गाउँ–गाउँमा दुर्गापूजा

ठाकुरसिंह थारू

बर्दिया — दसैंमा नवरात्र पूजाका लागि गाउँ–गाउँमा दुर्गा भवानीको प्रतिमा राखिएको छ  । घटस्थापनाको दिन सार्वजनिक स्थानमा दुर्गाको प्रतिमा राखेर पूजा सुरु गरिन्छ  ।

एउटै गाउँमा २/३ मूर्ति राखिएका छन् । चोकचोकमा दुर्गा मूर्ति स्थापना गरिएको छ । नेपालगन्ज र भारतको रुपैडिहाबाट करिब २० देखि २५ हजार रुपैयाँमा मूर्ति खरिद गरेर ल्याइएको छ । मूर्ति किन्न गाउँभरीका घरघरबाट पैसा संकलन गरिएको छ । पूजाका लागि आवश्यक पर्ने समाग्रीका लागि पनि सामूहिक रकम जम्मा गरिएको छ ।

घटस्थापनादेखि नौ दिन नवरात्रसम्म निरन्तर सार्वजनिक रुपमै पूजाका गर्ने व्यवस्था मिलाइएको छ । ‘दुर्गा माताको मूर्ति खरिद गरी गाउँको बीचमा राखिसक्यौँ । ९ दिनसम्म पूजा हुन्छ,’ बढैयाताल गाउँपालिका ३ का शम्भुप्रसाद चौधरीले भने, ‘साँझ बिहान पूजा गरिन्छ । राति महाभारत हेरेर रमाइलो गर्छौं ।’

पश्चिम तराईका जिल्लामा दुर्गाको मूर्ति राख्ने राख्ने परम्परा सुरुमा मधेसी समुदायमा थियो । अहिले थारू र पहाडी समुदायले पनि मूर्ति राखेर पूजा गर्ने परम्परा बनेको छ । दुर्गाको मूर्ति राखिएपछि गाउँमा चहलपहल बढेको छ ।

स्थानीयहरू रमाइरहेका छन् । नाचगान नहुने गाउँमा दुर्गाको मूर्तिले रौनकता थपेको छ । गाउँमा रातिका समयमा चहलपहल बढेको छ । बजारका चोकहरूमा पनि दुर्गा राखिएका छन् । ‘दुर्गाको मूर्ति राखिएको ठाउँमा गाउँभरीका युवा जम्मा हुँदा त्यसै रमाईलो हुन्छ । पूजापाठ हुन्छ,’ बाँसगढी नगरपालिका मोतिपुरका रामप्रताप चौधरी भन्छन्, ‘हरेक वर्ष दसैंको पूजाका लागि दुर्गाको मूर्ति राख्दै आएका छौँ ।’

दसैं सकिएको भोलिपल्ट नजिकैको नदी खोलामा मूर्ति बिसर्जन गर्ने चलन छ । सयौं मूर्ति एकसाथ सेलाउँदा हजारौको भिड लाग्ने गरेको छ । बर्दियाका पूर्वी क्षेत्रका स्थानीयले मानखोलामा, गुलरिया क्षेत्रका स्थानीयले भादामा र पश्चिम क्षेत्रकाले कर्णाली नदीमा मूर्ति बिसर्जन गर्दै आएका छन् ।

पश्चिम क्षेत्रमा भने निकै कम मूर्ति राख्ने गरिएको छ । तर बाँकेका सीमावर्ती बर्दियाका गाउँगाउँमा मूर्ति राखिएको छ । यसले युवाहरूलाई अनुशासनमा बाँध्न सहयोग पुगाएको छ । जथाभावी मदिरा प्रयोगमा कमी आएको स्थानीय बताउँछन् ।

‘नवरात्र पूजा गाउँमा हुन थालेपछि मदिरा प्रयोगमा कमी आउछ । धेरै युवाले दसैंका बेला पनि मदिरा खादैनन्,’ स्थानीय युवा रामदास चौधरी भन्छन्,‘दुर्गा पूजाले युवाहरूलाई गलत कार्य गर्नबाट रोक्छ ।’

प्रकाशित : आश्विन १८, २०७६ ११:१६
प्रतिक्रिया
पठाउनुहोस्

दसैंमा गाउँ झलमल्ल

कान्तिपुर संवाददाता

दमौली — तनहुँको भिमाद नगरपालिका–४ नरिकोट गाउँको सडक झलमल्ल भएको छ । स्थानीय नरीकोट युवा क्लबले दसैंको अवसरमा गाउँको टोलटोलमा सडक बत्ती जडान गरेपछि उज्यालिएको हो  ।

गाउँमा भएका शुभकार्यमा संकलित रकमले सडक बत्ती जडान गरिएको क्लबका अध्यक्ष पदम रानाले बताए । गाउँको दर्जन बढी ठाउँमा बत्ती जडान गरेको उनले बताए । युवाले श्रमदान पनि गरेका थिए । बत्ती जडान गर्दा करिब ५० हजार रुपैयाँ खर्च भएको छ ।

युवा क्लबले सडक बत्ती जडान गर्नु उदाहरणीय कार्य भएको स्थानीय बुद्धिजीवी देवेन्द्र थापाले बताए । ‘युवाको कार्य सराहनीय छ,’ उनले भने, ‘अन्धकार गाउँ उज्यालो भएको छ ।’ सडक बत्तीका कारण गाउँ सुरक्षित हुने उनले विश्वास गरे ।

चोरी र वन्यजन्तु आक्रमणबाट पनि जोगिन सकिने उनको भनाइ छ । बटुवालाई पनि रातको समयमा हिँड्डुल गर्न सहज भएको छ ।

प्रकाशित : आश्विन १८, २०७६ ११:०७
पूरा पढ्नुहोस्
प्रतिक्रिया
पठाउनुहोस्