लुम्बिनीमा अन्तर्राष्ट्रिय त्रिपिटक च्यान्टिङ : स्वदेशी र विदेशी पाहुनाको लस्कर 

मनोज पौडेल

(लुम्बिनी) — श्रीलंकाली भिक्षु वतुगामाना अथाहाडासी थेरो लुम्बिनीमा त्रिपिटक वाचन गर्न पाएपछि खुसी देखिए । ‘जीवनकै महत्त्वपूर्ण क्षण बन्यो,’ उनले भने, ‘बुद्ध जन्मस्थलमा आएर त्रिपिटक वाचन गर्छु भनेर सोचेकै थिइनँ ।’ थाई भिक्षु फ्रा चरान सुथीले पनि त्रिपिटक वाचन गरेर पुण्य सञ्चय गर्न पाउँदा हर्षित भएको बताए । ‘भाग्यमानीले मात्र यस्तो अवसर पाउँछन्,’ उनले भने ।

देश/विदेशका भिक्षु/भिक्षुणी लामाको सहभागितामा बुद्ध जन्मस्थल लुम्बिनीमा तीनदिने अन्तर्राष्ट्रिय त्रिपिटक च्यान्टिङ (बौद्ध धर्मग्रन्थ पाठ) बिहीबारबाट सुरु भएको छ । यहाँको पवित्रता र आध्यात्मिकता उजागर गरी शान्ति र भ्रातृत्वको सन्देश फैलाउन पाठ गरिएको हो । मायादेवी मन्दिर छेउमा सुरु भएको पाठ शनिबार सम्पन्न हुनेछ ।

बिहान ८ बजे शान्ति द्वीपबाट शोभायात्रा निकालिएको थियो । पवित्र गन्थ त्रिपिटकलाई सिंगारपटार गरेर सम्मानका साथ अतिथिले बोकेर शोभायात्रा गर्दै मायादेवी मन्दिर परिसरमा पुगेका थिए । उपसंघनायक बोधीसेन महास्थवीरले शिल प्रदान गरेर पाठको शुभारम्भ गरे । शुभारम्भ कार्यक्रममा प्रदेश ५ का मुख्यमन्त्री शंकर पोखरेलले शान्ति र समृद्धिको आधार त्रिपिटक रहेकाले सबैले अनुसरण गर्न आग्रह गरे । ‘यसले करुणा र मैत्रीभाव बढाउँछ,’ उनले भने, ‘यसैले प्रदेश समृद्धिको आधार बन्छ ।’

थाइल्यान्डका पूर्वमन्त्री कुनिङ सुदारथले विश्वका लागि नेपाल र नेपालीको गौरव बनेका भगवान् गौतम बुद्ध जन्मस्थलमा आएर त्रिपिटक पाठ गर्न पाउँदा खुसी लागेको बताइन् । अमेरिकी बौद्ध एसोसिएसन अध्यक्ष वाङ्वो डिक्सेले१५ वर्षअघि अमेरिकाबाट सुरु भएको त्रिपिटक पाठ अहिले बल्ल बुद्धकै जन्मस्थलमा गर्न पाएको बताइन् ।

पहिलो दिन बिहान नौ थेरवादी नेपाली भिक्षुले त्रिपिटक पाठ गरे । भोजनपछि नेपाली, श्रीलंका र लाओसका भिक्षुले एक/एक घण्टा पाठ गरे । पहिलो दिन सूत्रपिटकअन्तर्गत दिग निकायको पहिलो खण्डका ब्रह्म जातक र सामान्य फल सूत्र पाठ गरिएको थियो । बीचमा बौद्ध विद्वान्, संघनायक र रिम्पोछेबाट धर्मदेशना गरिएको थियो ।

शुक्रबार सुरुमा बिहान कम्बोडिया र कोरियाका भिक्षुले पाठ गर्नेछन् । त्यसपछि नेपालका महायानी सम्प्रदायले पाठ गर्छन् । अन्तिममा चीन, जापान, भियतनामका भिक्षुले पाठ गर्नेछन् । तेस्रो दिनमा थाई भन्तेको नेतृत्वमा पाठ सुरु हुनेछ । त्यसपछि म्यानमार, क्यानडा र कम्बोडियाका भिक्षुले पाठ गर्छन् । नेपाली भिक्षुणीले पाठ गर्नेछन् । ब्रजयानका ६० शाक्यले पनि पाठ गर्छन् । पाठ हरेक दिन बिहान ८ बजेदेखि साँझ ५ सम्म हुनेछ ।
दोस्रो दिन अभिधम्म पिटक र तेस्रो दिन विनय पिटक पाठ हुनेछ ।

‘यसले शान्ति र आध्यात्मिक चिन्तन बढाउँछ,’ भिक्षु महासंघका अध्यक्ष भिक्षु मैत्री महास्थवीरले भने, ‘आध्यात्मिक र शान्ति पर्यटनलाई बढावा दिन्छ ।’ प्रदेश सरकारको लुम्बिनी भ्रमण वर्ष र संघीय सरकारको नेपाल भ्रमण वर्षलाई सहयोग पुर्‍याउने उनले बताए । बुद्ध जन्मस्थलमा त्रिपिटक पाठ भएको यो दोस्रो पटक हो । यसले लुम्बिनीको अन्तर्राष्ट्रिय स्तरमा प्रचार गर्ने आयोजकको विश्वास छ । त्रिपिटक पाठमा म्यानमार, भियतनाम, थाइल्यान्ड, श्रीलंका, मलेसिया, कम्बोडिया, अमेरिकालगायत २५ मुलुकका पाँच सय भिक्षु/भिक्षुणी, लामा गुरु र उपासका/उपासिका सहभागी छन् । पाँच सय नेपाली भिक्षु, भिक्षुणी पनि सहभागी छन् । २५ मुलुकका भिक्षु एकै ठाउँमा भेला भएर गरिएको पाठले लुम्बिनीबारे धेरै ठाउँमा जानकारी पुगेर बुद्ध दर्शनले अझ व्यापकता पाएको भिक्षु महास्थवीरले बताए ।

प्रकाशित : कार्तिक २९, २०७६ १२:०८
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

सडक अनुगमन : स्थानीय तहसँग समन्वय गर्न निर्देशन

कान्तिपुर संवाददाता

ओखलढुंगा — सडक डिभिजन कार्यालयले खनेको सडकले क्षति पुर्‍याउँदा पीडित नगरपालिकामा उजुरी लिएर जान्छन् । नगरपालिकालाई भने सडकको कामबारे जानकारी नै हुँदैन ।

‘नगरक्षेत्रको व्यक्तिको घर सडकले जोखिम हुँदा न ठेकेदार सम्पर्क आउँछन्, न त सडक डिभिजन जवाफदेही हुन्छ,’ सिद्धिचरण नगरपालिकाका मेयर मोहनकुमार श्रेष्ठले भने, ‘संघ र प्रदेशअन्तर्गतका कार्यक्रम सञ्चालन हुँदा स्थानीय तहसँग समन्वय त के जानकारी पनि हुँदैन ।’

जिल्लाको साँघुटार–घोराखोरी–कोषहाट–ओखलढुंगा सडकको स्थलगत अनुगमन र अन्य विकासको अवस्था बुझ्न आएको संघीय संसद्को विकास समितिलाई सिद्धिचरण नगरपालिकाका मेयर श्रेष्ठले गुनासो पोखेका हुन् । बुधबार जिल्ला समन्वय समितिको हलमा आयोजित अन्तर्क्रियामा अन्य स्थानीय तहका प्रमुखको पनि एकै किसिमको गुनासो थियो ।

सरोकारवाला सरकारी निकायका प्रतिनिधिलाई संसद्को विकास समितिका सभापति कल्याणी खड्काले निर्देशन दिइन् । ‘अबदेखि सम्बन्धित संघ र प्रदेश मातहतका सबै कार्यालयले विकासका काम गर्दा अनिवार्य स्थानीय तहसँग समन्वय गर्नु ।’ सभापति खड्काले भनिन्, ‘समस्या आउँदा हामीलाई सम्झिने र स्थानीय तहलाई दोष दिने अनि काम सुरु गर्ने बेला समन्वय नगर्ने ? अब अनिवार्य समन्वय गर्नुस् ।’ उनले अनुगमन गरिएको आयोजनाको सम्बन्धमा समितिले आवश्यक सहयोग मात्र नभएर काम नगर्ने पक्षलाई कारबाहीका लागि सिफारिस गर्ने बताइन् । साँघुटार–घोराखोरी सडक कालोपत्रे गर्ने भनेर बजेट विनियोजन गरेको वर्षौं बित्दासमेत काम नभएपछि विकास समितिको
टोली स्थलगत अनुगमनका लागि आएको थियो ।

अनुगमनसँगै जिल्लाभित्र अवरुद्ध भएका विकासका संरचनाका बारेमा समेत सरोकारवालाले समितिलाई जानकारी गराएको थियो ।

मान्द्रे दोभानस्थित मोलुङ खोलाको पुल, स्वास्थ्य, शिक्षाका भवन जस्ता संरचना निर्माणमा अलपत्र पारेका ठेकेदारलाई कारबाही गर्नुपर्ने स्थानीयले भनाइ थियो । तर सार्वजनिक खरिद ऐनले ठेकेदारलाई संरक्षण गरेको कारण संशोधन हुँदा त्यसलाई ध्यान दिनसमेत सुझाव दिए । भौतिक विकासको काममा जिल्ला ठेकेदारबाट बढी पीडित जिल्लाका रूपमा रहेको समितिका सदस्य तथा सांसद यज्ञराज सुनुवारले बताए ।

समितिका सदस्यद्वय यज्ञराज सुनुवार, बिना थापा र सभापति कल्याणी खड्काको टोलीले तीन दिन लगाएर रामेछापको साँघुटार हुँदै ओखलढुंगाको विभिन्न आयोजना अनुगमन गरेको हो । प्रदेश सांसद मोहनकुमार खड्काले प्रदेश राजधानी विराटनगर जोड्ने द्रुतमार्गको रूपमा रहने उदयपुरको घुर्मी–चतरा सडकखण्डको काम तत्काल सुचारु गर्न समितिले पहल गर्न सुझाव दिए । त्यसैगरी मध्यपहाडी राजमार्गअन्तर्गत पर्ने सिन्धुली खण्डका अलपत्र पुलको काम अघि बढाउनसमेत समितिले पहल गर्नुपर्ने बताए । सभापति खड्काकै टोलीले गत जेठमा सिन्धुली खण्डमा पर्ने सोखु, बादुरा खोलालगायतको पुल अनुगमन गरे पनि कुनै प्रगति हुन सकेको छैन ।

प्रकाशित : कार्तिक २९, २०७६ ११:५९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×