ज्येष्ठ नागरिकको घरमै उपचार

अमृता अनमोल

बुटवल — दसैंको अवसर पारेर यहाँका धेरै स्थानीय तहले सामाजिक सुरक्षा भत्ता बाँडेका छन्  । बुटवल उपमहानगरले घरदैलोमै पुगेर स्वास्थ्य उपचार गरिरहेको छ  ।

चाडबाडका बेला घरमै स्वास्थ्य सेवा पाउँदा वृद्धवृद्धा खुसी छन् । बिहीबार बुटवल उपमहानगरपालिका–१ का वडाध्यक्ष महेन्द्र लिगल स्वास्थ्यकर्मी लिएर घरघरै पुगे । स्थानीय १ सय ५ वर्षीय सेतीलक्ष्मी श्रेष्ठलाई भेटे ।

उनीसँगै गएका स्वास्थ्यकर्मीले स्वास्थ्य परीक्षण गरे । ‘आमाको रक्तचाप अलि कम रहेछ । यसले रिंगटा लाग्न सक्छ,’ स्वास्थ्यकर्मी गीता शर्माले भनिन्, ‘शरीर दुखेमा खाने सिटामोल र कमजोरी हटाउन भिटामिन दिएका छौं ।’

स्वास्थ्यकर्मीको टोली ८९ वर्षीय चन्द्रमान शाक्यको घरमा पुग्यो । बेलाबेलामा रक्तचाप बढ्ने र हाडजोर्नीको समस्या देखिन्छ । स्वास्थ्यकर्मीले चिसोबाट बच्न, गेडागुडी र नुन कम खान सुझाव दिए । दुखाइ कम गर्ने औषधि र भिटामिन दिए । उपमहानगरले दुई वर्षदेखि ८४ वर्ष उमेर पुगेका ज्येष्ठ नागरिकलाई घरदैलोमै स्वास्थ्य उपचार प्रदान गरिरहेको छ ।

गत वर्षबाट ८० वर्ष पुगेकालाई सेवा दिइरहेको हो । प्रत्येक चौमासिकमा उपमहानगरका १९ वडामा स्वास्थ्यकर्मी खटिने गर्छन् । स्वास्थ्य टोलीमा वडाका प्रतिनिधि, नगर स्वास्थ्य केन्द्रका स्वास्थ्यकर्मी र महिला स्वास्थ्य स्वयंसेविका हुन्छन् । उनीहरूले ज्येष्ठ नागरिकको चेकजाँच गरी सामान्य खालका बिरामीलाई घरमै औषधि दिन्छन् ।

औषधिसँगै उमेर अनुसार उपयोगी हुने भिटामिन तथा पोषक तत्त्व समेत निःशुल्क वितरण गर्छन् । जटिल रोगका लागि भने सरकारी अस्पतालमा रिफर गर्ने गरेका छन् । त्यहाँ समेत ज्येष्ठ नागरिकको निःशुल्क उपचार गर्ने व्यवस्था मिलाइएको छ ।

चाडबाडका बेला ज्येष्ठ नागरिकमा हुन सक्ने स्वास्थ समस्या ख्याल गरेर स्वास्थ्य परीक्षण गरिएको वडाध्यक्ष लिगलले बताए । परिवारबाट रेखदेख नपाएका नागरिकका लागि छिमेकी र परिवारका सदस्य जुटाएर सम्मान र संरक्षणको वातावरण मिलाउन सहजीकरण गरेको उनले सुनाए ।

उपमहानगरका प्रमुख शिवराज सुवेदीले चाडबाडका बेला ज्येष्ठ नागरिकलाई स्वस्थ र खुसी पार्न भन्दै जनप्रतिनिधि र स्वास्थ्य टोली घरदैलोमा खटेको बताए । उपमहानगरमा ८० वर्ष पुगेका करिब ८ सय वृद्धवृद्धा छन् ।

प्रकाशित : आश्विन १८, २०७६ ११:१६
ADVERTISEMENT
प्रतिक्रिया
पठाउनुहोस्

गाउँमा चहलपहल, सहर सुनसान

कान्तिपुर संवाददाता

परासी — ठूलो बजार, चाडपर्वमा किनमेल भन्नासाथ पहिले सदरमुकामको सम्झना हुन्थ्यो  । जिल्लाभरिबाट सर्वसाधारण सामान किनबेच गर्न धाउँथे  ।

ठूला पसल, होटल र मनोरञ्जनका माध्याम सदरमुकाम केन्द्रित हुन्थे । सरकारी कामकाजका लागि सदरमुकाम आउजाउ गर्नुपर्थ्यो । अहिले समय फेरिएको छ । स्थानीय तह कार्यान्वयनपछि गाउँमै मुकाम स्थापना भए ।

सदरमुकामका कार्यालय स्थानीय तहमा आए । नगरपालिका र गाउँपालिकाका केन्द्र सञ्चालनसँगै सदरमुकामको चहलपहल गाउँ केन्द्रित बनेको छ ।

साबिक नवलपरासी जिल्ला पश्चिम सुनवलदेखि पूर्वमा गैंडाकोटसम्म फैलिएको थियो । सामान्य कामका लागि सदरमुकाम आउनुपर्थ्यो । एक दिनमा काम पूरा नहुने समस्या थियो । दूरी धेरै भएकाले बास बस्नुपर्थ्यो । सेवाग्राहीको चापले व्यवसाय फस्टाएको थियो । दुई जिल्ला बनेपछि सदरमुकाम परासी सुनसान बनेको छ ।

दुई दिन लगाएर नवलपुरको पहाडी क्षेत्रबाट परासी आउने सेवाग्राहीको काम अहिले स्थानीय तहमै हुन्छ । जिल्लाभरिका योजना सम्झौता, पेस्की तथा रकम फर्स्योटका लागि सदरमुकाम धाउनुपर्दैन । पहिले नवलपुर क्षेत्रबाट गाडी रिजर्भ गरेर उपभोक्ता योजना सम्झौताका लागि सदरमुकाम परासी आउने गर्थे । अहिले जिल्ला समन्वय समितिको कार्यालय सुनसान छ । तीन महिनादेखि समन्वय समिति प्रमुखविहीन भए पनि कसैले पनि गुनासो गरेका छैनन् । सानादेखि ठूला सबै विकास आयोजनाको कार्यान्वयन स्थानीय तहबाट हुन थालेपछि नेता, सांसद र मन्त्रीसम्म बजेट माग्न स्थानीय केन्द्रमै आउँछन् । सदरमुकामका कार्यालय कर्मचारीको तलब मात्र खुवाउने र अनुगमनमा सीमित बनेका छन् ।

सर्वसाधारणको आउजाउ घटेपछि सदरमुकामस्थित होटल व्यवसाय प्रभावित बनेको छ । सदरमुकाममा प्रशासनिक कामका लागि आउँदा हुने किनमेल, टाढा ाट आउदा बास बस्नुपर्ने भएकाले यहाँको होटल व्यवसाय फस्टाएको थियो । अहिले जिल्लाबाट हुने सरकारी काम स्थानीयतहबाट हुन थालेपछि सेवाग्राही शून्य बनेका छन् ।

सानादेखी ठूला योजना, सिफारिस वडा, गाउँ र नगरपालिका केन्द्रमा हुने गरेका छन् । यसको प्रत्यक्ष यहाँ व्यवसायीलाई परेको छ । राज्य पुनसंरचनाका क्रममा साबिकको नवलपरासी जिल्ला दुई प्रदेशमा विभाजित भएको छ । पहिले सदरमुकाममा रहेका अधिकार स्थानीय तहमा पुगेका छन्, पर्याप्त शान्ति सुरक्षा नहुनु, लगानीको वातावरण नहुनु, रातको समयमा पूर्वपश्चिम राजमार्गबाट सदरमुकामसम्म सार्वजनिक यातायात सञ्चालन नहुनुजस्ता कारण व्यवसायका लागि प्रतिकूल भएको हो ।

रामग्राम नगरपालिकाका प्रमुख नरेन्द्र गुप्ताले विकेन्द्रिकरणको अभ्यासमा यस्तो हुनु स्वभाविक भएको बताए । ‘हामीसँग प्रशस्त साभावना छन् । औद्योगिक तथा पर्यटकीय सम्भावनाको प्रचुर सम्भावना भएकाले सदरमुकाम परासीको भविष्य उज्वल छ,’उनले भने, ‘सदरमुकाम भएको नगरपालिकाको गौरवका योजना सम्पन्न भएपछि नमुना नगरको रुपमा विकसित हुनेछ ।’ स्थानीय तहको कार्यान्वयनसँगै बर्दघाट, सुनवल, सुस्ताको बेलाटारी, पाल्हीनन्दनको केन्द्र लगायत स्थानमा बजार बिकास भएका छन् ।

सानादेखी होलसेल पसल सञ्चालन हुन थालेका छन् । फोटो स्टुडीयो देखी होटल तथा अन्य व्यवसाय सुरु भएका छन् । उद्योग वाणीज्य संघ नवलपरासीका महासचिव गिरीराज पाण्डेका अनुसार संघियतापछि सदरमुकाम परासीमा साना लगानीका व्यवसायीको संख्यामा कमी आएको बताए ।

प्रकाशित : आश्विन १८, २०७६ ११:१६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT