‘नो पार्किङ’ मा लहरै सवारी

मधु शाही

(बाँके) — ट्राफिक साइनबोर्डमा लेखिएको छ, ‘नो पार्किङ’ । त्यहीवरिपरि भने सडक नै अवरुद्ध हुने गरी मोटरसाइकल, साइकल र गाडीको पार्किङ खचाखच छ । ट्राफिक प्रहरीको दिन त्यही ‘नो पार्किङ’ मा राखिएका सवारीसाधन कहिले यता हटाउने त कहिले उता हटाउनेमै बित्छ । स्मार्ट सिटी बनाउने नेपालगन्ज उपमहानगरपालिकाको सोचलाई अव्यवस्थित पार्किङ प्रवृत्तिले चिन्तित बनाएको छ । 

ZenTravel

नेपालगन्जका सबैभन्दा पुराना बजार सदरलाइन, त्रिभुवन चोक, न्युरोड, बीपीचोक, रानी तलाउ हुन् । त्यहाँ किनमेल गर्न आउनेको जहिल्यै घुइँचो लाग्छ । उनीहरू पार्किङ गर्ने सुरक्षित र व्यवस्थित स्थान नहुँदा सकडमै जथाभावी सवारी राख्न बाध्य छन् । यसै बेला ट्राफिकले साधन उठाएर लैजाने गर्दा सास्ती भएको सर्वसाधारणको गुनासो छ ।

Meroghar


सदरलाइनमा आइतबार किनमेल गर्न आएका मोहन ठकुरीले नो पार्किङ लेखिएकै ठाउँमा मोटरसाइकल पार्किङ गरे । ट्राफिक नियम उल्लंघन गर्नु हुँदैन भन्ने थाहा हुँदाहुँदै पनि उनले पार्किङ गरे । ‘पैसा तिर्छु भन्दा पनि पार्किङ गर्ने स्थान छैन,’ उनले भने, ‘यस्तो व्यस्त बजारमा दुई/चारवटा मोटरसाइकल अटाउने मात्रै पार्किङ छ । जुन साह्रै अपुग छ ।’ बागेश्वरी टोलकी गीता भुजेलले सुरक्षित पार्किङ स्थलको अभावमा सर्वसाधारणले निकै कष्ट झेल्नु परेको बताइन् । ‘नजिकै व्यापार भएको ठाउँमा पार्किङ गर्दा ट्राफिकले थुप्रैपटक सवारीसाधन नियन्त्रणमा लिएका छन्,’ उनले आफ्नै अनुभव सुनाउँदै भनिन्, ‘यहाँ राख्न पाइँदैन भन्छन्, कहाँ राख्ने भनेर स्थान भने तोक्दैनन् ।’

त्रिभुवन चोकमा खटिएका प्रहरी जवान पाण्डव केसीका अनुसार सुरक्षित पार्किङस्थल नहुँदा भीडभाडमा दुर्घटनासमेत हुने गरेको छ । सवारीसाधन सडकमै राख्दा हिंडडुल गर्ने पैदल यात्रु मर्कामा परेको उनले बताए । टाँगा, रिक्सा चल्न थाले भने सडक जाम भएर नियन्त्रणमा ल्याउनै गाह्रो पर्ने उनको अनुभव छ । व्यवस्थित सडक बनाउन बाटो बढाए पनि पार्किङमा ध्यान नदिंदा समस्या भएको फैन्सी ज्वैलर्सका व्यापारी मोहमद हजुवले बताए । ‘जहाँ पार्किङ स्थल हुँदैन, त्यो सहर व्यवस्थित र स्मार्ट सिटी बन्नै सक्दैन,’ न्युरोडकै अर्का व्यापारी जगतनारायण चौधरीले भने, ‘सडक ठूलो बनाउँदादेखि नै दयामाया नगरी अलि धेरै क्षेत्र ओगटेको भए अहिले पार्किङको समस्या नै हुने थिएन ।’

यहाँको सुर्खेत रोडमा व्यवस्थित ढंगले सवारी साधन राख्ने प्रयास थालिएको छ । तर, त्यहाँ पनि पर्याप्त स्थानको अभाव छ । एकातिर सर्वसाधारणलाई ट्राफिक नियमबारे कम चेतना भएकाले अटेरी गर्नु र पार्किङको सुरक्षित स्थान नतोकिनुले समस्या भएको बाँके जिल्ला ट्राफिक कार्यालय प्रमुख पविन्द्रबहादुर बलले बताए । उनका अनुसार ५ सयदेखि हजार रुपैयाँ जरिवाना लिंदा पनि मान्छेहरू अटेरी गर्छन् ।

नेपालगन्ज उपमहानगरपालिका प्रमुख धवलशमशेर राणाले भने पार्किङ क्षेत्र प्रशस्त भएको दाबी गरे । शुल्कसहित पार्किङस्थल बनाउने योजना सुनाउँदा व्यापारीले सहमति नजनाएको उनको दाबी छ । ‘जहाँ बजार छ, त्यहीँ पार्किङस्थल बनाउनुपर्छ भन्दै व्यापारी जबरजस्ती गर्छन्,’ उनले भने ।

प्रकाशित : कार्तिक ५, २०७६ १०:२६
ADVERTISEMENT
प्रतिक्रिया
पठाउनुहोस्
ADVERTISEMENT

लामी रहमा उच्च बाँध

अमृता अनमोल

(बुटवल) — लामी रहमा बहुउद्देश्यीय उच्च बाँध निर्माण गरिने भएको छ । चुरे संरक्षण, जमिनमुनिको पानी रिचार्ज, सिँचाइ र जलपर्यटन प्रवर्द्धन गर्ने लक्ष्यसहित बाँध निर्माण योजना अगाडि बढाइएको हो । सैनामैना नगरपालिकाको अगुवाइमा राष्ट्रपति चुरे संरक्षण विकास समितिले काम थालेको छ । 

रूपन्देहीको सैनामैना नगरपालिका–३, गंगानगरनजिकै लामी रह छ । जुन पूर्वपश्चिम राजमार्गको मुर्गियादेखि करिब तीन किलोमिटर उत्तरमा पर्छ । चुरेबाट कलकल बग्ने खप्परखोला त्यहाँ आएपछि ताल परेको छ । रह हाल करिब ४० मिटर क्षेत्रफलमा फैलिएको छ । नगर प्रमुख चित्रबहादुर कार्कीले जलपर्यटन प्रवर्द्धन र सिँचाइ सुविधा बढाउने मुख्य उद्देश्यसहित बाँधसहितको बहुउद्देश्यीय जलाशय पार्क निर्माण थालिएको बताए । ‘वर्षातको भेलसहितको पानीलाई बाँधमा संकलन गरेर राखी माग र आवश्यकताअनुसार बाह्रै महिना उपयोग गरिनेछ,’ उनले भने, ‘आसपासको सुन्दरता बढाएर पर्यटकको आगमन बढाइनेछ ।’ जलाशयको पानीमा बोटिङ गर्ने, माछा पालन गर्ने, होटल, रिसोर्ट र वाटर फन पार्क सञ्चालन गर्ने सहायक योजना बनाएको उनले बताए ।

रहमा अहिले पनि स्थानीय पौडी खेल्न, माछा मार्न र पानीको मजा लिन जाने गरेका छन् । साइकिलिङ गर्ने र पिकनिक खान जाने पनि रह आसपासमा भेटिन्छन् । गंगानगर क्षेत्रमा सिँचाइ गर्न यही खोलाबाट पानी लगिएको छ । तर, बाढी र कटानले कुलो भत्किइरहन्छ । यसले बाह्रैमास सिँचाइमा उपयोग गर्न नसकिएको स्थानीय रामबहादुर थापाले बताए । ‘सैनामैनामा चुरे पहाडबाट बगाएर ल्याएको पाँगो मिसिएको मलिलो माटो छ,’ उनले भने, ‘बाँधबाट सिँचाइ पुर्‍याउने हो भने कृषि उत्पादन दोब्बर बढाउन सकिनेछ ।’ पानीको बहुउपयोग गर्न भन्दै राष्ट्रपति चुरे संरक्षण विकास समितिले गत वर्ष लामी रह बाँधको सम्भाव्यता अध्ययन गरेको थियो । खप्परखोला हिउँदमा समेत नसुक्ने भएकाले ४० मिटर अग्लो बाँधसहितको जलाशय निर्माण गर्न सकिने अध्ययनमा उल्लेख छ । त्यसकै आधारमा चालु आर्थिक वर्षमा बाँधको विस्तृत अध्ययन प्रतिवेदन तयार गर्दै छ । समितिको बुटवल कार्यालय प्रमुख तथा उपसचिव अजय कार्कीले बाँध निर्माणका लागि पहिलो चरणमा ३० लाख बजेट विनियोजन भएको बताए । ‘विस्तृत प्रतिवेदनको काम सकेलगत्तै चालु आर्थिक वर्षबाटै निर्माणको काम सुरु हुनेछ,’ उनले भने, ‘त्यसमा बाँध निर्माण र पर्यापर्यटनको काम समितिले र सिँचाइको काम सिँचाइ विभागले अगाडि बढाउने तयारी छ ।’

लामी रहसम्म अहिले मोटर बाटो पुगेको छ । यहाँबाट पाल्पाको कचल, उदाङलगायत बस्ती नजिक छन् । उनीहरू आफ्ना कृषि उपज बेच्न तथा अन्य सामग्री किन्न यही बाटो भएर पैदल आउजाउ गर्छन् । रह नजिकमा पार्क छ । स्थानीयले रमाइलो गर्ने र वनभोज खाने स्थल बनेको छ, यो पार्क । पर्यटन प्रवर्द्धनका लागि नगरपालिकाले रहसँगै त्यस पार्कको संरक्षण र सुन्दरता बढाउने काम थालेको छ । चुरे क्षेत्रको जंगल सफारी गराउन सम्भाव्यता अध्ययन गरेको छ । त्यसका लागि पर्यटन प्रवर्द्धन र पूर्वाधार विकासमा बजेट विनियोजन गरेको प्रमुख प्रशासकीय अधिकृत कृष्णप्रसाद भण्डारीले बताए ।

जलाशयको एक किलोमिटर दूरीभित्र सैनामैना पुरातात्त्विक क्षेत्र छन् । बुद्ध पार्क र थारू होमस्टे निर्माणाधीन अवस्थामा छन् । बुद्ध जन्मस्थल लुम्बिनी आउने पर्यटकलाई ती क्षेत्र हुँदै लामी रहमा पुर्‍याउने दीर्घकालीन लक्ष्य छ । ‘त्यसका लागि बुद्ध सर्किटमा लामी रहलाई जोडिनेछ,’ राष्ट्रपति चुरे संरक्षण विकास समितिसँगै अनुगमनमा आएका पूर्वअर्थमन्त्री विष्णु पौडेलले भने, ‘लुम्बिनी आउने पर्यटकको बसाइ अवधि बढाउन र पानीमा रमाउन यो नयाँ गन्तव्य बन्ने निश्चित छ ।’

प्रकाशित : कार्तिक ५, २०७६ १०:२४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
×