टिपर दुर्घटनामा सहचालकको मृत्यु
पाल्पा — पाल्पाको पूर्व निस्दी गाउँपालिका-७ ज्यामिरेमा भएको टिपर दुर्घटनामा रुपन्देहीको सियारीका १८ वर्षीय सहचालक विवेक खत्रीको मृत्यु भएको छ । होङ्सी शिवम् सिमेन्टको चुनढुङ्गा खानी नजिकै आइतबार बेलुकी भएको लु २ ख ३५८७ नम्बरको टिपर दुर्घटनामा खत्रीको घटनास्थलमै मृत्यु भएको इलाका प्रहरी कार्यालय रामपुरले जनाएको छ ।
दुर्घटनामा रिब्दिकोट गाउँपालिका–८ फेकका ३२ वर्षिय चालक गणेश कुँवर सख्त घाइते भएको प्रहरीले जनाएको छ । घाइते कुँवरको चितवनस्थित भरतपुर मेडिकल कलेजमा उपचार भइरहेको इलाका प्रहरी कार्यालय रामपुरका प्रहरी निरीक्षक भुपाल सिंह रानाले जानकारी दिएका छन् ।
घटनाका विषयमा थप अनुसन्धान भइरहेको छ । जिल्ला सदरमुकामदेखि झण्डै ७० किलोमिटर पूर्व दुर्गम गाउँमा भएको दुघटनाको जानकारीसमेत ढिला आएकाले सोमबार बिहान मात्र घटनास्थलको मुचुल्का भएको छ ।
प्रकाशित : आश्विन २७, २०७६ १०:०५