आजदेखि अन्तर्राष्ट्रिय त्रिपिटक च्यान्टिङ

कान्तिपुर संवाददाता

लुम्बिनी — दोस्रो अन्तर्राष्ट्रिय त्रिपिटक च्यान्टिङ (पाठ) लुम्बिनीमा बिहीबारबाट सुरु हुने भएको छ । लुम्बिनीको पवित्रता र आध्यात्मिकता उजागर गरी शान्ति र भ्रातृत्वको सन्देश फैलाउन पाठ गर्न लागिएको हो । लुम्बिनीस्थित पवित्र बगैंचा रहेको मायादेवी मन्दिर छेउको उत्तरतिर कात्तिक २८ देखि ३० सम्म तीन दिन पाठ हुनेछ ।

कार्यक्रममा सहभागी हुन लाइट अफ बुद्धधर्म फाउन्डेसन इन्टरनेसनल अमेरिकाका अध्यक्ष वाङवो डिसेको नेतृत्वमा १ सय १९ विदेशी भिक्षु लुम्बिनी आएका छन् । म्यानमार, भियतनाम, थाइल्यान्ड, श्रीलंका, मलेसिया, ब्राजिल र अमेरिकाका भिक्षु भारतको कुशीनगर हुँदै यहाँ आएका हुन् ।

‘२५ मुलुकका पाँच सयभन्दा बढी विदेशी भिक्षु/भिक्षुणी त्रिपिटक च्यान्टिङमा सहभागी हुन आएका छन्,’ लुम्बिनी अन्तर्राष्ट्रिय त्रिपिटक च्यान्टिङ आयोजक समिति अध्यक्ष भिक्षु मैत्री महास्थवीरले भने, ‘त्यत्तिकै संख्यामा नेपाली भिक्षु, गुरुमा र अनागरिका पनि सहभागी हुनेछन् । यसले लुम्बिनीको गौरव विश्वभरि बढ्नेछ ।’ कार्यक्रम सफल पार्न सबै तयारी पूरा भएको उनले बताए । विभिन्न ११ उपसमिति सक्रिय भएर काम गरिरहेका छन् । बौद्ध धर्मग्रन्थ त्रिपिटकको लुम्बिनी उद्यानमा पाठ हुनु नेपालीका लागि गौरव र खुसीको कुरा भएको उनले बताए । बिहीबार बिहान ९ बजेदेखि च्यान्टिङ सुरु हुनेछ । सुरुमा थेरवादी नेपाली भिक्षुले त्रिपिटक पाठ गर्नेछन् । दोस्रो दिन ८ बजेदेखि सुरु हुने पाठमा कम्बोडिया र कोरियाका भिक्षु सहभागी हुनेछन् ।

जापानी भिक्षुको नेतृत्वमा पिस वाक
दोस्रो अन्तर्राष्ट्रिय त्रिपिटक च्यान्टिङको अवसर पारेर बुधबार शान्तिको सन्देश फैलाउँदै ४० भिक्षुले पिस वाक गरेका छन् । जापानी भिक्षु सातो ताचेमाको नेतृत्वमा उनीहरूले रामग्राम, लुम्बिनी र तिलौराकोटको पैदल यात्रा पूरा गरेका हुन् । उनीहरूलाई कपिलवस्तु नगरपालिका–३ का वडाध्यक्ष रुद्रप्रकाश गैरेले तिलौराकोटमा स्वागत गरेका थिए । बुधबार बेलुका उनीहरू लुम्बिनी आइपुगेका छन् ।

प्रकाशित : कार्तिक २८, २०७६ १०:०८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

भीड कम गर्न बाइपास सडक

‘सवारी दुर्घटना कम गर्न र सडक जाम घटाउन सहयोग पुग्नेछ’ 
अमृता अनमोल

(बुटवल) — सडक अतिक्रमण गरेर बनाइएका घर भत्काउन नसक्दा बुटवलको राजमार्ग क्षेत्र विस्तारको काम तीन वर्षदेखि अलपत्र छ । यही नगरका भित्री सडक भने धमाधम ८२ फुटमा विस्तार गरिँदै छन् ।

बुटवल उपमहानगरपालिकाले राजमार्ग क्षेत्रको भीड कम गर्न चार लेनको वाइपास सडक निर्माण थालेको हो । त्यसका लागि अतिक्रमण हटाउन र ढल निकासको अभावमा अस्तव्यस्त बनेका मुख्य बजारका सडक फराकिलो बनाउन थालेको छ । उपमहानगर प्रमुख शिवराज सुवेदीले पूर्व–पश्चिम र उत्तर–दक्षिण राजमार्ग प्रदेश मन्त्रालय र त्यसमातहतका कार्यालयले बनाउन थालेपछि वाइपासका लागि भित्री सडक खुला र व्यवस्थित गर्न लागेको बताए । ‘अब ८२ फुटको बाइपास सडक बन्नेछ,’ उनले भने, ‘यसले सवारी दुर्घटना कम गर्न र सडक जाम घटाउन सहयोग पुग्नेछ ।’ सडकमा साना मात्रै होइन, ठूला सवारी साधन पनि चलाउन मिल्नेछ ।

पहिलो चरणमा राजमार्गको पश्चिम क्षेत्रमा योगीकुटीदेखि कालिकानगर–इँटाभट्टी हुँदै नेपालगन्ज रोडसम्मको कालिकापथ सडक चार लेनको बन्दै छ । यहाँ अहिले धमाधम सडक क्षेत्र कायम गर्ने, फुटपाथ निर्माण गर्ने र ढल खन्ने काम भएको छ । सडक सुधार गर्न मापदण्डविपरीत बनेका घर–टहरा र पिंढी भत्काएर साबिकको सडक कायम गरिएको छ । पहिलो चरणमा नाली र फुटपाथ निर्माण सक्ने र त्यसलगत्तै पिचको काम सुरु गर्ने नगर प्रमुख सुवेदीले बताए ।

योगीकुटीदेखि नेपालगन्ज रोडसम्मको आन्तरिक बाइपास सडक करिब तीन किलोमिटर लम्बाइको हुनेछ । यसले बुटवल उपमहानगर–११, ९ र ७ वडालाई समेटेको छ । यसलाई तीन खण्डमा बाँडेर ठेक्का लगाइएको छ । ०५४ सालमा यस सडकलाई ८२ फुटको कायम गरी सडक मापदण्ड बनाइएको थियो । वाइपास सडक आवश्यक पर्ने भन्दै त्यसयता हरेक वर्ष उपमहानगरले सडक विस्तारको योजना बनाएको थियो । तर, ठूला व्यापारीको बसोबास र बाह्रै महिना चहलपहल हुने भएकाले यसअघि स्थानीय तह सडक फराकिलो गर्न असफल भएको थियो ।

सडक सर्वेक्षणअनुसार यस सडकको दायाँबायाँ १ सय ९० घर तथा तिनका संरचना भत्काउनुपर्छ । बसपार्क र इँट्टाभट्टा क्षेत्रमा सबैभन्दा धेरै संरचना भत्काइँदै छ । उपमहानगरपालिकाले त्यस क्षेत्रका वडा प्रतिनिधि, टोल विकास संस्था र स्थानीय उपभोक्ता समितिलाई मापदण्ड मिचेर बनाएका संरचना भत्काउन र सडक क्षेत्र कायम गर्न सहमत गराएको छ । अहिले तीनै पक्षको सामूहिक पहलमा सडक भत्काउन थालिएको हो । ‘सडक राम्रो बनाऔं भन्ने अभियान नै चलाएर आफ्नो क्षेत्रका संरचना भत्काउन र सडक क्षेत्र कायम गराउन खटेका छौं,’ सडक विस्तारमा उपभोक्ताका तर्फबाट अगुवाइ गरेका बाबुराम पन्थीले भने, ‘टोलवासी नै सडक कायम गर्ने पक्षमा भएपछि मिचेका संरचना भत्काउन सहज भएको छ ।’

उपमहानगरले गत वर्ष राजमार्ग पूर्व–पश्चिमका सडकलाई बाइपास सडक बनाउन विस्तृत परियोजना प्रतिवेदन (डीपीआर) बनाएको थियो । प्रतिवेदनमा सडक क्षेत्र ८२ फुटमा विस्तार गर्दा झन्डै ६४ करोड रुपैयाँ खर्च लाग्ने र तीन वर्षमा काम सक्ने उल्लेख छ । यस वर्ष डीपीआर पुनरावलोकन गरिएको छ । त्यसमा भने एक अर्ब लागत लाग्ने अनुमान छ । यसअनुसार उपमहानगरले गत वर्षको सुरुमै सडकको क्षेत्राधिकार छुट्याएको थियो । सडक अतिक्रमण नभएको योगीकुटी र तल्लो कालिकानगर क्षेत्रमा गत वर्ष केही काम भएको थियो । अतिक्रमित क्षेत्र खाली गराउन नसक्दा अन्य क्षेत्रमा विस्तारको काम रोकिएको हो । ‘एक क्षेत्र वा थोरै भूभागमा संरचना भत्काउँदा विवाद आउने देखियो,’ बुटवल उपमहानगरका सहरी पूर्वाधार विकास प्रमुख इन्जिनियर सुमन श्रेष्ठले भने, ‘यसैले यसपालि सबै क्षेत्रमा सडक कायम गरेर मात्रै विस्तारको काम थालेका छौं ।’

सडक विस्तारका लागि तीन तहकै सरकारले गत आर्थिक वर्षमा तीन करोड रुपैयाँ बजेट छुट्याएका थिए । चालु आर्थिक वर्षमा संघीय सरकारले ससर्तमा ५० लाख र प्रदेश सरकारले समपूरक अनुदानमा एक करोड रुपैयाँ बजेट यस सडकका लागि छुट्याएका छन् । बाँकी रकम बुटवल उपमहानगरले जुटाएर ३ करोड ५० लाख रुपैयाँ पुर्‍याउने योजना छ । कालिकापथ सडक विस्तारलगत्तै राजमार्गबाट पूर्वी क्षेत्र अस्पताल लाइन, चाँदबारी, सुख्खानगर, दीपनगर, शिवनगर हुँदै रामनगर जोड्ने सडक विस्तार थाल्ने उपमहानगरको योजना छ । त्यसका लागि चालु आर्थिक वर्षमा सडक क्षेत्र कायम गर्ने र आगामी वर्षदेखि निर्माण थाल्ने उपमहानगर प्रमुख सुवेदीले बताए ।

प्रकाशित : कार्तिक २८, २०७६ १०:०७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×