गाउँपालिकाले डक्टर–पाइलट पढाउने

मनोज पौडेल

(कपिलवस्तु) — शुद्धोदन गाउँपालिकाले पालिकाभित्रका छात्रछात्रालाई एमबीबीएस वा पाइलट कोर्स अध्ययनका लागि सहयोग गर्ने निर्णय गरेको छ । यी विषय अध्ययनका लागि आर्थिक अभाव भएकाको सबै खर्च बेहोर्ने गाउँपालिकाले जनाएको हो । गाउँपालिका अध्यक्ष निसार अहमद खाँले भने,‘ एमबीबीएस वा पाइलट पढ्न चाहेका तर आर्थिक अवस्थाले नभ्याउने विद्यार्थीको सबै खर्च गाउँपालिकाले बेहोर्नेछ ।’ उनले गाउँपालिकाले धेरै पहिले यो निर्णय गरे पनि अहिलेसम्म कोही आएको बताए ।

उनकै पहलमा गाउँपालिकाको सक्रियतामा नेपाल राष्ट्रिय माविमा सिभिलतर्फ सबइन्जिनियरिङको पढाइ भइरहेको छ । १६ जिल्लाका ४८ विद्यार्थी पढिरहेका छन् । तीनवर्षे कोर्सका लागि न्यूनतम शुल्क १ लाख २० हजार छ । उक्त कोर्स पूरा गर्न उक्त विद्यालयभन्दा बाहिर तीनदेखि साढे चार लाख रुपैयाँ खर्च लाग्छ । यस वर्षबाट अमिन (नापी सर्वेक्षक) को पढाइ पनि त्यहाँ सुरु हुँदै छ । गत शनिबार प्रवेश परीक्षा थियो । ४८ जनाले अमिन पढ्न पाउनेछन् । तीनवर्षे उक्त कोर्सका लागि १ लाख २० हजार रुपैयाँ शुल्क तोकिएको छ । विद्यालय बाहिर पढ्नका लागि तीनदेखि साढे चार लाख खर्च लाग्छ । यी दुवै पढाइ जिल्लाका अन्य स्थानीय तहका विद्यालयमा छैनन् । राष्ट्रिय माविलाई पढाइका पूर्वाधार तयार गर्न गाउँपालिकाले गत वर्ष २८ लाख रुपैयाँ दिएको थियो । यो वर्ष २० लाख रुपैयाँभन्दा बढी विनियोजन गरेको छ । अपांगता भएकालाई जीवनयापनमा सहयोग पुर्‍याउन दुई वर्षमा १६ वटा मोटरसाइकल र स्कुटी वितरण गरेको छ । यो वर्ष १० वटा वितरणको योजना छ । ‘भन्सार छुट गराएर ल्याउँछु,’ अध्यक्ष खाँले भने, ‘एउटाको ९९ हजार ५ सय रुपैयाँ पर्छ । दुवै खुट्टा नभएकालाई प्राथमिकता दिने गरेको छु ।’ यी त भए शिक्षा क्षेत्रमा अध्यक्ष खाँको पहल ।

घर र गाउँपालिका मोटरसाइकलमा आउजाउ गर्ने जिल्लामा उनी एक्ला अध्यक्ष हुन् । योजना अनुगमन र गाउँपालिकाको काममा मात्र उनी गाडी चढ्छन् । दुई वर्षअघि गाउँसभामा सबैले गाडीका लागि बजेट छुट्याउन माग गर्दा उनले मानेनन् । दबाब बढेपछि १५ लाख रुपैयाँ छुट्याइयो । उक्त रकमबाट ११ लाख खर्चेर एम्बुलेन्स खरिद गरियो । बाँकी रकमले त्यसैका लागि ग्यारेज बनाइयो । गाउँपालिकाले धेरैपछि गाडी किन्यो ।

गाउँपालिकाले गर्भवती र सुत्केरीलाई एम्बुलेन्सको सेवा नि:शुल्क दिएको छ । अन्य स्थानीय तहका महिलाले पनि ५० प्रतिशत छुटमा सेवा पाइरहेका छन् । उपचारका लागि जहाँ गए पनि पैसा तिर्नुपर्दैन । चालु वर्षमा वडा ६ बाट एम्बुलेन्स खरिदका लागि १२ लाख रुपैयाँ विनियोजन गराएका छन् । एकल महिलालाई आयआर्जनका लागि फिर्ता गर्नु नपर्नेगरी १० हजार रुपैयाँ बीउ पुँजी प्रदान गर्ने निर्णय गरेका छन् । गत वर्ष ६० जनालाई वितरण गरे । क्यान्सर, मुटु र मिर्गौला रोगपीडितलाई ३० हजार रुपैयाँ सहयोग प्रदान गर्ने निर्णय गरेका छन् । गत वर्ष ७९ जनाले त्यस्तो सहयोग लिए । चालु वर्षको अहिलेसम्म ३८ जनाले उक्त सहयोग पाइसकेको उनले बताए । गाउँपालिकाका २४ विद्यालय र १७ मदरसाका छात्रालाई स्यानेटरी प्याड नि:शुल्क उपलब्ध गराइएको छ । मोतीपुरमा गाउँपालिकाको अग्रसरतामा कन्या कलेज सञ्चालन गरिएको छ । गाउँपालिकाको १६ लाख रुपैयाँ लगानीमा कलेजका लागि तीनकोठे भवन बनाइएको छ । त्यहाँ ६, ७ र ८ कक्षा सञ्चालित छन् । सांसद चक्रपाणी खनालको संसदीय विकास कोषको ५० लाख रकमले उक्त कलेज भवनको डीपीसीसम्म निर्माण गरिएको छ । गाउँपालिकाको बहुवर्षे योजनाअन्तर्गत ५ करोड ८० लाख रुपैयाँ लागतमा बेथीखोलामा पुल निर्माण भइरहेको छ । ७० प्रतिशत काम भइसकेको छ । विपत्ति, दुर्घटनामा परी ज्यान गुमाउनेलाई पनि ३० हजार सहयोग गर्ने निर्णय गरेका छन् । ‘तीन दशकदेखि जनतासँग छु,’ उनले भने, ‘कहाँका जनतालाई के चाहिन्छ मैले राम्रोसँग बुझेको छु ।’

सीमित स्रोतसाधनलाई कसरी परिचालन गर्ने भन्ने उनलाई राम्ररी थाहा छ । मजदुरदेखि चालक र कृषकदेखि जमिनदार भएका खाँले अनुभवबाट सिकेका कुराबाटै समाजको खाँचो पहिल्याएका छन् । ‘मोटरसाइकलभन्दा माथिका साधन चढ्ने मेरो हैसियत छैन,’ उनले भने, ‘पहिले गाविसको अध्यक्ष र उपाध्यक्ष हुँदा त साइकल चढेर सेवा गरेको हुँ ।’ उनलाई गाउँसभाले मासिक ६० लिटर पेट्रोल सुविधा दिएको छ । तर उनले निर्वाचित भएदेखि अहिलेसम्म पाँच लिटरमात्र लिएका छन् । पछिल्लोपटक राष्ट्रिय जनता पार्टी छाड्दै स्वतन्त्र उम्मेदवार दिएर गाउँपालिका अध्यक्ष जिते पनि उनी पार्टीको संगठन हुँदै राजनीतिमा सक्रिय रहेका हुन् । सद्भावना पार्टीको केन्द्रीय महासचिवसम्म भएका उनी ०४८ मा साबिक बाँसखोर गाविसको उपाध्यक्ष र ०५४ मा अध्यक्षमा निर्वाचित भएका थिए । ‘अध्यक्षको विकासप्रति लगाव छ,’ प्रशासकीय अधिकृत प्रेम खनालले झने, ‘व्यतिगत र दलगत स्वार्थ नहुँदा काम गर्न सजिलो भएको छ ।’ फरक दलको भए पनि राम्रो कामका लागि अध्यक्षको सहयोगी भावना हुँदा गाउँमा विकासले गति लिएको उपाध्यक्ष सुधादेवी पाण्डेले बताइन् ।

प्रकाशित : कार्तिक २०, २०७६ १०:५४
ADVERTISEMENT
प्रतिक्रिया
पठाउनुहोस्

उपनिर्वाचन : मतदाता रिझाउन रोड शो

कान्तिपुर संवाददाता

(सुनसरी) — राजनीतिक दलहरूले मंसिर १४ मा हुने उपनिर्वाचनलाई लक्षित गरी प्रमुख पदको उम्मेदवार घोषणा लगत्तै धरान उपमहानगरमा चुनावी अभियानलाई तीव्र बनाएका छन् । 

दुई ठूला प्रतिस्पर्धी दलमध्ये नेकपाले २१ सय सदस्यीय र कांग्रेसले ३३ सय सदस्यीय निर्वाचन परिचालन मूल कमिटी बनाएका छन् । दुवै दलले चुनावी कार्यक्रमका तालिका सार्वजनिक गरेका छन् । मतदाताको ध्यानाकर्षण गर्न प्रचारात्मक अभियानसँगै र्‍याली, रोड शो, घरदैलो, टोलसभा गर्ने प्रतिस्पर्धा दुई पार्टीबीच चलेको छ । धरानमा प्रमुख पदका लागि एक स्वतन्त्रसहित सात जनाले उम्मेदवारी दिएर आफ्नो एजेण्डासहित प्रचारमा जुटेका छन् । उपनिर्वाचनमा प्रमुख पदका लागि नेकपाबाट प्रकाश राई, कांग्रेसबाट तिलक राई, समाजवादी पार्टीबाट गजेन्द्र इस्वो, साझा पार्टीबाट राजकुमार श्रेष्ठ, राष्ट्रिय जनमुक्ति पार्टीबाट चित्र मगर, संघीय लिम्बुवान मञ्च नेपालबाट अमर इजम, स्वतन्त्रबाट हर्क साम्पाङ मैदानमा उत्रिएका छन् ।

उपनिर्वाचन नजिकिएपछि विभिन्न दलहरूले उम्मेदवारी घोषणा गरेपछि धरानमा राजनीतिक सरगर्मी बढेको छ । नेकपाले पुरानो राजनीतिक विरासतलाई कायम राख्न जिल्ला सचिव रमेश बस्नेतको संयोजकत्वमा २१ सय सदस्यीय निर्वाचन परिचालन कमिटी गठन गरेको छ । जिल्ला इन्चार्ज तथा केन्द्रीय सदस्यीय धर्म निरौलाको संयोजकत्वमा निर्वाचन अनुगमन समिति गठन गरिएको छ । उक्त समितिमा केन्द्रीय, प्रदेश र स्थानीय नेताहरू छन् ।

नेकपाका निर्वाचन परिचालन कमिटीका संयोजक रमेश बस्नेतले भने, ‘उम्मेदवारी घोषणासँगै चुनावी अभियान तातिएको छ । विपक्षीले लगाएका आरोपलाई चिर्दै मतदाताको घरदैलो पुग्ने क्रम बाक्लिएको छ ।’ उनले नेकपाले धरानमा चुनाव जित्ने आधार धेरै भएको दाबी गर्दै कांग्रेसलाई कम्तीमा ७–८ हजारको फरक मतले जित्ने बताए ।

कांग्रेस सत्तामा रहेको बेलादेखि नै धरानबाट आधा दर्जन बढी क्षेत्रीयस्तरका सरकारी कार्यालयहरू, आधा दर्जन अञ्चल र जिल्लास्तरीय सरकारी निकायहरू रातारात सारिएकाले धरानको विकास निर्माण सुस्त हुँदाहुँदै पनि धराने जनताले आफ्नै मिहिनेत र श्रमले धरानको विकास निर्माण गरेको बताए । उनले भने, ‘जनताका अपेक्षा धेरै छन् । कतिपयमा आक्रोश पनि छ । ती अपेक्षा पूरा गर्न र उनीहरूका आक्रोश शान्त पार्न जनताले फेरि धरानमा नेकपालाई जिताउनेछन् ।’ उनले पहिलेका चुनावहरूमा केन्द्रीय सत्ता कांग्रेसको हुँदा धरानमा वामपन्थीले जित्ने गरेकाले धरानको विकास निर्माणमा कांग्रेसले बेवास्ता गर्ने गरेको उल्लेख गर्दै अहिले केन्द्र र प्रदेशमा नेकपाकै सत्ता भएकाले धरानको तीव्र विकास निर्माणका लागि जनताले नेकपालाई नै जिताउनुपर्ने बताए ।

कांग्रेसको निर्वाचन मूल परिचालन स्टेयरिङ कमिटीका सदस्य तथा नगरसचिव श्याम पोखरेलले दसैंअगाडि नै धरान कांग्रेसले सर्वसम्मतले उम्मेदवारी सिफारिस गरिसकेकाले बजार क्षेत्रबाहेक गाउँक्षेत्रमा एक चरण घरदैलो अभियान सकिएको बताए । उनले भने, ‘०४६ पछि लगातार वामपन्थीले जितेको धरानमा वामपन्थीले जनताको हितमा कुनै काम नगरेकाले यसपटक कांग्रेसलाई मत दिनेहरूको संख्या बढेको घरदैलो अभियानबाट बुझियो ।’ उनले तात्कालीन एमाले जनप्रतिनिधिले धरानको बसपार्क, खानेपानी, एयरपोर्ट र सुकुम्बासी समस्या समाधान गर्न नसकेकाले धरानका मतदाताले विकल्प खोजेको बताए । झन् पछिल्लो समयमा स्थानीय सरकारले जनताको ढाड सेक्ने गरी कर वृद्धि गरेकाले नेकपाप्रति मतदाताको रुझान घटेको दाबी पनि पोखरेलले गरे । जिल्ला निर्वाचन कार्यालय सुनसरीका सूचना अधिकारी अजय मिश्रका अनुसार २० वटा वडा रहेको धरान उपमहानगरपालिकामा ०७४ मा मतदाता संख्या ७९ हजार २ सय ९० थियो । अहिले मतदाता संख्या बढेर धरानमा ९२ हजार ८ सय ५३ जना पुगेका छन् ।

०७४ असार १४ गतेको स्थानीय तहको निर्वाचनमा धरान उपमहानरपालिकामा तात्कालीन एमालेका तारा सुब्बाले २० हजार ९ सय ७५ मत ल्याएर जितेका थिए । उनका निकटतम् प्रतिद्वन्द्वी कांग्रेसका उम्मेदवार तिलक राईले १६ हजार १ सय २ मत प्राप्त गरेका थिए । एमालेसँग फराकिलो मतान्तरले पराजित भएका कांग्रेसका राई उपनिर्वाचनमा फेरि प्रतिस्पर्धामा उत्रिएका छन् । त्यसबेलाको चुनावमा माओवादी केन्द्रले संघीय समाजवादीसँग तालमेल गरेर उठेका संयुक्त उम्मेदवार अइन्द्रविक्रम बेघाले ११ हजार १ सय ८० मत पाएका थिए ।

पाँचथरमा ३१ मतदान केन्द्र
ताप्लेजुङ– उपनिर्वाचनका लागि पाँचथरका तीनवटा स्थानीय तहमा १७ वटा मतदानस्थल रहने भएका छन् । तिनमा ३१ मतदान केन्द्र हुनेछन् । जिल्ला निर्वाचन कार्यालयका अनुसार अध्यक्ष पदका लागि निर्वाचन हुने फाल्गुनन्द गाउँपालिकामा १३ वटा मतदानस्थल र २३ मतदान केन्द्र तोकिएको छ । सदरमुकाम फिदिम नगरपालिका वडा १ मा १ मतदानस्थल र ४ वटा मतदान केन्द्र र हिलिहाङ गाउँपालिका ७ मा ३ वटा मतदानस्थल र ४ वटा मतदान केन्द्र तोकिएको छ ।

फिदिम नगरपालिका वडा १, हिलिहाङ गाउँपालिका वडा ७ मा वडाध्यक्ष र फाल्गुनन्द गाउँपालिकामा अध्यक्ष पदका लागि निर्वाचन हुँदै छ । उपनिर्वाचनका लागि फाल्गुनन्द गाउँपालिकामा १६ हजार ५ सय ७७, फिदिम नगरपालिका १ मा ३ हजार ६ सय ७६ र हिलिहाङ गाउँपालिका ७ मा २ हजार ६ सय मतदाता छन् । २०७४ को स्थानीय तह निर्वाचनमा कांग्रेसबाट फाल्गुनन्द अध्यक्षमा निर्वाचित अम्बरकुमार नेम्वाङ र फिदिम नगरपालिका १ मा कांग्रेसबाटै निर्वाचित हर्कबहादुर मोक्तान र हिलिहाङ ७ मा तत्कालीन एमालेबाट निर्वाचित वडाध्यक्ष तीर्थ तिम्सिनाको निधन भएपछि पद रिक्त थियो । निर्वाचनका लागि दलहरूले तयारी तीव्र बनाएका छन् । तीनवटै स्थानीय तहमा सत्तारूढ दल नेपाल कम्युनिस्ट पार्टी र प्रतिपक्षी कांग्रेसबीच मुख्य प्रतिस्पर्धा हुने देखिएको छ । तीबाहेक समाजवादी पार्टी, संघीय लिम्बुवान मञ्च र राप्रपासहितका दलले उम्मेदवार टुंगो लगाउँदै मतदाताबीच भेटघाटलाई तीव्र बनाएका छन् ।

कास्कीमा तात्यो माहोल

पोखरा – उम्मेदवारको टुंगोसँगै कास्की– २ को प्रतिनिधिसभा उपनिर्वाचनमा राजनीतिक दल होमिएका छन् । हालसम्म कांग्रेसबाहेक सबैजसो पार्टीले उम्मेदवार टुंग्याइसकेका छन् । नेपाल कम्युनिस्ट पार्टी (नेकपा) कास्कीले मंगलबार चुनावी योजना सार्वजनिक गरेको छ ।

पोखरामा सोमबार बसेको जिल्ला समितिको पाँचौं बैठकको निर्णय सार्वजनिक गर्दै अध्यक्ष कृष्ण थापाले आक्रामक चुनावी योजना बनाएको बताए । ‘वैचारिक स्पष्टता, प्रभावकारी परिचालन र आक्रामक प्रचारसहित कास्की २ मा पार्टीका उम्मेदवार विद्या भट्टराईलाई विजयी गराउन सम्पूर्ण पार्टी पंक्ति परिचालित हुनेछ,’ उनले भने । नेकपा कास्कीले जिल्ला इन्चार्ज राजकाजी गुरुङको संयोजकत्वमा निर्वाचन मूल कमान्ड कमिटी बनाएको छ । जिल्ला अध्यक्ष कृष्ण थापाको संयोजकत्वमा २ हजार ६ सय ४१ सदस्यीय निर्वाचन परिचालन समिति गठन गरेको छ । जिल्ला नेताको संयोजकत्वमा चुनाव हुने महानगरका ११ वटै वडामा वडास्तरीय निर्वाचन कमान्ड टिम बनेको छ । कात्तिक २१ मा क्षेत्र नम्बर २ उपनिर्वाचन परिचालन समितिको कार्यालय उद्घाटन गर्ने, उम्मेदवार र जुलुससहित उम्मेदवारी दर्ता गर्न जाने, कात्तिक २३ मा निर्वाचनसँग सम्बन्धित जिल्लास्तरीय बृहत् कार्यकर्ता प्रशिक्षण गर्ने, प्रशिक्षणमा नेकपा अध्यक्ष पुष्पकमल दाहाल र महासचिव विष्णु पौडेलले सम्बोधन गर्ने, कात्तिक २४ मा निर्वाचन क्षेत्रमा पर्ने ११ वटै वडा निर्वाचन परिचालन समितिको कार्यालय उद्घाटन गर्ने नेकपा कास्कीको योजना छ ।

साझा पार्टीले तिहारदेखि नै प्रचारप्रसार थालेको छ । निर्वाचन क्षेत्रमा तिहारमा देउसीभैलो खेलेको साझा पार्टीले हाल मतदातासम्म पुग्न घरदैलो गरिरहेको छ । उम्मेदवार रजनी केसीले वैकल्पिक राजनीतिको मुद्दासहित मत मागिरहेकी छन् । घरदैलोमा साझा पार्टीका केन्द्रीय संयोजक रवीन्द्र मिश्र सहभागी छन् ।

समाजवादी पार्टी नेपालले कास्की–२ मा इन्जिनियर धर्मराज गुरुङलाई उम्मेदवार बनाएको छ । पार्टीले मंगलबार पत्रकार सम्मेलनमार्फत चुनावी प्रतिबद्धतापत्र सार्वजनिक गर्‍यो । गुरुङले देशले राजनीतिक विकल्प खोजेको र उक्त विकल्प समाजवादी पार्टी बन्ने दाबी गरे । विवेकशील नेपाली दलले पनि मंगलबार नै उम्मेदवार घोषणा गरेको छ । उक्त पार्टीले कास्की–२ मा जमुना शर्मा र बागलुङ २(२) मा सन्तोष भण्डारीलाई उठाउने मंगलबार पोखरामा पत्रकार सम्मेलन गरी सार्वजनिक गरेको छ । पोखरा–६ कि जमुना शर्मा महिला अधिकारको क्षेत्रमा क्रियाशील छिन् । राप्रपाले यसअघि रोमनाथ भण्डारीलाई उम्मेदवार बनाउने घोषणा गरिसकेको छ ।


प्रकाशित : कार्तिक २०, २०७६ १०:५३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT