मन्दिरमा श्रद्धालुको भीड

बिहान पूजा र बेलुकामा प्रवचनसहित भजन–किर्तनमा श्रद्धालु रमाउने गर्छन्, भक्तजनले दुर्गामाताका लागि ल्याएका चुनरी ओढाइदिने गर्छन्
कान्तिपुर संवाददाता

रूपन्देही — दसैंका अवसरमा रुपन्देहीका सहर र ग्रामीण क्षेत्रका टोलटोलमा दुर्गा मन्दिर स्थापना गरेर पूजाअर्चना भइरहेको छ  । समिति बनाएर पूजा गर्ने परम्पराअनुसार माटाका ठूलाठूला मूर्ति स्थापना गरिएको छ  ।

त्यहाँ साँझ–बिहान पूजा गरिन्छ । दिनभर भजन बजाउने गरिएको छ । आकर्षक तरिकाले सजाइएका कारण श्रद्धालुको भीड लाग्छ ।

बुटवलको ट्राफिकचोकस्थित पुरानो दुर्गा मन्दिरमा प्रत्येक दिन बिहान पूजा गर्नेको भीड लाग्छ । त्यहाँ दिनभर भक्तजन आउँछन् । काठमाडौंबाट बिदामा आएकी पूजा पाण्डे शुक्रबार बिहान दुर्गा मन्दिर पुगेकी थिइन् । दसैंका बेला पूजा गरे निडर र शक्तिशाली भइने विश्वासले मन्दिर आउने गरेको उनले बताइन् । अध्ययनका लागि जिल्ला बाहिर बस्ने उनी दसैंका बेला घर आउने र दुर्गा मन्दिरमा पूजा गर्ने गर्छिन् ।

विगत जस्तै यस वर्ष पनि बुटवल, भैरहवालगायत आसपासका क्षेत्रमा मूर्ति स्थापना गरेर पूजापाठ भइरहेका दृश्य देखिन्छन् । कतिपय स्थानमा मन्दिर निर्माण गरेर पूजा भइरहेको छ । कतिपय स्थानमा मूर्ति राखिएका छन् । यसरी ९ दिनसम्म दुर्गाको पूजा गरी दशमीका दिन मान्यजनबाट टिका तथा जमरा ग्रहण गरी दसैं मनाउने परम्परा छ ।

तिलोत्तमा नगरपालिका ६ स्थित दुर्गामन्दिर ०७० मा स्थापना भएको हो । अहिले मन्दिरमा दैनिक पूजा गर्नेको भीड लाग्छ । बिहान पूजा र बेलुकामा प्रवचनसहित भजन किर्तनमा श्रद्धालु रमाउने गर्छन् । भक्तजनले दुर्गामाताको लागि चुनरी ल्याई ओढाइदिने गरेका छन् । ९ दिनसम्म पूजा गर्ने र व्रत बस्ने श्रद्धालु धेरै हुन्छन् ।

पाल्पा पर्बासस्थित मेडिकल कलेजमा एमबिबिएस अध्ययनरत युनाल भण्डारी नवदुर्गाको व्रत बसिरहेका छन् । दुर्गामाताले शक्ति प्रदान गर्ने विश्वासमा सधै व्रत बस्ने गरेको उनले बताए । मन्दिरका पूजारी राधाकृष्ण उपाध्यायले दसैंमा भिड हुने बताए ।

‘जिल्ला बाहिर रहेकाहरू घर आउछन,’उनले भने, ‘पूजा गर्नेको भीड बिहानैदेखि हुन्छ ।’ साँझमा भजनकिर्तन सहित प्रवचन र लक्ष्यवर्ती हुने उनले बताए । घटस्थापनादेखि कोजाग्रत पूर्णिमासम्म मन्दिरमा स्थानीयबाहेक अन्य ठाउंबाट समेत भक्तजन आउने गरेका छन् । पूजाआजा मात्र नभई प्रवचन र किर्तनले समेत श्रद्धालुको घुइंचो बढाएको उनले बताए ।

सिद्धार्थनगर ८, भैरहवा गाउँमा नवयुवा दुर्गापूजा समितीले नौतनवाबाट दुर्गा मूर्ति ल्याएर दैनिक पूजापाठ गरिरहेको छ । ‘प्रत्येकवर्ष यसरी मूर्ति स्थापना गरी पूजाअर्चना गर्छौ,’ समितीका सल्लाहकार विनोद विकले भने, ‘युवाको अग्रसरतामा मुर्ती ल्याएपनि पूजा गर्न सबैलाई सजिलो भएको छ ।’ उक्त स्थानमा भक्तजनले पूजा गर्नुका साथै ध्यान गर्ने र भजन गाउने गरेका छन् ।

सैनामैनाको होमस्टेमा दुर्गा पूजाका लागि लुम्बिनीबाट मुर्ती ल्याई राखिएको छ । टाढा गएर पूजा गर्ने झन्झट नहोस् भन्ने उद्धेश्यले वर्षेनी मुर्ती स्थापना गरेर पूजा गरिने मुर्ती व्यवस्थापन समितीका प्रतिनिधी जितेन्द्र ठाकुरले बताए । दसैंका बेलामा राखिने मुर्तीले रमाइलो र भक्तिभावको शोभा दिने उनले बताए ।

दसैंको अवसर पारेर भारतबाट आयातित र नेपालबाटै लयाइएका दुर्गा मुर्ती र दुर्गामन्दिरमा भक्तजनको उपस्थिती अन्य समयमा भन्दा बढी हुने गर्दछ । दुर्गा स्तुती वाचन र भजन किर्तनले समेत मानिस मन्दिर र मुर्ती भएका स्थानमा पुग्ने गरेका छन् ।

प्रकाशित : आश्विन १८, २०७६ ११:१६
प्रतिक्रिया
पठाउनुहोस्

ज्येष्ठ नागरिकको घरमै उपचार

अमृता अनमोल

बुटवल — दसैंको अवसर पारेर यहाँका धेरै स्थानीय तहले सामाजिक सुरक्षा भत्ता बाँडेका छन्  । बुटवल उपमहानगरले घरदैलोमै पुगेर स्वास्थ्य उपचार गरिरहेको छ  ।

चाडबाडका बेला घरमै स्वास्थ्य सेवा पाउँदा वृद्धवृद्धा खुसी छन् । बिहीबार बुटवल उपमहानगरपालिका–१ का वडाध्यक्ष महेन्द्र लिगल स्वास्थ्यकर्मी लिएर घरघरै पुगे । स्थानीय १ सय ५ वर्षीय सेतीलक्ष्मी श्रेष्ठलाई भेटे ।

उनीसँगै गएका स्वास्थ्यकर्मीले स्वास्थ्य परीक्षण गरे । ‘आमाको रक्तचाप अलि कम रहेछ । यसले रिंगटा लाग्न सक्छ,’ स्वास्थ्यकर्मी गीता शर्माले भनिन्, ‘शरीर दुखेमा खाने सिटामोल र कमजोरी हटाउन भिटामिन दिएका छौं ।’

स्वास्थ्यकर्मीको टोली ८९ वर्षीय चन्द्रमान शाक्यको घरमा पुग्यो । बेलाबेलामा रक्तचाप बढ्ने र हाडजोर्नीको समस्या देखिन्छ । स्वास्थ्यकर्मीले चिसोबाट बच्न, गेडागुडी र नुन कम खान सुझाव दिए । दुखाइ कम गर्ने औषधि र भिटामिन दिए । उपमहानगरले दुई वर्षदेखि ८४ वर्ष उमेर पुगेका ज्येष्ठ नागरिकलाई घरदैलोमै स्वास्थ्य उपचार प्रदान गरिरहेको छ ।

गत वर्षबाट ८० वर्ष पुगेकालाई सेवा दिइरहेको हो । प्रत्येक चौमासिकमा उपमहानगरका १९ वडामा स्वास्थ्यकर्मी खटिने गर्छन् । स्वास्थ्य टोलीमा वडाका प्रतिनिधि, नगर स्वास्थ्य केन्द्रका स्वास्थ्यकर्मी र महिला स्वास्थ्य स्वयंसेविका हुन्छन् । उनीहरूले ज्येष्ठ नागरिकको चेकजाँच गरी सामान्य खालका बिरामीलाई घरमै औषधि दिन्छन् ।

औषधिसँगै उमेर अनुसार उपयोगी हुने भिटामिन तथा पोषक तत्त्व समेत निःशुल्क वितरण गर्छन् । जटिल रोगका लागि भने सरकारी अस्पतालमा रिफर गर्ने गरेका छन् । त्यहाँ समेत ज्येष्ठ नागरिकको निःशुल्क उपचार गर्ने व्यवस्था मिलाइएको छ ।

चाडबाडका बेला ज्येष्ठ नागरिकमा हुन सक्ने स्वास्थ समस्या ख्याल गरेर स्वास्थ्य परीक्षण गरिएको वडाध्यक्ष लिगलले बताए । परिवारबाट रेखदेख नपाएका नागरिकका लागि छिमेकी र परिवारका सदस्य जुटाएर सम्मान र संरक्षणको वातावरण मिलाउन सहजीकरण गरेको उनले सुनाए ।

उपमहानगरका प्रमुख शिवराज सुवेदीले चाडबाडका बेला ज्येष्ठ नागरिकलाई स्वस्थ र खुसी पार्न भन्दै जनप्रतिनिधि र स्वास्थ्य टोली घरदैलोमा खटेको बताए । उपमहानगरमा ८० वर्ष पुगेका करिब ८ सय वृद्धवृद्धा छन् ।

प्रकाशित : आश्विन १८, २०७६ ११:१६
पूरा पढ्नुहोस्
प्रतिक्रिया
पठाउनुहोस्