वर्ष व्यवसाय गर्न दिन बुटवलस्थित लुम्बिनी प्रादेशिक अस्पतालका सटर व्यवसायीले माग गरेका छन् । मंसिरभित्र सटर खाली गर्न दिएको निर्देशन अटेर गरे डोजर लगाएर खाली गराउने प्रदेश सरकारले निर्णय गरेको छ । उक्त निर्णयपछि हारगुहारमा उत्रिएका व्यापारीले सटर भत्काएर पर्खाल बनाउने निर्णयको विरोध जनाएका हुन् ।

अस्पतालले ५ वर्षका लागि भाडामा दिन टेन्डर आह्वान गरे अनुसार आफूहरूले करार सम्झौता गरेको उनीहरूले दाबी गरेका छन् । उक्त सम्झौताअनुसार व्यवसाय गर्न पाउनुपर्ने माग दोहोर्‍याएका छन् । व्यवसायीले बुधबार पत्रकार सम्मेलन गरी मुलुकी ऐन, २०७४ को धारा ५४१ बमोजिम करार सम्झौताअनुसार ५ वर्ष व्यवसाय गर्न पाउनुपर्ने माग गरे । अस्पतालका ७३ सटरमध्ये ५९ वटा सटरको ५ वर्षका लागि भाडा सम्झौता भएअनुसार व्यवसायीको करोडौं रुपैयाँ लगानी भएको सटर व्यवसायी संघका उपाध्यक्ष ज्ञानप्रसाद पौडेलले बताए । ‘सम्झौताअनुसार व्यवसाय गर्न पाइन्छ भन्ने आधारमा हामीले ऋणधन गरी ६३ करोड रुपैयाँ लगानी गरेका छौं तर सम्झौताको मसी सुक्न नपाउँदै विकल्पै नदिई खाली गर्न भनिएको छ,’ उनले भने, ‘यसले व्यवसायीमा ठूलो पीडा र निराशा छाएको छ ।’

व्यवसायीका समस्या सुनाउँदा मुख्यमन्त्री शंकर पोखरेलले टेन्डरमा जानु गैरकानुनी रहेको र अब सपिङ कम्प्लेक्समा व्यवसाय गर्न भनेर गैरजिम्मेवार जवाफ दिएको समेत उनले गुनासो गरे ।

यसअघि व्यवसायीले लुम्बिनी प्रादेशिक अस्पताल, मेडिकल सुपरिटेन्डेन्ट डा. कृष्ण खनाल र अस्पताल विकास समितिलाई विपक्षी बनाई जिल्ला अदालत रूपन्देहीमा रिट निवेदन दिएका छन् । रिट निवेदनमाथि मंसिर ६ गते पेसी छ । अस्पतालले ०७५ फागुन २८ गते र ०७६ जेठ २८ गतेको सूचना अनुसार व्यवसायीले पाँच वर्षका लागि भाडा सम्झौता गरेका थिए । तर, कात्तिक १८ गते मन्त्रिपरिषद् बैठक बसेर अस्पतालका सटर मंसिर मसान्तसम्म खाली नगरे डोजर लगाएर खाली गर्ने निर्णय गरेको थियो । सटर हटाएर आकर्षक पर्खाल बनाउने र विशिष्टीकृत सेवासहितको अस्पताल बनाउने उद्देश्य रहेको सरकारको भनाइ छ ।

प्रकाशित : मंसिर ५, २०७६ १३:०४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT